UJesu upholisa umuntu onemimoya emimbi
(Mt 8:28-34; Lk 8:26-39)
1UJesu nabafundi bakhe bayamela ngaphetjheya kwelwandle, enarheni yamaGerasene. 2Kwathi lokha uJesu nehla ngemkhunjini, wahlangatjezwa mumuntu onommoya omumbi avela emathuneni. 3Umuntu loyo ubegade ahlala emathunenapho begodu bekungasenamuntu okghona ukumbopha ngitjho nangeenketani. 4Ngeenkhathi zoke ubegade ahlala abotjhwe izandla neenyawo, kodwana begade adabula iinketani abe ephule neensimbi abekabotjhwe ngazo iinyawo. Gade kungekho omhlulako ngamandla. 5Ubusuku nemini gade azulazula hlangana namathuna neentatjana, aphele arhuwelele azisike nangamatje.
6Kwathi nakabona uJesu kudanyana naye, wagijima wafese wawa ngamadolo ngaphambi kwakhe. 7Warhuwelela ngelizwi elikhulu wathi: “Ngikutjhisa ngani wena Jesu Ndodana kaZimu ongoPhezulu na? Funga ngoZimu bonyana awuzukungihlunguphaza!” 8Watjho lokhu ngombana uJesu bekathe kuye: “Phuma emuntwini lo wena mmoya omumbi!”
9Yeke uJesu wambuza wathi: “Ungubani ibizo lakho na?”
Wamphendula wathi: “Ibizo lami nguLegiyoni ngombana sibanengi.” 10Waphikelela ngokurabhela uJesu bona angabaqotjhi enarheni le.
11Umhlambi omkhulu wezavukazana gade udla hlanu kwentatjana. 12Amadimoni arabhela uJesu athi: “Sithumela ezavukazaneni, usivumele singene kizo.” 13Wawavumela, aphuma-ke endodeni leyo angena ezavukazaneni. Umhlambi woke, ongaba zizavukazana eziziinkulungwana ezimbili, wagijimela emehlelweni wesebe, wadlhumukela ngelwandle, wacwila!
14Abelusi bezavukazana babaleka, babika isigesi ngedorobheni nemaphandleni. Abantu baphuma bazokubona okwenzekileko. 15Kwathi nabafika kuJesu, babona indoda ebegade ingenwe liwoma lamadimoni, ihlezi lapho, yembethe begodu seyibuyelwe mkhumbulo, yeke besaba. 16Labo ababonileko batjela abantu bona kwenzekeni endodeni engenwe mimoya emimbi, babatjela nangezavukazana. 17Yeke abantu babawa uJesu bona akhambe enarhenabo.
18Kwathi uJesu nangena ngemkhunjini, umuntu obegade angenwe madimoni wakhombela ukukhamba naye.
19UJesu azange amvumele kodwana wathi kuye: “Khamba uye ekhaya emndeninakho ufese ubatjele bona kungangani okwenzelwe nguSomnini nokobana ukurhawukele kangangani.”
20Yakhamba-ke indoda leyo beyathoma ukubika iindabezo eDekapolisi, kobana kungangani ekwenzelwe nguJesu. Boke barareka khulu.
Umntazanyana ohlongakeleko nomfazi ogulako
(Mt 9:18-26; Lk 8:40-56)
21Kwathi bona uJesu godu ayamele ngaphetjheya kwelwandle ngomkhumbi, wabungelelwa siqubuthu esikhulu eqadi kwelwandle. 22Yeke omunye wabaphathi besinagogi ebekuthiwa nguJayirosi weza lapho. Wathi nakabona uJesu, wawela eenyaweni zakhe, 23wamrabhela khulu wathi: “Indodakazami encani iyahlongakala. Akhese uze uzoyibeka izandla ukuze iphole beyiphile!”
24Yeke uJesu wakhamba naye. Isiqubuthu esikhulu samlandela sisunduzelana kuye.
25Bekunomfazi ogade aphopha iingazi, sele kuminyaka elitjhumi nambili anjalo. 26Wagula khulu akhamba iinyanga ezinengi, waphelelwa ngikho koke agade anakho. Kodwana kunobana aphole, ukugula kwarhagala. 27Kwathi bona ezwe ngoJesu, weza ngemva kwakhe hlangana nesiqubuthu wafese wakghwatha isambatho sakhe, 28ngombana ubegade azitjele wathi: “Nange ngingasengikghwathe nje isambatho sakhe kwaphela, ngizokuphola.”
29Khonokho ukuphopha kwakhawuka, wazizwa emzimbenakhe bona utjhaphulukile emtlhagwenakhe. 30Msinyazana uJesu walemuka bona kunamandla aphumileko kuye, waphendukela ngesiqubuthwini wathi: “Ngubani othinte isambatho sami?”
31Abafundi bakhe bathi kuye: “Uyabona bona isiqubuthu sabantu sisunduzelana phezu kwakho kodwana khonapho ubuza bona ngubani okuthintileko?”
32Kodwana uJesu waragela phambili waqala ngapha nangapha ukubona bonyana ngubani omthintileko. 33Yeke umfazi loyo, ngokwazi bonyana kwenzekeni kuye, weza wafese wawela eenyaweni zakaJesu, athuthumela ngokwesaba; wamtjela loke iqiniso. 34UJesu wathi kuye: “Ndodakazi, ukukholwa kwakho kukusindisile. Khamba ngokuthula, utjhaphuluke eenhlungwini zakho.”
35Kwathi uJesu asakhuluma njalo, kwafika amadoda athileko abuya kwaJayirosi umphathi wesinagogi athi kuye: “Indodakazakho ihlongakele, usamtshwenyelani umfundisi na?”
36UJesu akhange ayelele abakutjhoko, wathi kumphathi wesinagogi: “Ungesabi, kholwa nje kwaphela.” 37Akhange avumele namunye bona akhambe naye, ngaphandle koPitrosi, uJakopo nomfowabo uJwanisi. 38Kuthe nabafika emzini womphathi wesinagogi, uJesu wabona isiphithiphithi sabantu balila barhahlawula. 39Wangena wathi kibo: “Siphithiphithi sani lesi kanye nokurhahlawula okungaka na? Umntwana akakahlongakali kodwana ulele.”
40Kodwana bamhleka.
Wabakhuphela ngaphandle, wathatha uyise lomntwana nonina kanye nabafundi eze nabo, bangena ngapha kunomntwana khona. 41Wambamba ngesandla wathi kuye: “Thalitha kumi!” Nakutjhugululwako kutjho bona “Mntazanyana, ngithi kuwe, sikima!”
42Khonokho umntazana wasikima wakhambakhamba. Gade aneminyaka elitjhumi nambili. Abantu barareka khulu ngalokho. 43UJesu wabadosa ngendlebe bona bangatjeli noyedwa ngalokho okwenzekileko. Godu wabayala bona baphe umntazanyana loyo okugonywako.
