UMARKOSI 16

₁Kuthe bona iSabatha lidlule, uMariya Magdalina, uMariya unina kaJakopo kanye noSalome, bathenga iinthako ukuze bayokuzesa umzimba kaJesu. ₂Ekuseni ngelanga lokuthoma leveke, ngemva kobana kuphume ilanga bangena indlela eya ethuneni. ₃Babuzana bathi: “Ngubani ozasigedela ilitje ebungenweni bethuna na?” ₄Kodwana bathi nabaqalako babona ilitje ebegade lilikhulu ligediwe. ₅Kuthe nabangena ngethuneni babona isokana lihlezi ngesigomeni lembethe izambatho ezimhlophe, bethuka.

₆Lathi kibo: “Ningethuki. Nifuna uJesu weNazaretha obekabethelwe esiphambanweni na? Awa, uvukile, akakho lapha! Qalani indawo lapha bekabekwe khona. ₇Nje-ke khambani niyokutjela abafundi bakhe noPitrosi nithi, ‘Ungaphambi kwenu endleleni eya eGalile. Nizambona lapho njengombana bekanitjelile.’ ”

₈Baphuma ngethuneni bathathela ngebelo ngombana bebaqhaqhazela begodu bararekile. Azange batjho ilitho ebantwini ngombana bebathukile.

₉UJesu navuka ekuseni elangeni lokuthoma leveke, waziveza qangi kuMariya Magdalina aqotjha kuye amadimoni alikhomba. ₁₀Wakhamba wayokubikela labo ebegade banaye nebegade bahloboka, balila. ₁₁Kuthe bona bezwe ukuthi uJesu uyaphila, nokobana umbonile, akhange bamkholwe.

₁₂Emva kwalokho, uJesu waziveza ngobunye ubujamo ebafundini bakhe ababili lokha nagade basendleleni eya emaphandleni. ₁₃Bona-ke babuyela emuva bayokubikela abanye, kodwana nabo akhange babakholwe.

₁₄Ngemva kwesikhathi uJesu waziveza kabalitjhumi nanye basagoma. Wabasola ngokutlhoga kwabo ukukholwa kanye nangekanabo yokwala ukukholwa labo abambonileko ngemva kokuvuka kwakhe. ₁₅Wathi kibo: “Khambani iphasi loke, nitjhumayele ivangeli kikho koke okudaliweko. ₁₆Loyo okholwako abhajadiswe, uzakusindiswa kodwana loyo ongakholwako, uzakulahlwa. ₁₇Iimbonakaliswezi zizakulandela labo abakholwako: Ebizweni lami bazakuqotjha amadimoni, bazakukhuluma ngeenlimi ezitjha; ₁₈bazakudobha iinyoka ngezandla zabo, nabasela okubulalako, abazokwenzeka ilitho; bazakubeka izandla phezu kwabagulako, baphole.”

₁₉Emva kobana iKosi uJesu sele ikhulumile nabo, yanyuselwa ezulwini, yayokuhlala ngesigomeni sakaZimu. ₂₀Abafundi baphuma bayokutjhumayela yoke indawo. IKosi yasebenza nabo, yafakazela ilizwi layo ngeembonakaliso ezalilandelako.