UMIKHA 5

“Kodwana wena, Bhethe-Lehema yakwa-Efratha,

nanyana umncani eenkorweni zakwaJuda nje,

phakathi kwakho kuzakuphuma othileko

ozakuba mbusi kwa-Israyeli ebizweni lami;

ondabuko yakhe yavela phambilini ekadeni,

ngowakhula inarha isalele.”

₂Nje-ke uSomnini uzakunikela abantu beJerusalema

ezandleni zezitha;

kufikela lapha kubelethwa khona othileko,

bese abafowabo abasekuthunjweni babuye

bazihlanganise namanye ama-Israyeli.

₃Uzakujama begodu eluse abantu bakhe

emandleni kaSomnini,

ebizweni eliphakamileko lakaSomnini uZimakhe.

Abantu bakhe bazakuhlala bavikelekile;

ngambala uzakuduma iphasi loke.

₄Awa, umbusethu akazukuthinteka.

Nakuma-Asiriya wona,

nange angalinga ukungena enarhenethu

bese atjhagala emarholwenethu,

sizawahlanganisa nabelusi abalikhomba

nabarholi ababunane bezizwe ezinye.

₅Bazakudla inarha ye-Asiriya ngesabula,

iye, inarha kaNimrodi ngesabula erhwatjhiweko.

Yeke umbusethu uzasisindisa ema-Asiriyeni

lokha nakalinga ukungena enarhenethu,

nanyana atjhagala emkhawulwenethu.

₆Iinzukulwana zakaJakopo phakathi kwezizwe zoke

zizakuba njengombethe ovela kuSomnini,

njengamathosi wezulu phezu kotjani obuhlaza.

Azizukuthembela ebantwini

begodu azizukurhuluphela ezizweni ezinye.

₇Awa, iinzukulwana zakaJakopo phakathi kwezizwe

zizakufana nengwenyama phakathi kweenyamazana,

njengebhubezana hlangana nomhlambi wezimvu.

Zizakukhamba zigadanga,

zirathula kungabi nosindisako.

₈Yewuphakamise isandla sakho

wena muntu kaJakopo

ujamelane nezitha zakho

ukuze zirhayileke zoke.

₉USomnini wathi malungana nezitha zethu:

“Mhlokho ngizakurhayila iinjomani zenu

bengibhidlize neenkarana zenu zepi.

₁₀Ngizakurhayila amadorobho wenarhekhenu

bengibhuruze woke amadorobhenu anemithangala.

₁₁Ngizakurhayila ubuloyi benu

beningasaba nababoni.

₁₂Ngirhayile nabosingazimu benu ababaziweko

namatjenu eniwalotjhako;

angekhe benisakhothamela izinto

enizibumbe ngezandla zenu.

₁₃Ngizakuruthula nesithombe senu u-Atjhera

bengibhidlize neendawo zenu ezicwengileko.

₁₄Ngizazibuyiselela ngobukhali

nangetukuthelo phezu kwezizwe

ngendlela ezingazange ziyibone.”