Indoda enekhwekhwe
(Mk 1:40-45; Lk 5:12-16)
1Kwathi uJesu selehlile entabeni, isiqubuthu esikhulu samlandela. 2Indoda enekhwekhwe yeza kuye, yafese yaguqa phambi kwakhe, yathi kuye: “Kosi, nawuthandako ungangihlambulula.”
3UJesu wathabulula isandla sakhe wakghwatha indoda leyo, wathi: “Ngiyathanda, hlambuluka!” Khonokho indoda leyo yaphola. 4Yeke uJesu wathi kiyo: “Qinisekisa bona awutjeli muntu namunye, kodwana khamba unqophe kumphristi, ukhuphe isipho njengokomyalo kaMosi, kube bufakazi kibo.”
Ukukholwa kwenceku yenduna
(Lk 7:1-10)
5Kwathi uJesu sele angene eKapernawumi, umphathimabutho wamhlangabeza abawa isizo, 6wathi: “Kosi, ikhoboka lami liyagula ekhaya le, likhubazekile begodu liseenhlungwini.”
7UJesu wathi: “Ngizakukhamba ngiyolipholisa.” 8Umphathimabutho waphendula wathi: “Kosi angikafanelwa kukobana ungeza kwami. Khupha nje ilizwi, ikhoboka lami lizakuphola. 9Nami ngokwami ngiphethwe, nginamajoni angaphasi kwami. Nangithi kelinye, ‘Khamba!’ liyakhamba, nangithi, ‘Yizapha!’ liyeza. Ngithi ekhobokeni lami, ‘Yenza lokhu!’ bese liyenza.”
10Lokha uJesu nezwa lokhu, warareka bewathi ebantwini ebebamlandela: “Ngiqinisile ngiyanitjela bona azange khengifumane noyedwa kwa-Israyeli onokukholwa okungaka. 11Nje-ke ngiyanitjela bona abanengi bazakuvela ngepumalanga nangetjingalanga, bahlale phasi esidlweni no-Abrahamu, u-Isaka noJakopo embusweni wezulu. 12Kodwana labo abangebombuso bazakulahlelwa ngaphandle ebumnyameni, lapha kuzakuba khona ukulila nokugedla kwamazinyo.” 13Yeke uJesu wathi kumphathimabutho: “Khamba! Kuzakwenzeka njengokukholwa kwakho.”
Ikhoboka lakhe laphola khonokho.
UJesu upholisa abantu abanengi
(Mk 1:29-34; Lk 4:38-41)
14UJesu waya ngekumbeni kaPitrosi, wafunyana umkhwekazi kaPitrosi alele, aphethwe mgomani. 15Wakghwatha isandla sakhe; umgomani wamlisa, wavuka khonokho, wenzela uJesu okugonywako.
16Kwathi nakuhlwako kwalethwa kuye abanengi ebebanamadimoni, waqotjha imimoya ngelizwi kwaphela bewapholisa abagulako. 17Lokhu kwenzeka khona kuzakuzaliseka okwakhulunywa ngomphorofidi u-Isaya, nasithi:
“Khonapho yathwala ukugula kwethu,
yatjatha iinsizi zethu.”
Umvuzo wokulandela uJesu
(Lk 9:57-62)
18Kwathi uJesu nabona isiqubuthu simzombelezile, wakhupha umyalo wokobana kweyanyelwe ngaphetjheya kwelwandle. 19Umfundisi womthetho weza kuye wathi: “Mfundisi, ngizakulandela nanyana kukuphi lapha uya khona.”
20UJesu wamphendula wathi: “Iimpungutjha zinemigodi, iinyoni zineenhlakana, kodwana iNdodana yoMuntu ayinandawo yokubeka ihloko.”
21Omunye wabafundi wathi: “Kosi, akhe ngiyokubulunga ubaba ntange.”
22Kodwana wamphendula wathi: “Yewungilandele, lisa abafileko babulungane.”
UJesu uthulisa isiwuruwuru
(Mk 4:35-41; Lk 8:22-25)
23UJesu wangena ngemkhunjini; abafundi bakhe bamlandela. 24Khonokho, qala kwavuka isiwuruwuru esikhulu ngelwandle, umkhumbi wafuna ukucwila. Kodwana uJesu bekalele. 25Abafundi baya kuye bamvusa bathi: “Kosi! Yewusisindise, safa!”
26UJesu wabaphendula wathi: “Kubayini nesabe nina bokukholwa okuncani na?” Yeke wavuka wakhalimela isiwuruwuru namaza, kwaba khona ukuthula okukhulu.
27Abantu barareka, bathi: “Mumuntu onjani-ke lo? Ngitjho isiwuruwuru namaza kuyamlalela!”
Ukupholiswa konemimoya emimbi
(Mk 5:1-20; Lk 8:26-39)
28Kwathi bona uJesu afike esifundeni seGadara ngaphetjheya kwelwandle, wahlangatjezwa babantu ababili abanamadimoni abaphuma emalibeni. Abantwaba gade banenturhu kangangobana abantu bebangasakghoni ukukhamba ngendlela leyo. 29Qala, barhuwelela bathi: “Usifunani wena Ndodana kaZimu na? Uzele ukuzosihlunguphaza, isikhathi singakafiki na?”
30Mlenzana nalapho bekukhona umhlambi wezavukazana, udla. 31Yeke amadimoni arabhela uJesu athi: “Nangabe uzosiqotjha lapha, khona-ke sithumela emhlambini wezavukazana lo.”
32UJesu wathi kiwo: “Khambani!” Yeke akhamba angena ezavukazaneni. Woke umhlambi wagijimela ngerharheni, wadlhumukela ngelwandle, wafela ngemanzinapho. 33Abelusi bezavukazana babaleka, bangena ngedorobheni, bafese babika koke lokho ngitjho nokwenzeke ebantwini abanamadimoni. 34Yeke boke abantu bedorobho baphuma bayokuhlangabeza uJesu. Kwathi bonyana bambone, bamrabhela bona akhambe esifundeni sekhabo.
