UMALAKI 3

₂Alo, ngubani ongabhesela ilanga lokuza kwaso? Ngubani ozakujama ekubonakaleni kwaso na? Ngambala ilangelo lizakufana nomlilo womncibilikisi nanjengesibha somhlanzi. ₃Isithunywa sizakuhlala njengomncibilikisi nomcwengisisi wesiliva; uzakucwengisisa amaLevi awahlunge njengegolide nesiliva ukuze abe ngewakaSomnini, abaphristi abaletha iminikelo ngendlela efaneleko. ₄Yeke iminikelo yakwaJuda neJerusalema izakwamukeleka kuSomnini njengemihleni yaphambilini neminyakeni eyadlulako.

₅“Ngizakubandamela kini-ke bona ngigwebe. Ngizakuba msinyana ekufakazeni ngokujamelana nezanusi, iinhlobongi, nabafunga amanga, godu ngokujamelana nabadlelezela iinsebenzi imirholwazo, abagandelela abahlolokazi neentandani, bamuka neenkhonzi amalungelwazo, kodwana bangangesabi mina.” Kutjho uSomnini uSomandla.

₆“Mina Somnini angiphenduki, nani nzukulwana zakaJakopo anikatjhuguluki. ₇Kusukela emihleni yaboyihlo nitjhidile emiyalwenami begodu akhange niyilonde. Nanibuyela kimi, nami ngizakubuyela kini,” kutjho uSomnini uSomandla. “Kodwana nibuza nithi, ‘Sibuye bunjani?’

₈“Kunomuntu ongagalaja uZimu na? Kodwana nina niyangigalaja. Niyabuza nithi, ‘Sikugalaje njani?’ Ngokwetjhumi nezipho. ₉Ninikelelwe ngamanikelela, sizwe soke, ngombana niyangigalaja. ₁₀Lethani koke kwetjhumi ngesilulwini, ukuze kube nokudla endlinami. Ngilingani ngalokhu.” Kutjho uSomnini uSomandla. “Nibone nangingazukunivulela izulu liwuluke, nginithululele iimbusiso ezizakuba mhlumba. ₁₁Ngizakukhalimela intethe bona ingadli iintjalo zenu ukuze iindiribe emasiminenu zingabhalelwa kuhloma.” Kutjho uSomnini uSomandla. ₁₂“Nje-ke izizwe zoke zizakuthi nibusisiwe ngombana inarhenu izakuba ngeganukejako.” Kutjho uSomnini uSomandla.

₁₃USomnini uthi: “Ningihlabe ngamagama, kodwana niyabuza nithi, ‘Sikhulume ngawe sathini?’ ₁₄Nithe, ‘Akusizi ukulotjha uZimu. Yini njekhona esiyizuzileko ngokwenza akufunako nokukhamba sizilile phambi kwakaSomnini uSomandla? ₁₅Khonanje sibiza abazaziko njengababusisiweko. Iye, iinkhohlakali ziyaphumelela nabajamelene noZimu bayaliswa.’ ”

₁₆Lokha abesaba uSomnini nabakhulumisana bodwa, uSomnini uyabezwa. Umtlolo osongiweko wesikhumbuzo watlolwa phambi kwakhe mayelana nalabo abesaba uSomnini bahlonipha nebizo lakhe.

₁₇USomnini uSomandla uthi: “Ngambala bazakuba ngebami mhlana ngenyula igugu lami. Ngizabarhawukela njengomuntu orhawukela indodanakhe emsebenzelako. ₁₈Nizakubona godu umehluko phakathi kwabalungileko nabakhohlakeleko naphakathi kwabalotjha uZimu nabangamlotjhiko.”