UMALAKI 2

₁“Nje-ke baphristi, isiyeleliswesi ngesenu! ₂Lokha naningalaleliko, nihloniphe ibizo lami ngokuncamileko, ngizokuthumela amanikelela phezu kwenu begodu ngifelelise iimbusiso zenu. Vele, ngizazifelelisa naningancamiko.” Kutjho uSomnini uSomandla.

₃“Ngizanikhalima nina siqhema sabaphristi, ngizakurhatjha ubuso benu ngomswani, iye, umswani womhlabelo wemigidenu; nginisuse ebusweni bami. ₄Nizakwazi-ke bonyana nginithumelele isiyeleliswesi ngebanga lesivumelwano sami noLevi.” Kutjho uSomnini uSomandla.

₅“Isithembiso engasenza kuLevi, kwakukumnikela ukuphila nokuthula. Ngamnikela lokho bona angihloniphe, wavele wangihlonipha wesaba ibizo lami. ₆Emlonyenakhe bekunemiyalo yeqiniso, akukho okumamanga okwafunyanwako eembheneni zakhe. Wakhamba nami ngokuthula amsulwa begodu abanengi ubatjhugululile esonweni.

₇“Ngambala iimbhena zomphristi kufanele zilonde ukwazi, emlonyenakhe kube nomyalo ngombana yena usithunywa sakaSomnini uSomandla. ₈Kodwana nina baphristi, niphambukile endleleni begodu ngeemfundiso zenu nenze abanengi bakhutjwa; niphambene nesivumelwano sami noLevi.” Kutjho uSomnini uSomandla. ₉“Nje-ke, mina ngizanenza nibe ngabadelelekileko nabanyazekako phambi kwabantu boke ngombana akhange nilonde iindlela zami, kunalokho nikhethe ukufundisa umyalo ngokukara abantu.”

₁₀Asinababa munye soke na? AkusinguZimu munye osibumbileko? Alo, kubayini sidelele isivumelwano sabobaba ngokungathembeki omunye komunye? ₁₁UJuda akhange athembeke. Kwenziwe ameswe kwa-Israyeli neJerusalema: UJuda usilaphaze okucwengileko nokuthandwa nguSomnini ngokuthatha umlobokazi olotjha abosingazimu. ₁₂Sengathi uSomnini angamsusa umuntu owenza intwele ematendeni wakwaJakopo, ngitjho naloyo omjamelelako nanyana angaletha iminikelo kuSomnini uSomandla.

_13-14Niwululela i-aldari lakaSomnini ngeenyembezi. Nilila benibibitheke ngombana uSomnini akasatjheji iminikelwenu begodu akasayamukeli ngethabo ezandleni zenu. Beniyabuza nithi: “Kubayini kunje?” Uyazi bonyana yini? USomnini umgwebi phakathi kwakho nomfazakho weenkomo ngombana wenze ameswe ngokungathembeki kuye amlinganakho, amfazi wesivumelwano somuzi. ₁₅Azange enze indoda nomfazi baba munye na? Ubagade angenza abantu ababili abahlukileko. Kubayini-ke abenze baba munye? Kungombana ubagade afuna ukubumba isizukulwana esethembekileko kuZimu. Nje-ke zilondeni nimunye njalo njengokubunjwa kwenu, ungamlahli umfazakho weenkomo. ₁₆USomnini uZimu wakwa-Israyeli uthi: “Ngambala, loyo otlhala umkakhe abe amqotjhe uphehla inturhu. Nje-ke zilondeni nimunye njengokubunjwa kwenu, ungamlahli umfazakho weenkomo.” Kutjho uSomnini uSomandla.

₁₇Nidine uSomnini ngeenkulumo zenu, kodwana niyabuza nithi: “Simdine ngaliphi uSomnini?” Ngelithi: “Boke abenza ameswe balungile kuSomnini begodu uyabathabela. Nange kungasi njalo, uphi-ke uZimu wokulunga?”