ULEVITIKUSI 5

₁“Kungenzeka umuntu abone namkha ezwe ngobulelesi kodwana athule ngobufakazi, phezu kokobana asazi bonyana umuntu onjalo unikelelwe, ngalokho uzabe wonile bese uyakhathazeka ngebanga lesonweso; ₂godu kungenzeka umuntu athinte into esilapheleko ngokungazi, kungaba sidumbu sesilwana esisilapheleko sommango, sefuyo esilapheleko namkha seemphili ezikhakhaba ehlabathini uzakusilaphala bese uzizwa anomlandu; ₃kungenzeka godu umuntu athinte ukusilaphala komunye umuntu ngokungazi, kungaba nanyana yini engasilaphaza umuntu, alemuke ngalokho bese uzizwa anomlandu; ₄namkha enze isifungo ngamawala, kungaba ngokuhle namkha okumbi kwananyana yini angahle afunge ngayo ngobutjhapho, alemuke ubutjhapho bakhe bese uzizwa anomlandu; ₅kufuze avume lokho one ngakho kikho koke okubaliweko. ₆Akalethe ihlawulo kuSomnini okuyimvana namkha imbuzana esikazi ayithethe emhlambinakhe, ibe mhlabelo wehlambululo mayelana nesono sakhe. Ngendlela leyo umphristi uzabe enzela umuntu loyo itethelelo ngebanga lesono sakheso. ₇Nakube akanamandla wokuletha imvana, akalethe ihlawulo kuSomnini okumazuba amabili wommango namkha amazutjana amabili wekhaya kube mhlabelwakhe wehlambululo mayelana nesono sakhe. Elinye libe ngelomhlabelo wehlambululo bese elinye liba ngelomhlabelo wokutjhiswa. ₈Kufuze awalethe kumphristi bese umphristi uthoma ngokunikela linye lawo libe mhlabelo wehlambululo. Aliquntule intanyana le eduze nehloko, nokho angavuli isitutu salo. ₉Akaphophisele ezinye zeengazi zalo zomhlabelo wehlambululo ngeqadi kwe-aldari, ezinye aziphophisele emanzinzwenalo. Lokho kumhlabelo wehlambululo. ₁₀Elinye umphristi uzakwenza ngalo umhlabelo wokutjhiswa, enze njengombana kuvame ukwenziwa. Ngendlela leyo umphristi uzabe enzela umuntu loyo itethelelo ngebanga lesono sakhe. Ngalokho uzakuhlambuluka esonweni sakheso.

₁₁“Nakube akanamandla wokuletha amazuba amabili wommango namkha amazutjana amabili wekhaya, akalethe umnikelwakhe ositjhutjana seflowuru esefiweko kube mnikelo wehlambululo. Akukafuzi afake amafutha we-oliva namkha amakha phezu kwayo ngombana lowo mnikelo wehlambululo. ₁₂Akayilethe kumphristi ozakunghwatha isandla seflowuru leyo kube sisabelo sesikhumbuzo bese uyitjhisa e-aldarini kanye neminikelo ekhethekileko kuSomnini. Lokho kumnikelo wehlambululo.

₁₃“Ngendlela leyo umphristi uzabe enzela umuntu loyo itethelelo ngebanga lesinye sezono ezibaliweko. Ngalokho uzakuhlambuluka esonweni sakheso.

“Woke omunye umnikelo ungowomphristi, njenganyana kwenziwa ngomnikelo weenthoro.”

₁₄USomnini wakhuluma noMosi wathi: ₁₅“Nangabe umuntu wenza isiphambeko ngokona angakahlosi ngokusilaphaza izinto ezicwengileko zakaSomnini, kufuze alethe ihlawulo kuSomnini okuliqama elimsulwa alithethe emhlambinakhe. Iqama aliletha njengomhlabelwakhe wehlawulo alibe nobungako besiliva obubekwa mphristi ngokwesilinganiso sendawo ecwengileko. ₁₆Kufuze abuyisele koke lokho one ngakho mayelana nezinto ezicwengileko begodu angezelele ngobungako besihlanu. Akanikele umphristi iqamelo bese amenzele itethelelo ngalo. Ngalokho uzakuhlambuluka esonweni sakheso.

₁₇“Nangabe umuntu wona ngokwenza okuphambene neminye yemiyalo kaSomnini kodwana angazi bonyana wone muphi, khonapho azizwe anomlandu begodu akhathazeke, ₁₈kufuze alethe kumphristi umhlabelo wehlawulo okuliqama elimsulwa alithethe emhlambinakhe. Iqama alilethako alibe nobungako besiliva obubekwa mphristi. Umphristi uzamenzela itethelo mayelana nesono asenze angakahlosi. Nanyana angazi bonyana wenze sonobani, uzakuhlambuluka emmoyenakhe. ₁₉Lowo-ke mhlabelo wehlawulo. Iye, umuntu loyo abuyisene noSomnini ngawo.”