ULEVITIKUSI 4

₁USomnini wakhuluma noMosi wathi kuye ₂akakhulume nama-Israyeli athi kiwo: “Nanyana ngubani owona ngokungakahlosi ngokwenza okuphambene neminye yemiyalo kaSomnini, akaphathwe nganasi indlela:

₃“Nangabe kona umphristi ozesiweko, abangele abantu umlandu, akalethe ikunzana emsulwa kuSomnini kube mhlabelwakhe wehlambululo mayelana nesono asenzileko. ₄Akalethe ikunzana leyo phambi kwakaSomnini emnyango wetende lokuhlanganela. Abeke isandla sakhe phezu kwehloko yekunzana bese uyihlabela phambi kwakaSomnini. ₅Yeke umphristi ozesiweko uzakuthatha ezinye zeengazi zekunzana leyo angene nazo ngetendeni lokuhlanganela. ₆Kufuze atlubhuze umunwakhe ngeengazinapho bese ufafaza ezinye zazo kalikhomba phambi kwakaSomnini ngaphambi kwesiyaya sendawo ecwengileko. ₇Godu umphristi uzabese uninda ezinye iingazi phezu kweempundu ze-aldari letjhwalo phambi kwakaSomnini ngetendeni lokuhlanganela. Inengi leengazi zekunzana leyo azithululele emanzinzweni we-aldari lomhlabelo wokutjhiswa phambi komnyango wetende lokuhlanganela. ₈Kufuze asuse woke umhlwehlwe wekunzana yomhlabelo wehlambululo okutjho umhlwehlwe weenredlo nakho koke okuhlangene nazo, ₉iziso zombili nomhlwehlwe wakhona namanoni wesifunzi kanye nepundu yesibindi ekufuze ikhutjhwe neziso. ₁₀Koke lokho akube njengalokha nakukhutjhwa umhlwehlwe ekomeni eyenzelwa umhlabelo wetjhebiswano. Yeke umphristi uzakutjhisa lokho e-aldarini lomhlabelo wokutjhiswa. ₁₁Kodwana isikhumba sekunzana nenyama yayo yoke, ihloko nemilenze, iinredlo nemiswanayo ₁₂okutjho koke okuseleko kwekunzana kufuze akuthathe aphumele nakho ngaphandle kwekampa endaweni ekhethekileko, lapha kuthululwa khona umlotha we-aldari. Abase umlilo ezalenapho atjhise koke lokho.

₁₃“Nangabe woke umkhambathi wama-Israyeli owona ngokungakahlosi ngokweqa imiyalo kaSomnini kodwana ihlangano ingakuboni lokho bese umkhambathi lowo uzizwe unomlandu, ₁₄ihlangano ayilethe ikunzana njengomhlabelo wehlambululo, masinyana nasele isono somkhambathi sazekile. Kufuze ilethwe phambi kwetende lokuhlanganela, ₁₅bese abaphathi bomkhambathi babeka izandla zabo phezu kwehloko yekunzana, bayihlabe phambi kwakaSomnini. ₁₆Umphristi ozesiweko uzakuthatha ezinye zeengazi zekunzana angene nazo ngetendeni lokuhlanganela. ₁₇Uzakutlubhuza umunwakhe ngeengazinapho bese uzifafaza phambi kwakaSomnini kalikhomba ngaphambi kwesiyaya sendawo ecwengileko. ₁₈Godu umphristi uzabese uninda ezinye iingazi phezu kweempundu ze-aldari letjhwalo phambi kwakaSomnini ngetendeni lokuhlanganela. Inengi leengazi zekunzana leyo azithululele emanzinzweni we-aldari lomhlabelo wokutjhiswa phambi komnyango wetende lokuhlanganela. ₁₉Kuzakufanela bona asuse woke umhlwehlwe bese uwutjhisa e-aldarini. ₂₀Lokho akwenze ngekunzana leyo yaphambilini, akakwenze nangekunzana yomhlabelo wehlambululo lo. Ngendlela leyo umphristi uzabe wenzela umkhambathi itethelelo. Ngalokho umkhambathi uzakuhlambuluka esonweni sawo. ₂₁Nje-ke uzakukhuphela ikunzana leyo ngaphandle kwekampa, ayitjhise njengombana atjhise yokuthoma. Lokho kumhlabelo wehlambululo wehlangano.

₂₂“Nangabe kona umrholi ngokungakahlosi ngokwenza okuphambene neminye yemiyalo kaSomnini uZimakhe bese uzizwa anomlandu, ₂₃akalethe ipongo emsulwa njengomhlabelwakhe wehlambululo, masinyana nasele alemukile ngesono asenzileko. ₂₄Uzakubeka isandla sakhe phezu kwehloko yepongo bese uyihlabela phambi kwakaSomnini lapha kuhlatjelwa khona umhlabelo wokutjhiswa. Lokho kumhlabelo wehlambululo. ₂₅Nje-ke umphristi uzakuthatha ezinye zeengazi zomhlabelo wehlambululo ngomunwakhe azininde eempundwini ze-aldari lomhlabelo wokutjhiswa bese uthulula inengi leengazezo emanzinzweni we-aldari. ₂₆Uzakutjhisa woke umhlwehlwe phezu kwe-aldari kube njengombana atjhisa umhlwehlwe womhlabelo wetjhebiswano. Ngendlela leyo umphristi uzabe enzela umuntu loyo itethelelo ngebanga lezono zakhe. Ngalokho uzakuhlambuluka esonweni sakheso.

₂₇“Nangabe kona umuntukazana ngokungakahlosi ngokwenza okuphambene neminye yemiyalo kaSomnini bese uzizwa anomlandu, ₂₈akalethe imbuzi esikazi emsulwa njengomhlabelwakhe wehlambululo, masinyana nasele alemukile ngesono asenzileko. ₂₉Uzakubeka isandla sakhe phezu kwehloko yembuzi, ayihlabe njengomhlabelo wehlambululo lapha kuhlatjelwa khona umhlabelo wokutjhiswa. ₃₀Nje-ke umphristi uzakuthatha ezinye zeengazi zomhlabelo wehlambululo ngomunwakhe, azininde eempundwini ze-aldari lomhlabelo wokutjhiswa bese uthulula inengi leengazezo emanzinzweni we-aldari. ₃₁Umuntukazana loyo uzakususa woke umhlwehlwe kube njengalokha nakasusa umhlwehlwe womhlabelo wetjhebiswano. Umphristi uzawutjhisa phezu kwe-aldari ube mhlabelo owamukeleka kuSomnini. Ngendlela leyo umphristi uzabe umenzela itethelelo. Ngalokho uzakuhlambuluka esonweni sakheso.

₃₂“Umuntukazana loyo uvunyelwe ukuletha imvana njengomhlabelwakhe wehlambululo. Yona kufuze ibe ngesikazi emsulwa. ₃₃Uzakubeka isandla sakhe phezu kwehloko yemvana, ayihlabe njengomhlabelo wehlambululo lapha kuhlatjelwa khona umhlabelo wokutjhiswa. ₃₄Nje-ke umphristi uzakuthatha ezinye zeengazi zomhlabelo wehlambululo ngomunwakhe, azininde eempundwini ze-aldari lomhlabelo wokutjhiswa bese uthulula inengi leengazezo emanzinzweni we-aldari. ₃₅Umuntukazana loyo uzakususa woke umhlwehlwe kube njengalokha nakawususa emvaneni yomhlabelo wetjhebiswano. Umphristi uzawutjhisa phezu kwe-aldari neminikelo ekhethekileko kuSomnini. Ngendlela leyo umphristi uzabe umenzela itethelelo ngesono asenzileko. Ngalokho uzakuhlambuluka esonweni sakheso.”