ULEVITIKUSI 24

₁USomnini wakhuluma noMosi wathi: ₂“Yala ama-Israyeli bona alethe kuwe amafutha we-oliva atsengileko nacwebileko wokukhanyisa ilithi leembani. Iimbani azihlale zivutha njalo ₃ngetendeni lokuhlanganela ngaphandle kwesiyaya esingaphambi kobufakazi. U-Aroni kufuze abone bonyana iimbani zihlala zikhanya phambi kwakaSomnini ukusukela ntambama bekuse. Lokhu kuzakuba simiso sanini nanini eenzukulwaneni zenu. ₄Akathi ngantambama ahlele iimbani phezu kwelithi legolidembala phambi kwakaSomnini.

₅“Thatha iflowuru esefiweko bese ubhage izikwa ezimasongo ezilitjhumi nambili ngayo. Isikwa ngasinye sidutjwe ngamathungana amabili weflowuru. ₆Kufuze uzibeke ngamahla amabili, zibe zithandathu elihleni ngalinye, zibekwe phezu kwetafula legolidembala. ₇Elihleni ngalinye utjhise uburegu obutsengileko bomuthi welebhona, esikhundleni sezikwa kube mnikelo okhethekileko kuSomnini. ₈ISabatha elinye nelinye u-Aroni kufuze ahlele izikwezo phambi kwakaSomnini. Lokho akwenziwe njalo esikhundleni sama-Israyeli, kube sibopho sanini nanini. ₉Izikwezo zingezaka-Aroni namadodanakhe, bazazidlela endaweni ecwengileko ngombana zimnikelo ocwenge khulu, zisisabelo sakhe eminikelweni ekhethekileko kuSomnini. Lokhu kusimiso sanini nanini.”

_10-11Gade kunomfazi wakwa-Israyeli ibizo lakhe kunguTjhelomithi oyindodakazi kaDibhiri wekoro yakwaDani. Bekanendodana uyisayo egade kumGibhide, ihlala nama-Israyeli. Ngelinye ilanga kwaba khona ukulwa ngekampeni phakathi kwendodana leyo nomIsrayeli othileko. Ekulwenapho indodana leyo yahlambalaza ibizo lakaZimu lokha nayithukanako. Nje-ke abantu bayiletha kuMosi. ₁₂Yavalelwa ngesikhungweni, kwalindelwa ukwizwa bona intando kaSomnini uZimu izakuthini kibo ngayo.

₁₃Nje-ke uSomnini wakhuluma noMosi wathi: ₁₄“Khupha umhlambalazi loyo ngekampeni, kuthi boke abamizwe athukana babeke izandla phezu kwehlokwakhe bese umkhambathi woke umkhanda ngamatje. ₁₅Godu tjela woke ama-Israyeli uthi, ‘Nanyana ngubani othuka uZimu uzakuthwala umlandu wesono sakheso. ₁₆Akabulawe ohlambalaza ibizo lakaSomnini. Umkhambathi woke umkhande ngamatje. Woke umuntu ohlambalaza ibizo lakaSomnini, kungaba sikhonzi namkha umuntu wendabuko, akabulawe.’ ”

₁₇Godu uSomnini wathi: “Obulala umuntu, naye akabulawe. ₁₈Obulala ifuyo yomunye kufuze ayijamiselele, kube yipilo ngepilo. ₁₉Olimaza omunye umuntu, naye akalinyazwe: ₂₀ithambo ngethambo, ilihlo ngelihlo, izinyo ngezinyo, abuyiselelwe njengombana enze komunye. ₂₁Iye, obulala ifuyo yomunye kufuze ayijamiselele, kodwana obulala omunye umuntu akabulawe. ₂₂Nibe nomthetho munye owembethe isikhonzi naloyo ongowendabuko. Mina nginguSomnini uZimenu.”

₂₃UMosi wakhuluma njalo-ke nama-Israyeli. Ngalokho bamkhupha ngekampeni loyo ogade athukene, bamkhanda ngamatje. Ngokunjalo ama-Israyeli enza njengombana uSomnini ayale uMosi.