ISILILO 2

₁Maye etukuthelwenakhe uSomandla

uyibhibeze kangangani indodakazi yeZiyoni!

Kuthe ubuphaziphazi bakwa-Israyeli busemkayini,

wabuphosela phasi.

Azange akhumbule isenabelo seenyawo zakhe

ngelanga letukuthelwakhe.

₂USomandla ugomojele woke amadlelo kaJakopo

ngaphandle kwesirhawu;

ngetukuthelwakhe ugirize zoke iimphephelo

zendodakazi yakwaJuda.

Umadlhe phasi bewasilaphaza

umbuso neenkhulu zawo.

₃Ngetukuthelo evuthako

uqunte zoke iimpondo zaka-Israyeli.

Ususe isidla sakhe

lokha isitha nasizako.

Uvuthe njengamalangabi kwaJakopo,

waqothula yoke indawo.

₄Ucuphe umsebakhe njengesitha,

ngesidla sakhe wawuthiya njengenaba.

Ubulele koke okukara amehlo

ngetendeni lendodakazi yeZiyoni;

Uthulule ilaka lakhe njengomlilo.

₅USomandla ube njengesitha,

ugomojele u-Israyeli!

Iye, ugomojele yoke imibhotjhongo yeJerusalema,

wonakalisa amadorobho anemithangala kwa-Israyeli.

Wandisa ukulila nokuzila

endodakazini yakwaJuda.

₆Utlhifirije ithempeli lakhe inga sidalasi esivandeni;

watjhabalalisa indawakhe yomnyanya.

USomnini uphelise eZiyoni

umnyanya neSabatha.

Ngokufutheka kwetukuthelwakhe

wadela ikosi nomphristi.

₇USomandla unyefule i-aldari lakhe,

walahla ikumbakhe ecwengileko.

Unikele imithangala yeemphephelo zeJerusalema

ezandleni zesitha.

Kwahlokonywa ngethempelini lakaSomnini

njengamhla womnyanya.

₈USomnini wazimisela

ukubhuruza umthangala wendodakazi yeZiyoni:

Welula umuda,

azange agodle isandla sakhe ekutjhabalaliseni,

wabanga bonyana umbundu nomthangala kuzile,

kwaphela amandla ndawonye.

₉Amasango weJerusalema acwila equlwanini,

uSomnini watjhabalalisa bewephula iinqabo zalo.

Ikosi namakhosanalo aphakathi kwezizwe,

akusenamthetho wabaphristi,

ngitjho nabaphorofidi bakhona

abasafunyani imibono kuSomnini.

₁₀Abaphathi bendodakazi yeZiyoni

bahlezi equlwanini bathulile,

bazithele ngethuli eenhloko

bembatha iinzilo.

Amatlawu weJerusalema

ahlome iinhloko phasi.

₁₁Amehlwami afiphala ngeenyembezi,

isisu sami siyasika,

inyongwami ichithekela equlwanini

ngebanga lokuphodlheka kwabantu bami:

Amasana nabantwana baphela amandla,

eendledlaneni zedorobho.

₁₂Balilela abonina, bathi:

“Siphi isikwa newayini na?”

Baphela amandla njengabahlatjwe ngesabula

eendledlaneni zedorobho;

bakhuphela imiphefumulwabo

eemfubeni zabonina.

₁₃Ngizakufanisa nasiphi isibonelo,

ngikulinganise nani,

wena ndodakazi yeJerusalema na?

Ngizakufanisa nani ukuze ngikududuze

wena tlawu leZiyoni na?

Ngambala ukuphodlheka kwakho

kubanzi njengelwandle.

Ngubani ongakwelapha na?

₁₄Abaphorofidi bakho

bakuvezele ikohliso nelize,

azange bembule icala lakho

kobana batjhugulule ubujamo bakho.

Kunalokho bakulethele imilayezo

eyikohliso nedurhisako.

₁₅Boke abadlula ngendlela

bakuthintithela izandla.

Bayakukhuza bebakuthintithele iinhloko

wena ndodakazi yeJerusalema,

bathi: “Ingabe leli lidorobho

ebelibizwa bonyana ngunobuhle,

ithabo lephasi loke na?”

₁₆Zoke izitha zakho

zikhuluma khulu ngawe.

Ziyababaza, zihline,

zirhuwelele zithi: “Siyirhiribidele!

Ngambala leli lilanga ebesililindile,

sesifikile kilo, sekunjalo-ke!”

₁₇USomnini wenze akuhlosileko,

uphumelelise ilizwi lakhe

njengombana alijamisa kade.

Ugirizile ngaphandle kwesirhawu;

wajabulisa isitha ngawe,

waphakamisa iphondo lamanabakho.

₁₈Iinhliziyo zabantwana zililela uSomandla.

Wena mthangala wendodakazi yeZiyoni

wulula iinyembezi, zehle njengomlanjana

ubusuku nemini!

Ungaziphi ukuphumula,

nethoro yelihlo lakho ingaledlhi.

₁₉Vuka urhahlawule ebusuku,

ekuthomeni kwesikhathi sabalindi!

Thulula ihliziywakho njengamanzi,

phambi kobukhona bakaSomandla!

Phakamisela izandla zakho kuye

ngebanga lepilo yabantwabakho,

abatsirimezwa yindlala

emajikeni wazo zoke iindledlana.

₂₀Awu, Somnini, akhe uqale bewuyelele!

Ukwenze kubani godu lokhu na?

Kumele abafazi badle iinthelo zabo,

abantwana ababasingathileko na?

Kumele abaphristi nabaphorofidi babulawe

endaweni ecwengileko kaSomandla na?

₂₁Abadala nabatjha

balele phasi eendledlaneni,

amatlawu namasokanami

abulewe ngesabula.

Wena wawabulala ngelanga letukuthelwakho,

wawarhayila ngaphandle kwesirhawu.

₂₂Umeme abangisahlelako mahlangothi woke

kwanga lilanga lomnyanya.

Ngelanga letukuthelo kaSomnini

akakho namunye owaphunyurha namkha wasinda.

Labo engibasingathileko bengabakhulisa,

isitha sami sibaqedile.