UJUDA 1

₂Sengathi umusa, ukuthula nethando kunganda kini noke.

₃Bathandekako, nanyana bengitjhisekela ukunitlolela ngesindiso esiyihlanganyeleko soke, ngibone kunesidingo bonyana nginitlolele nginibawe bona nilwele ukukholwa okwabekwa kwabacwengileko kwaba kanye. ₄Nje-ke sebangene ngokukhukhutha labo okwatlolwa ngabo ekadeni bona bangabokulahlwa. Bababantu abangesabi uZimu nabaphendulela umusa kaZimethu emesweni begodu baphika okunguye kwaphela uMnikazi wethu, iKosi uJesu Krestu.

₅Nanyana senikwazi koke lokhu, ngithanda ukunikhumbuza bona uSomnini wasindisa kwaba kanye isizwe sakhe enarheni yeGibhide, kodwana emva kwalokho warhayila labo abangazange bakholwe. ₆Ngitjho neengilozi ezingazange zibulonde ubukhosi bazo, kodwana zatjhiya ikhaya lazo, uzilonde eenketanini zesiphelani ebumnyameni obuzikileko zilindele ilanga elikhulu lokugwetjwa. ₇Ngokufanako, iSodoma neGomora kanye nemizi ebhodileko yazibandakanya emabayini ngendlela emameswe nedazukileko, yaba sibonelo sokuhlunguphazwa ngokutjhiswa ngomlilo wesiphelani.

₈Ngokunjalo, laba babhudangi basilaphaza imizimba yabo, badela ukulawulwa begodu bahlambalaza ubukhosi. ₉Ngitjho nengilozi ekulu uMikhayeli lokha nakaphikisana noSathana ngesidumbu sakaMosi, azange amtemeleje ngehlamba kodwana wathi: “USomnini uzakukhalimela.”

₁₀Kodwana abantwaba bahlambalaza nanyana kuyini abangakwaziko; nalokho abakwaziko ngemvelo, njengeenyamazana, ngikho okubabhubhisako. ₁₁Maye kibo, ngombana bakhamba endleleni kaKayini; bagijimela ekudukeni kwakaBhalami ngenca yomvuzo begodu babhubha ekuhlubukeni kwakaKora. ₁₂Laba balihlazo eminyanyeni yenu yethando lapha badla khona nani banganavalo, bazondla bona. Banjengamafu aphetjhulwa mumoya, banjengemithi yesilimela enganazo iinthelo, efe kabili etsonyulwe nemirabhu. ₁₃Bamamaza welwandle abhubhudlha amahlazo wawo; baziinkwekwezi ezilahlekileko ezibekelwe ubumnyama obukhulu obungapheliko.

₁₄U-Inogo, osizukulwana sekhomba kusukela ku-Adamu, waphorofida ngabo wathi: “Qalani, uSomnini uza nebakhe abacwengileko abamatjhumitjhumi weenkulungwana, ₁₅uzokugweba boke, abe ahlunguphaze boke abangakholwako ngazo zoke izenzo zabo zokungakholwa abazenzileko ngendlela yokungakholwa kwabo, iye, nangamezwi anamadinyana abawakhuluma ngokunyefula.”

₁₆Laba kubabantu abakhalalako nabasolako; balandela iinkanuko zabo; bayazigqaja begodu balutha abanye ukuze bafumane inzuzo.

₁₇Kodwana nina bathandekako, khumbulani amezwi akhulunywa ngaphambilini bapostoli beKosethu uJesu Krestu. ₁₈Bathi kini: “Ngemihla yokuphela kukhona abazanihleka ihlaya, bakhambe ngeenkanuko zabo ezimbi.” ₁₉Ngibo labo abanganaMoya abaletha ukwahlukana. ₂₀Kodwana nina bathandekako, zakheni ekukholweni kwenu okucwengileko, nithandaze ngoMoya oCwengileko. ₂₁Hlalani ethandweni lakaZimu, nilindele isirhawu seKosethu uJesu Krestu, esisiletha ekuphileni okungapheliko. ₂₂Nizwelane nalabo abazazako; ₂₃abanye basindiseni ngokubahlwitha emlilweni; abanye nizwelane nabo ngokwesaba, nizonde ngitjho nesambatho esinindwe ziinkanuko zabo ezimbi.

₂₄Kiloyo onamandla wokunilonda bona ningawi, nokunijamisa phambi kwephazimulo yakhe ninganabala, ninokuthokoza okukhulu, ₂₅kuye uZimu oyedwa, uMsindisethu ngoJesu Krestu iKosethu, akube kuye iphazimulo, amandla nobukhosi, kusukela ekuthomeni nagadesi ngokungapheliko! Amen.