UJOTJHUWA 14

₁La mamafa ama-Israyeli awafumana enarheni yeKanana abawabelwa ngu-Elazara umphristi, uJotjhuwa umsa kaNuni kanye neenhloko zemindeni yaboyise beenkoro zama-Israyeli. ₂Ilifa labo labiwa ngefumbe njengombana uSomnini ayala uMosi mayelana neenkoro ezilithoba nesiquntu. ₃UMosi gade abele iinkoro ezimbili nesiquntu ilifa ngepumalanga yeJordani. AmaLevi azange awabele ilifa hlangana neenkorwezo. ₄Abantu bakwaJosefa gade baziinkoro ezimbili, uManase no-Efrayimu. Iye, amaLevi azange awabele ilifa njengenarhawo; kwaphela amadorobho wokuhlala kanye namadlelo wakhona kobana ifuywawo idle. ₅Nje-ke ama-Israyeli aba inarha njengombana uSomnini ayala uMosi.

₆Abajameli babantu bakwaJuda beza kuJotjhuwa eGiligali. UKalebi umsa kaJefune umKhenizi wathi kuye: “Nguwe owaziko bona uSomnini wathini kuMosi inceku kaZimu eKhadetjhi-Bharineya mayelana nami nawe. ₇Gade ngineminyaka ematjhumi amane lokha uMosi inceku kaSomnini nangithuma ngiseKhadetjhi-Bharineya kobana ngiyokuhlola inarha, ngambuyela nependulo njengombana kwakusehliziywenami. ₈Abafowethu abenyuka nami bafakela abantu amanzi emadolweni, kodwana mina ngalandela uSomnini uZimami ngokupheleleko. ₉UMosi wafunga mhlokho wathi, ‘Ngambala inarha obeke kiyo inyawo lakho izakuba lilifa lakho nabantwabakho isiphelani ngombana ulandele uSomnini uZimami ngokupheleleko’. ₁₀Yeke, qala, uSomnini ungibulungile njengombana watjho eminyakeni ematjhumi amane namihlanu le, ukusuka ngesikhathi akhuluma amazwi lawa kuMosi lokha u-Israyeli nasakhamba erhalawumbeni. Nakhu namhlanje sengineminyaka ematjhumi abunane nahlanu, ₁₁kodwana ngisesenamandla nanamhlanjesi njengombana nganginjalo mhlana uMosi nangithumako. Amandlami nagadesi asese njengaleso sikhathi, ngisengaphuma ipi, ngirhole nabantu. ₁₂Yeke nginikela inarha yeentabezi uSomnini akhuluma ngayo mhlokho. Iye, mbala nawe wezwa mhlokho bona ama-Anakhi ahlala lapho anamadorobho amakhulu anemithangala. Nakube uSomnini uzakuba nami, ngiwaqotjhe lapho njengombana athembisa.”

₁₃Yeke uJotjhuwa wambusisa, wanikela uKalebi umsa kaJefune iRhebroni kwaba lilifa lakhe. ₁₄Ngaleyondlela iRhebroni yaba lilifa lakaKalebi umsa kaJefune umKhenizi bekube namhlanje ngombana walandela uSomnini uZimu wakwa-Israyeli ngokupheleleko. ₁₅Ibizo leRhebroni ekuthomeni bekuyiKhiriyathi-Ariba. U-Ariba loyo gade ayitsitsirimbakazi hlangana nama-Anakhi.

Ngesikhatheso inarha yaphumula izipi.