UJOTJHUWA 1

₁Ngemva kokuhlongakala kwakaMosi inceku kaSomnini, uSomnini wathi kuJotjhuwa umsa kaNuni omsizi kaMosi: ₂“UMosi incekwami uhlongakele. Yeke zilungiselele ukuyama iJordani le, wena nabo boke abantwaba, niye enarheni engiyipha ama-Israyeli. ₃Yoke indawo lapha kugadanga khona iinyawo zenu ngininikele yona njengombana ngathembisa uMosi. ₄Ukusuka erhalawumbeneli ukuya eLibhanoni begodu nokusuka emlanjeni omkhulu iYufrathe ukuyokufika elwandle elikhulu ngetjingalanga, okutjho yoke inarha yamaRhithi, kuzakuba yinarhenu. ₅Imihla yoke yokuphila kwakho akunamuntu ozakujama phambi kwakho. Ngizakuba nawe njengombana nganginoMosi. Angeze ngakulahla namkha ngikutjhiye. ₆Qina ube nesibindi ngombana nguwe ozokwenza bonyana abantwaba bazuze inarha engayifungela kiboyisemkhulu bona ngizabanikela yona. ₇Kwaphela nje wena, qina amandla ube nesibindi khulu, uyelele ukwenza ukuya ngawo woke umthetho incekwami uMosi eyakuyala ngawo. Ungaphambukeli ngesigomeni namkha ngesinceleni ukuze ube nepumelelo koke lapha ukhamba khona. ₈Incwadi yomthetho le ingasuki emlonyenakho, kodwana zindla ububule ngayo ubusuku nemini ukuze uyelele ukwenza ukuya ngakho koke okutlolwe kiyo. Ngalokho uzakwenza iindlela zakho zibe mhlophe bese uba nepumelelo. ₉Angithi ngikuyalile: Qina-ke ube nesibindi. Ungabi nevalo namkha uphele amandla ngombana uSomnini uZimakho unawe koke lapha ukhamba khona.”

₁₀Yeke uJotjhuwa wayala iinduna zabantu bona ₁₁zikhambe ziye ebantwini ngekampeni zifese zithi: “Lungisani imiphako ngombana emalangeni amathathu nizokuyama iJordani niyokuthumba inarha uSomnini uZimenu aninikele yona bona ibe lilifa lenu.”

₁₂UJotjhuwa wathi kebakwaRubeni, bakwaGathi nesiquntwini sekoro yakwaManase: ₁₃“Khumbulani igama inceku kaSomnini uMosi eyaniyala ngalo nayithi, ‘USomnini uZimenu unibonelele ngendawo yokuphumula lokha nakanipha inarha le.’ ₁₄Abafazi nababuthakathaka benu bazakusala kanye neenkomo zenu enarheni uMosi aninikele yona nganeno kweJordani. Kodwana zoke iingorho phakathi kwenu zizakuyama zihlomile ngaphambi kwabafowenu kobana zibasize, ₁₅kufikela lapha uSomnini anikela khona abafowenu ukuphumula njengani lokha nabo nabathumba inarha abayinikelwe nguSomnini uZimenu. Nje-ke ngemva kwalokho ningabuyela enarheni elilifa lenu, nihlale kiyo, okutjho inarha uMosi inceku kaSomnini aninikele yona ngepumalanga yeJordani.”

₁₆Baphendula uJotjhuwa bathi: “Koke osiyala ngakho sizakwenza nalapha usithuma khona sizakuya. ₁₇Njengombana salalela uMosi kikho koke, nawe sizakulalela. Inga uSomnini uZimakho angaba nawe njengombana gade anoMosi! ₁₈Nanyana ngubani ojamelana nemiyalwakho ngokungalaleli amezwakho kinamkha yini omyala ngayo, akabulawe. Wena qina ube nesibindi.”