UJOBHO 7

₁“Umuntu obhubhako akadosi emhlweni ephasinapha na?

Amalangakhe akasinjengowomqatjhwa?

₂Iye, unjengekhoboka elirhuluphela ukuphola kwelanga,

nomqatjhwa olubalubela umrholwakhe.

₃Ngaleyondlela, nami ngabelwe iinyanga ezinganamvuzo,

ngalinganiselwa amatshwenyeko ubusuku nobusuku.

₄Nangilalako ngithi,

‘Kazi ngiyokuvuka nini?’

Ubusuku bungilethele ukuwurubajeka

ngihlubayele bekube ngamarimarima.

₅Inyamami yembethwe ziimbungu nesila;

isikhumba sami siyakokorana, sikhune.

₆Amalangami ayarhaba ukuphela kunentambo yomluki,

iye, afika ekupheleni kunganathemba.

₇“Khumbula bona ipilwami semuphefumulo;

amehlwami angeze asabona ubuhle.

₈Ilihlo elingiqalileko alisazongibona;

amehlwakho azangifuna angasangifumani.

₉Njengelifu nalinyamalalako,

unjalo nowehlela ethuneni, akasabuyi.

₁₀Akasabuyeli ekumbenakhe,

abantu bekhabo angeze basambona.

₁₁“Ngalokho angeze ngavala umlomami;

ngifuna ukukhuluma esizini lomphefumulwami,

nginghonghoyile ebumunywini behliziywami.

₁₂Ngililwandle nanyana unomrhaso welwandle

kobana ungabeze ungibekele umlindi na?

₁₃Nangithi, ‘Icasi lami lizangiduduza,

umbhedami unciphise isinghonghoyilo sami’,

₁₄wena ungisabisa ngamabhudango,

ungihlunguphaze ngemibono.

₁₅Ngalokho ngikhethe ukukghanywa

nokufa kunomzimbami lo.

₁₆Kwanje sengiphosele itewu,

angeze ngisaphila ukuyaphi.

Akhe ungisuduke ngombana amalanga ayile.

₁₇Kubayini obhubhako aqakathekile kuwe,

kobana ungabeze umtjheje na?

₁₈Umkhambela njalo ekuseni,

umzizinye umzuzu nomzuzu!

₁₉Uzongirhudulela amehlo bekube nini,

ngaphambi kobana ungigadunge

ngikhokhe ummoya na?

₂₀Ngikone ngani na?

Ngikwenzeni wena hloli yabantu?

Kubayini unemba mina?

Ngimthwalo kuwe na?

₂₁Alo, kubayini ungacoleli isiphambeko sami,

ususe isono sami na?

Qala, sele ngizaziyela kwamhlaba,

uzangifuna kodwana ngizabe ngingasekho.”