UJOBHO 36

₂“Akhe ningibekezelele kancani,

kunengi engingakutjho ukumela uZimu.

₃Ilwazi enginalo libuya kudanyana,

ngizakhuluma ukulunga ngoMdalami.

₄Ngambala, amezwami akasimamala,

nangumuntu onelwazi elipheleleko phakathi kwenu.

₅Qalani, uZimu unamandla begodu akanyazi umuntu,

yena unamandla amakhulu ekuzwisiseni.

₆Abakhohlakeleko akabagcini baphila,

kodwana umela abagandelelweko.

₇Akawasusi amehlwakhe kabalungileko,

ubahlalisa namakhosi esihlalweni sawo;

bagcinekile begodu bayaphakanyiswa.

₈Nakube abantu babotjhwe ngeenketani,

bakhungwa ngeentambo zobuhlungu,

₉uZimu ubatjela lokho abakwenzileko,

ngitjho neemphambeko zabo

kobana banezenzo zelunya.

₁₀Ubenza bayelele bonyana uyabakhalima,

abayale kobana baphenduke kokumbi.

₁₁Nakube bayamlalela bebamlotjhe,

bazakuhlala emnonweni imihlabo yoke,

bakhombe ngophakathi iminyakabo yoke.

₁₂Kodwana nakube abalaleli,

bazakubhubha ngomkhonto,

bafe ngokuswela ilwazi.

₁₃AbanganaZimu ehliziyweni bakghubelela itukuthelwakhe,

abalileli isizo kuye lokha nababophako.

₁₄Bafa basese batjha,

ipilwabo isathambile.

₁₅UZimu usindisa ngobuhlungu abahlunguphaziweko,

iye, uvula iindlebe zabo ngegandelelo.

₁₆“UZimu bekangakuphunyurhisa

hlangana nemihlathi yesizi,

akuse endaweni ebanzi.

Bekangagcwalisa isithebe sakho

ngeenkhanakhana zokudla godu.

₁₇Kodwana wena ulungelwe sigwebo sesikhohlakali,

sewembethwe kugwetjwa kanye nokulunga.

₁₈Umuntu kufuze atjheje angayengwa mnono,

angavumeli ukufunjathiswa okunengi kumphambukise.

₁₉Idumo lakho belingalinganiswa negolide,

ngitjho nepahlakho yoke na?

₂₀Ebusuku bewungakameli

ukutjhidisa abantu eendaweni zabo.

₂₁Bewufanele utjheje, ungaphambukeli ekohlakalweni,

ngombana ngalokho uzizinywe yihlupheko.

₂₂Nakube uZimu uziveza aphakeme emandlenakhe

ngubani ongafundisa njengaye na?

₂₃Ngubani omkhokhela eendleleni zakhe,

namkha athi kuye, ‘Lapha utjhaphile’ na?

₂₄“Khumbula ukudumisa imisebenzakhe,

abantu ababhina ngayo.

₂₅Boke abantu bakubonile lokho,

obhubhako ukubukela akude.

₂₆Maye uZimu mkhulu!

Ungaphezu kokwazi kwethu!

Inani leminyakakhe aliphenyeki.

₂₇Wenyusa amathosi wamanzi,

awatsenge ekungwini kube lizulu,

₂₈elehliselwa mamafu ehlabathini

nombethe okhithikela phezu kwabantu.

₂₉Godu ngubani ongalemuka

bona amafu endlaleka njani

nokuduma kwesibhakabhaka sakhe na?

₃₀Qala, uhlakaza umbanakhe phezulu,

ngawo embese amaphethelo welwandle.

₃₁Ngezulu nangombani

ugweba abantu,

abe anikele ngokudla okunengi.

₃₂Izandla zakhe zifumbethe umbani,

uyawuyala bona urarambe kuphi.

₃₃Umdumo womkhosakhe uyambika,

itukuthelwakhe ilwa nokonakala.