UJOBHO 34

₂“Lalelani amezwami nina nhlakaniphi,

bekani indlebe kimi nina zazi ndina.

₃Mbala, indlebe izizinya amezwi

njengombana nelimu linandipha ukugoma.

₄Asikhetheni thina lokho okulungileko,

siqunte ngokwethu lokho okuhle.

₅Njengombana uJobho lo athe, ‘Ngimsulwa!

UZimu ungimuke ilungelo lami.

₆Nanyana ngineqiniso nje,

ngibonwa njengomleyimala;

nanyana nginganamlandu,

umsubela okimi

ungibangele isilonda esingapholiko.’

₇Mumuntu onjani ofana noJobho,

ozikholisa ngokunyefula uZimu

inga mumuntu osela amanzi na?

₈Ukhozisana nabenza okumbi,

azihlanganise neenkhohlakali,

₉ngombana uthi, ‘Akumsizi ngalitho umuntu

lokha nalinga ukujabulisa uZimu.’

₁₀Yeke yeningilalele nina madoda anokwazi:

Kukude noZimu ukwenza okumbi,

kukude noSabekako ukwenza okuphambeneko.

₁₁Unikela umuntu umvuzo ngokwezenzo zakhe,

amehlisele okukhambisana nokuziphatha kwakhe.

₁₂Mbala, uZimu akenzi ubukhohlakali,

oSabekako akahlanakezeli ubulungiswa.

₁₃Ngubani owambeka bona aphathe umhlaba?

Ngubani owambeka phezu kwelizwe loke?

₁₄Nabegade angahlosa

ukuthatha ummoyakhe nomphefumulwakhe,

₁₅koke okuphilako gade kuzakubhubha,

umuntu abuyele ethulini.

₁₆“Nakube unelwazi wena Jobho,

lalela lokhu,

yelela amezwami!

₁₇Ozonda ukulunga angabusa na?

Ungasola olungileko nonamandla ngokungalungi na?

₁₈Nguye ongathi emakhosini, ‘Niziinrhwirirhwiri’,

bese athi emakhosaneni, ‘Niziinkhohlakali’,

₁₉ongakhethi ubuso beenkhulu,

ongabeki abanothileko phambi kwabadududu

ngombana boke bamsebenzi wezandla zakhe.

₂₀Msinyana bayabhubha,

ngokurhabileko abanjingileko bayadlula banyamalale,

abanamandla bayasuswa kungengasandla somuntu.

₂₁Amehlwakhe aseendleleni zabantu,

ubona amagadangwabo woke.

₂₂Akunandawo emnyama,

ngitjho nobumnyama obunzima tshu,

lapha abenza okumbi bangabhaca khona.

₂₃UZimu akadingi ukubeka isikhathi

sokobana umuntu avele phambi kwakhe ebandla.

₂₄Ngaphandle kokubuza, ususa abanamandla,

ajamise abanye eenkhundleni zabo,

₂₅ngombana uyelela izenzo zabo.

Msinyana angabehlisela ihlekelele bese bayabhubha.

₂₆Ubahlunguphazela ukukhohlakala kwabo,

emtarini babonwe mumuntu woke.

₂₇Umphumela wokuhlubuka kwabo

nokungayeleli iindlela zakhe,

₂₈kukukobana isililo sodududu sizwakala kuye,

begodu uzwa isililo sabagandelelweko.

₂₉Lokha uZimu nathulileko,

ngubani ongamsola ngokungalungi?

Nange afihla ubuso bakhe,

ngubani ongamkhalimela?

Yena ulawula izizwe nomuntu ngamunye

₃₀ukuze onganaZimu angabusi,

angabi sisifu ebantwini.

₃₁Akhe sithi umuntu onjalo uthi kuZimu,

‘Nginomlandu, nokho angeze bengisona;

₃₂ngizakuyelela, yewungifundise,

nakube ngiphosisile, angeze bengisathoma.’

₃₃Alo, utjho bona uZimu ahlunguphaze onjalo

ngebanga lokobana wena umlahlile na?

Nguwe owenze isiqunto elinjalo, ingasi mina!

Nje-ke, veza umbonwakho ndoda!

₃₄Amadoda anelwazi azakuvumelana nami,

iye, indoda ehlakaniphileko izakuthi kimi,

₃₅‘UJobho ukhuluma anganalwazi,

amagamakhe akakavuthwa.’

₃₆“Madoda! Kwangathi uJobho lo angahlala ahlolisiswa,

ngombana iimpendulo zakhe ngezabantu abakhohlakeleko.

₃₇Uthi anezono angezelele ngokuba lihlubuka,

uthintitha izandla ngokunyefula phakathi kwethwapha,

abe namagama amdlulako kuZimu.”