UJOBHO 3

₃“Alibhubhe ilanga engabelethwa ngalo

nobusuku obathi,

‘Isibeletho sibambe umtwana womsana.’

₄Ilangelo alibe bumnyama,

uZimu ongaphezulu angalibali,

kungabi nomkhanyo mhlokho.

₅Alembathwe bumnyama,

iye, ubumnyama obunzima tshu;

amafu aligubuzese,

lisatjiswe lithunzi elinzima lesiwuruwuru.

₆Kwanga ubumnyama bungasula ubusukobo;

bungabalwa namanye amalanga womnyaka,

bungabi nendawo emalangeni weenyanga.

₇Ubusukobo abube yinyumba,

kungazwakali ukulilizela kibo.

₈Abanikelela amalanga abahlolozele ubusukobo,

iye, abanekghono lokutlhorholoja unomrhaso welwandle.

₉Iinkwekwezi zobusukobo azibe mnyama,

buhlulukele umkhanyo, kodwana ungabikhona,

bungaboni nokudabuka kokusa,

₁₀ngombana bungakavali iminyango yesibeletho sakamma,

namkha bufihlele amehlwami amatshwenyeko.

₁₁“Ngangingafilini-ke ekubelethweni kwami,

ngiphume esibelethweni ngife?

₁₂Amathanga avumeleni ukungamukela?

Amabele avumeleni ukungimunyisa?

₁₃Ngombana ngabe ngizilalele ngithulile,

iye, ngilele, ngiphumulile ethuneni;

₁₄ngilele namakhosi nabeluleki bephasi,

labo ebegade bavuselele amarubhi,

₁₅namkha ngilele namakhosana egade anegolide,

azalisa iinkumba zawo ngesiliva.

₁₆Kubayini ngingazange ngifihlwe equlwanini

njengombungu orhulukileko,

iye, njengesana elingazange libone ilanga?

₁₇Ethuneni iinkhohlakali zilisa ukuba yipehli,

abadiniweko bayaphumula.

₁₈Lapho, iimbotjhwa ziphumula ndawonye,

zingasezwa ilizwi lomgandelelazo.

₁₉Lapho, kunabakhulu nabancani,

nekhoboka litjhaphulukile emphathinalo.

₂₀Kubayini uZimu aphilisa osesizini,

nabamunyu emmoyeni?

₂₁Abantwabo bahlulukela ukufa, kodwana kungafiki,

bakurhubhe inga baphenya amagugu;

₂₂bathabe ngokweqileko,

bathokoze lokha nabafumana ithuna.

₂₃Kubayini uZimu aphilisa ongaboni indlela,

iye, loyo uZimu amvalele umzila?

₂₄Isibibithwana sami kwanga sisikwa kimi,

nokububula kwami kugobhoza njengamanzi.

₂₅Ngambala into ebengiyesaba ingehlele,

ebekungethusa kungigubuzesile.

₂₆Ngiyawurubajeka, anginakuthula,

ngiyahlubayela, anginakuphumula,

umtlhago ungembethe.”