UJOBHO 27

₂“NguZimu obekele indabami eqadi,

iye, ngoSabekako owenze umphefumulwami waba munyu,

₃ngiyafunga ngithi, qobana ummoyami usahlangene nenyama,

iye, nomphefumulo engiwuphiwe nguZimu useempumulweni zami,

₄umlomami angeze wakhuluma okuphambeneko,

nelimu lami alizukuba nekohliso.

₅Angeze bengivume bonyana nineqiniso,

ngizabe ngiyokufa ngilokhu ngimsulwa.

₆Ngizakukakarela ekulungeni kwami,

ngingavumi bona kungiphunyurhe.

Imihla yoke yokuphila kwami,

akukho lapha ihliziywami ingisola khona.

₇Izitha zami sese zifana nabakhohlakeleko,

abajamelene nami banjengabonakeleko.

₈Liyini ithemba lomzenzisi,

lokha uZimu naqunta ipilwakhe

iye, nasele athatha umphefumulwakhe na?

₉UZimu uyasilalela isililo sakhe na,

lokha nehlelwa matshwenyeko?

₁₀Onjalo uyathokoza koSabekako na?

Uyambiza uZimu ngeenkhathi zoke na?

₁₁Nginifundisa njalo lokho uZimu akwenze kimi,

angifihli iindlela zoSabekako!

₁₂Qalani, noke nizibonele lokhu!

Alo, yikulumo yani-ke engazisiko le?”

₁₃“Awa, nasi isiphetho uSomnini asibekele isikhohlakali,

nelifa elifunyanwa migulukudu koSabekako:

₁₄Nanyana abantwabaso bangaba banengi,

bazakuphelela esabuleni,

iinzukulwana zaso ziswele ukudla.

₁₅Eziseleko ziye ethuneni ngebanga lesifo,

abahlolokazi abanaso baphelelwe ziinyembezi.

₁₆Nanyana singabuthelela isiliva inga lithuli,

sidindele izambatho njengendunduma yomdaka,

₁₇abalungileko bazakwembatha nasilokhu sidindela njalo,

nabamsulwa bahlukanise isilivelo.

₁₈Ikumba esiyakhako ifana nendlelwana yomvunya,

injengomthunzi wamatjhwaba owakhiwe mlindi esivandeni.

₁₉Silala singonjingileko, sivuke singanalitho,

nasivula amehlwaso, koke kutjhabalele.

₂₀Ukwesaba kusibhudungela njengeenkhukhula,

ebusuku siphetjhulwe siwuruwuru.

₂₁Ummoya wepumalanga uyasiphephula, sikhambe,

usidudule, sitjhide endawenaso.

₂₂Usithelekela ngaphandle kwesirhawu,

silinga ngakho koke ukubalekela amandlawo.

₂₃Iye, wenza itjhada lokuwahla phezu kwaso,

uvunguze ngehla kwaso,

besibaleke endawenaso.”