UJOBHO 15

₂“Mumuntu ohlakaniphileko na,

ozwakalisa ilwazi elingazisiko,

nakhulumako abhodle ummoya?

₃Uzakuphikisana ngekulumo engatjho litho,

nangamezwi anganabubhadekelo na?

₄Wena nguwe owonakalisa ukwesaba uZimu,

unciphisa ukuzindla ngaye.

₅Iimphambeko zakho zifundisa umlomakho,

ukhetha ilimu labanobuqili.

₆Akusimi okulahlako, kodwana mlomakho lowo;

iye, iimbhena zakho zifakaza ngokujamelana nawe.

₇Umumuntu wokuthoma owabelethwako na?

Kghani wavela ngaphambi kweentaba?

₈Wakuzwa okwaquntwa emkhandlwini kaZimu na?

Wazithathela ingcenye yokuhlakanipha kwakaZimu na?

₉Yini oyaziko thina esingayazi?

Yini oyilemukako thina esingayizwisisiko?

₁₀Phakathi kwethu kunabathukgheleko nabadala,

abadala ngitjho nakuyihlo.

₁₁“Kuncani kuwe ukududuzwa nguZimu,

okutjho ilizwi elikhuluma nawe ngesizotha na?

₁₂Kubayini ihliziywakho ikukhohlisa,

amehlwakho wona akudurhiselani,

₁₃ummoyakho bewufulathele uZimu,

kuphume amezwi anjalo emlonyenakho na?

₁₄Uyini obhubhako kobana angabamsulwa

nobelethwe mfazi kobana angaba ngolungileko?

₁₅Nakube uZimu akathembi ngitjho neengilozi zakhe

namazulu angakahlanzeki phambi kwakhe,

₁₆kangangani-ke emuntwini onyenyisako nowonakeleko,

orhuqa izono inga usela amanzi!

₁₇“Ngilalela, ngikutjele!

Ngifuna ukukucocela ngengikubonileko.

₁₈Ngikutjele lokho okwadenjwa ngabahlakaniphileko,

ngegunya laboyise bangakufihlela.

₁₉Ngitjho labo abanikelwa inarha bodwa,

kwangabakhona amaphandle adlula hlangana nabo.

₂₀Okhohlakeleko uphila ngokwesaba ngaso soke isikhathi

neminyaka ebekelwe isirhonga ilibinzana.

₂₁Eendlebeni zakhe uzwa ngathi kunemidumo esabekako,

umbhubhisi uzomfikela asanethezekile.

₂₂Akalingi asuke ebumnyameni emsamo,

ngombana abantu bayamhlola bese bathi ufanelwa yisabula.

₂₃Uyazi bonyana uzakuzulazula afunane nesikwa athi, ‘Sikuphi?’

Uyazi kobana ilanga lobumnyama limlindele.

₂₄Ngokunjalo ukutshwenyeka nokutlhuwa kuyamethusa,

kumembatha njengekosi elindele ukusahlelwa.

₂₅“Ngebanga lokobana gade ajugujela uZimu iguduva,

aziphakamisa ajamelene noSabekako,

₂₆godu nokobana gade aqinise ihloko wamdumela,

athembe bona isihlangu sakhe siqinile

begodu simabhombo,

₂₇ngalokho wembesa ubuso bakhe ngamafuthakhe,

warephuzela ngamafutha emadininakhe!

₂₈Umuntu loyo uzakuhlala emadorobheni amarubhi,

ngeenkumbeni ezingakameli ukuhlalwa mumuntu,

ebezimele zibe liqubi leququ.

₂₉Yena uzakuloba ipahlakhe

nomnonwakhe awuzukubambelela;

ilifa lakhe angeze lamlandela ethuneni.

₃₀Akazukuphunyurha ebumnyameni,

umlilo uzotjhwabisa amahlumelakhe,

atjhiswe kuphefumula kwakaZimu.

₃₁Umuntu angathembeli kokungekho, azikhohlise,

ngombana uzakuzuza ilize lakolize.

₃₂Uzakufana nepande etjhwaba kungakabi sikhathi

namakarayo angasese lihlaza.

₃₃Iye, njengesidiribe esithintithwe iinthelo zingakavuthwa,

nomuthi we-oliva orhulula amathuthumbo.

₃₄Mbala abanganaZimu abatheli

nomlilo uqothula ipahla ezuzwe ngekohliso.

₃₅Bakhulelwa ihlekelele, babelethe ubumbi,

iye, isisu sabo sikhulisa ikohliso.”