UJOROMIYA 6

₁Nina bantu bakwaBhenjamini,

balekani phakathi kweJerusalema!

Vuthelani ipalapala eTekhowa!

Yenzani itshwayo lentuthu

liphakame ngehla kweBhethe-Hakeremu!

Nasi ihlekelele iphayiza ivela ngetlhagwini,

ngitjho nokurhayilwa okukhulu!

₂Indodakazi yeZiyoni kimi beyifana

namadlelo amahle.

₃Kodwana abelusi nemihlambabo bazakuza kiyo,

bahlome amatendabo phezu kwayo mazombe;

ngiloyo naloyo adlise isabelo sakhe kiyo.

₄Bathi: “Zilungiseleleni ukulwa neJerusalema!

Phakamani, sisahleleni emini ekulu!

Heyi! Imini ithoma ukujika

nemithunzi yentambama iba mide.

₅Yeke phakamani, asisahleleni ebusuku,

sirhayile imibhotjhongwayo!”

“Gawulani imithi,

nakhe iinqabo eziqhube

magegana nomthangala weJerusalema.

Leli lidorobho eligcwele ngezinto zesibambiso,

iye, koke kilo zizinto zokudlelezelwa.

₇Njengomthombo olonde amanzi amatjha

ngokunjalo nalo lilonde ubukhohlakali balo.

Inturhu nokuphangwa kuzwakele kilo,

ukugula kanye namancebalo

kuphambi kwami njalo.

₈Yelela wena Jerusalema,

nakungasinjalo ngizakufulathela ngokukghabhudlheka,

iye, nakungasinjalo ngizakwenza ube libhudu,

indawo lapho kungahlalwa khona.”

“Njengombana kwenziwa esidiribeni

abantu bazakuburuja amasalela

wesivuno kwa-Israyeli

iye, wena ovela ngetlhagwini,

dlulisa isandla sakho

njengomuntu obuthelela amadiribe.”

₁₀Ngingakhuluma nobani ngimyelelise

ukuze ezwe na?

Qalani, iindlebe zabo azikakotakotwa

ngalokho abezwa.

Qalani, ilizwi lakaSomnini bayaliphoqa,

abathokozi ngalo.

₁₁Kodwana ngigcwele ilaka lakaSomnini,

yeke angikghoni ukulibamba.

USomnini uthi:

“Lithululele phezu kwabantwana endledlaneni

naphezu kwesiqhema samasokana,

umfazi nendoda bazakubambeka bobabili,

ngitjho neqhegu kanye nabaluphele khulu.

₁₂“Iinkumba zabo zizakunikelwa abanye,

amasimu kanye nabafazi babo,

ngombana ngizakulula isandla sami

ngokujamelana nabahlali benarha.”

Kutjho uSomnini.

₁₃“Mbala, kusukela kabancani

ukuya kabakhulu babo,

boke banehliziyo ede ngenzuzo;

ukusukela ebaphorofidini

ukuya ebaphristini,

boke benza ikohliso.

₁₄Bahlenga inceba labantu bami

ngokulithatha lula,

bathi ‘Kunokuthula! Kunokuthula!’

khisibe akunakuthula do.

₁₅Bayaqobeka ngombana benza

izinto ezinyenyisako!

Nanyana kunjalo abananhloni nakanye,

abakwazi ngitjho nokutjhalazela lokhu.

Yeke, bazakuwa hlangana nabawileko,

bazakuguqiswa lokha nangisebenza ngabo.”

Kutjho uSomnini.

“Ngathi, ‘Jamani epambanandlela niqale,

buzani ngeendlela zekadeni

ukufunyana bonyana ngiyiphi elungileko,

nikhambe kiyo,

nifumanele imiphefumulwenu ukuphumula.’

Kodwana abantwaba bathi,

‘Abe asizokhamba endleleni yakhona leyo.’

₁₇Ngibeke abalindi phezu kwabo ngathi,

‘Lalelani itjhada lepalapala!’

Kodwana bona bathi, ‘Abe asizokulalela.’

₁₈Ngalokho, lalelani-ke nina zizwe,

yelelani nina mkhambathi

ophakathi kwabo,

₁₉lalela wena narha.

Qalani, sele ngizokuletha ihlekelele

phezu kwabantwaba;

izakuba ziinthelo zamaqhingabo

ngombana azange balalele amezwami

begodu balahle ifundiswami.

₂₀Nginandaba bani netjhwalo leTjheba

namkha umgaba onuka kamnandi

ovela enarheni ekude na?

Imihlabelwenu yokutjhiswa ayamukeleki

neyetjhebiswano ayingijabulisi.”

₂₁Ngalokho nakhu okutjhiwo nguSomnini:

“Qalani, sele ngizokubeka iinliyo

phambi kwabantwaba,

iye, phambi kwaboyise nabantwana ngokufanako,

woke umphakathi uzakubhubha.”

“Qalani, kuza abantu

bavela ngenarheni yetlhagwini,

iye, kuqubuka isizwe esikhulu

emajukujukwini wephasi.

₂₃Sihlome ngomsebe nangomkhonto,

sinesihluku begodu asinasirhawu.

Sizwakala inga lilwandle elibhodlako

nasikhwele phezu kweenjomani zaso,

siza njengamadoda ahlelekele ipi

kobana sikusahlele, wena ndodakazi yeZiyoni.”

₂₄Lokha nasizwa ngemibikwaso

sangenwa mamanzi emadolweni.

Isizi lisibambile,

iye, iinhlungu njengomfazi obelethako

₂₅besathi: “Ningaphumi niye emasimini

namkha nikhambakhambe eendleleni

ngombana isitha sihlome ngesabula,

ukwesaba kusizombe mahlangothi woke.

₂₆Wena Ziyoni, ndodakazi yabantu bami,

vunula iinzilo uzibhudabhude emlotheni,

uzile ngokurhahlawula okuhlaba ehliziyweni

inga ngokomntwana ekukuphela kwakhe,

ngombana msinyana sizokuthelekelwa mrhayili.”

“Ngikubeke njengomhloli

phakathi kwabantu bami,

iye, njengomncibilikisi ukuze wazi

bewuhlole iindlela zabo.

₂₈Boke bamahlubuka akhunyaleleko,

bakhamba bahleba.

Baqine njengekoporo nesimbi,

boke babanga umonakalo.

₂₉Isibhebhedlhisi sibhebhedlhisa ngamandla,

kodwana okuncibilikiswako mthofi kwaphela.

Umncibilikisi uncibilikisela ilize

ngombana abakhohlakeleko abahlungeki.”

₃₀Babizwa bona bamanyela wesiliva,

ngombana uSomnini ubalahlile.