UJOROMIYA 5

₁“Yehlani nenyuke neendledlana zeJerusalema,

niqale ngapha nangapha niyelele,

nifunisise ematatawini wakhona,

nibone bonyana ningafumana umuntu

owenza okufaneleko,

ophikelela ekwethembekeni,

khona-ke ngizakucolela idorobheli.

₂Nanyana abantwabo basithi,

‘Sifunga ngepilo kaSomnini’,

basafunga ngekohliso.”

₃Somnini, wena uqala ukwethembeka!

Wabamadlha, kodwana azange bezwe ubuhlungu,

wabaqeda, kodwana bala ukusolwa.

Benza ubuso babo baqina ukudlula ilitje,

bala ukuphenduka.

₄Ngadlumbana ngathi,

“Abantwaba ziinchaka, badlhayele

ngombana abayazi indlela kaSomnini,

iye, umthetho kaZimabo.

₅Yeke ngizakuya eenkhulwini,

ngikhulumisane nazo,

zona kufuze ziyazi indlela kaSomnini,

iye, umthetho kaZimazo.”

Kodwana nazo zoke njalo

zephula ijogi, zidabula iimbopho.

₆Ngalokho ibhubezi elivela ngehlathini

lizazibhozomela,

ipisi yerhalawumbeni iziqede.

Ingwe izazilalela eduze namadorobhazo,

kobana idabule iinquqwana

nanyana ngubani ophumako

ngombana ukuhlubuka kwazo kukhulu

nokuhlehla kwazo kwandile.

“Kubayini ngifanele ngikucolele,

wena Juda?

Abantwabakho bangilahlile,

bafunga ngozinyana ongekho.

Nasele ngibondlile, bahlobonga;

bazidlhunya ngekumbeni yesitjhatjha.

₈Baziinjomani eziduna ezondlekileko nezindindako,

enye nenye elilela umfazi wenye indoda.

₉Kumele ngingabahlunguphazi ngalokhu na?

Kumele ngingazibuyiseleli

esizweni esinjalo na?”

Kubuza uSomnini.

₁₀“Khuphukelani embundwini,

eendiribeni zakwaJuda

bese niyarhayila;

ningakhawuli ukubhubhisa.

Phulani iingala zeendiribe

ngombana abantwaba abasi ngebakaSomnini.

₁₁Mbala, ikumba ka-Israyeli neyakaJuda,

azange yethembeke nakanye kimi.”

Kutjho uSomnini.

“Angekhe enze litho!

Akunangozi ezasehlela,

angeze sabona isabula namkha indlala.

₁₃Abaphorofidi bazakuba mumoya;

ilizwi lakaZimu alikho kibo.”

Yeke akuthi abakutjhoko kwenzeke phezu kwabo.

₁₄Ngalokho-ke nakhu okutjhiwo nguSomnini uZimu uMninimandlawoke:

“Ngebanga lokobana abantu bakhulume amezwi la,

qala, ngenza amezwami emlonyenakho abe mlilo,

abantwaba babe ziinkuni

baqothulwe mlilo lowo.”

₁₅USomnini uthi:

“Wena kumba ka-Israyeli,

qala, sele ngizokuletha isizwe esivela kude

kobana sijamelane nawe;

iye, isizwe sakade nesizakuhlala sikhona,

okubabantu abanelimi eningalaziko

nabanekulumo eningayizwisisiko.

₁₆Isilanda saso sifana nethuna elivulekileko,

boke bamadoda aziingorho.

₁₇Bazakugoma isivuno kanye nokudla kwenu,

batle amadodana namadodakazenu.

Bazakurhiribidela izimvu, iimbuzi neenkomo zenu;

bagomojele iindiribe kanye namakhiwanenu.

Amadorobhenu anemithangala nenithembele kiwo,

bazawalalisa phasi ngesabula.”

₂₀Bikani lokhu ekumbeni kaJakopo

nibuye nikuzwakalise kwaJuda:

₂₁Lalelani lokhu nina bantu abaziindlhadlha nabanganagqondo,

abantu abanamehlo, kodwana bangaboni,

abaneendlebe, kodwana bangezwa.

₂₂USomnini uthi:

“Aningesabi na?

Anithuthumeli phambi kwami,

mina engibeke itjhwabatjhwaba

yaba mkhawulo welwandle,

isimiso sasafuthi nelingeze laseqa na?

Amagagasi angakhephuzela

kodwana angeze asitjhidisa,

angabhodla kodwana angeze aseqa.

₂₃Kodwana abantwaba

baneenhliziyo eziqinileko nezihlubukako,

baphambukile, banyelela.

₂₄Eenhliziyweni zabo akukho ukuthi,

‘Asesabeni uSomnini uZimethu,

onisa izulu ngesikhathi sakhona,

iye, lesilimela nelesiruthwana;

oqinisekisa ngeemveke ezibekiweko zesivuno.’

₂₅Kodwana amacalenu akuphambukisile lokho

nezono zenu ziniphundise ubuhle.

₂₆Phakathi kwabantu bami kuneenkhohlakali:

Zibadalele njengabantu abacuphe iinyoni,

zibeka isifu, zibambe abantu.

₂₇Njengesiqwebu esigcwele iinyoni,

zinjalo neenkumba zazo

zigcwele ipahla yekohliso.

Ngebangelo ziphenduke iinkhulu neenjinga.

₂₈Iye, zinonile, zinemikhaba, ziyaphumelela!

Ngezenzo zazo ezimbi sezidlulelele!

Azisakhuphi iingwebo:

Indaba yeentandani

nomlandu wabachakileko azisawuyeleli.”

“Alo, kumele ngingabahlunguphazi ngalokhu na?

Ngingazibuyiseleli phezu kwesizwe esinjengalesi na?

₃₀Kunento erarako nethusako

eyenzekako enarheni:

₃₁Abaphorofidi baphorofida ngehloso yamanga,

abaphristi babusa ngegunya labo;

nje-ke abantu bami bathanda khona lokho.

Alo-ke, yini okhunye enizokwenza

emva kwalokhu na?”