Incwadi eya kubathunjwa eBhabheli
1Naka amezwi wencwadi umphorofidi uJoromiya ayithumela aseJerusalema iya kubaphathi abasala ekuthunjweni kanye nakubaphristi, abaphorofidi nabo boke abantu uNebukadinetsari abathatha eJerusalema wabasa ekuthunjweni eBhabheli. 2Wathumela incwadi le ngemva kobana kususwe eJerusalema ikosi uKoniya, indlovukazi neenkhulu zesigodlo, abarholi bakwaJuda nebeJerusalema, abososino kanye nabakhandisimbi, basiwa ekuthunjweni. 3Incwadi leyo yathunyelwa ngo-Elasa umsa kaTjhafani noGemariya umsa kaRhilikhiya abathunywa nguTsedekhiya ikosi yakwaJuda ekosini uNebukadinetsari eBhabheli. Beyifundeka bunjesi:
4Nakhu okutjhiwo nguSomnini uMninimandlawoke, uZimu wakwa-Israyeli kibo boke labo engabathatha eJerusalema ngabasa ekuthunjweni eBhabheli: 5“Yakhani iinkumba nihlale lapho. Tjalani iimvande nigome iinthelo zakhona. 6Thathani abafazi nibelethe amadodana namadodakazi. Thathelani amadodanenu abafazi nendise namadodakazenu ukuze nabo babelethe amadodana namadodakazi. Yandani ngesibalo lapho, ninganciphi. 7Godu funani ihlalohle yedorobho enginise kilo ekuthunjweni. Lithandazeleni kuSomnini ngombana nalinehlalohle, nani nizakuba nehlalohle.” 8Mbala, nakhu okutjhiwo nguSomnini uMninimandlawoke, uZimu wakwa-Israyeli: “Ningavumi ukukhohliswa baphorofidi nezangoma eziphakathi kwenu. Ningalaleli ababhudangi enibakhuthaze kobana babhudange. 9Mamala kwaphela abakuphorofida kini ngebizo lami. Azange ngibathume.” Kutjho uSomnini.
10Nakhu-ke okutjhiwo nguSomnini: “Nasele iBhabheli iqede iminyaka ematjhumi alikhomba, ngizanitjheja ngifeze isithembiso sami somusa, nginibuyisele endaweni le. 11Mbala, mina ngiyawazi amahlelo enginawo ngani.” Kutjho uSomnini. “Amahlelo wehlalohle ingasi wokumbi; iye, amahlelo wokunipha ingomuso nethemba. 12Yeke nizangibiza, nize nizokuthandaza kimi, nje-ke ngizanilalela. 13Naningifunako nizangifumana nakube ningitjhisakalela ngeenhliziyo ezipheleleko. 14Ngizakwenza bona ningifumane.” Kutjho uSomnini. “Ngizakutjhugulula ubujamo benu. 15Nina nithe, ‘USomnini usivusele abaphorofidi eBhabheli,’ 16kodwana nakhu okutjhiwo nguSomnini ngekosi ehlezi esihlalweni sobukhosi bakaDavida kanye nakibo boke abantu abasedorobheneli, abantu bekhenu abangazange bakhambe nani ekuthunjweni, 17iye, uSomnini uMninimandlawoke uthi: Qalani, sele ngizokuthumela isabula, indlala namatshwenyeko hlangana nabo begodu ngizabenza bafane namakhiwani abolileko, asele amambi, angasagomeki. 18Ngizabagijimisa ngesabula, ngendlala nangamatshwenyeko bengibenze babe sisethuso kiyo yoke imibuso yephasi bebabe sithuko nesimanga, iye, into yokurarekelwa neyokurhubutjhwa hlangana nazo zoke izizwe lapha ngizabaqotjhela khona 19ngombana azange balalele amezwami.” Kutjho uSomnini. “Iye, amezwi engibathumele wona ngeenceku zami abaphorofidi imini yoke. Nani bathunjwa azange ningilalele.” Kutjho uSomnini.
20“Ngalokho-ke, yizwani ilizwi lakaSomnini noke nina bathunjwa engibasuse eJerusalema ngabasa eBhabheli.” 21Nakhu okutjhiwo nguSomnini uMninimandlawoke, uZimu wakwa-Israyeli ngo-Arhabi umsa kaKholaya kanye noTsedekhiya umsa kaMaseya, abaphorofida amala kini ngebizo lami: “Qalani, sele ngizobanikela kuNebukadiretsari ikosi yeBhabheli, yena-ke uzababulalela phambi kwamehlwenu. 22Okuzakwenzeka kibo kuzakusetjenziswa njengesithuko ngibo boke abathunjwa bakwaJuda abaseBhabheli. Bazakuthi, ‘Inga uSomnini angakwenza ube njengoTsedekhiya no-Arhabi abakhanzingwa yikosi yeBhabheli emlilweni’ 23ngombana benze ubuhlola kwa-Israyeli bebahlobonga nabafazi babantu bekhabo, bakhuluma amala ebizweni lami ngingakabathumi. Ngimi owaziko nonobufakazi balokho.” Kutjho uSomnini.
Incwadi kaTjhemaya
24Tjela uTjhemaya umNerhelamu lokhu: 25Nakhu okutjhiwo nguSomnini uMninimandlawoke, uZimu wakwa-Israyeli: “Nguwe ogunyaze incwadi ethunyelwe kibo boke abantu abaseJerusalema nakumphristi uZefaniya umsa kaMaseya nakibo boke abaphristi wathi, 26‘NguSomnini ngokwakhe okwenze umphristi esikhundleni somphristi uJehoyada ukuze kube nabatjheji ethempelini lakaSomnini abazokulawula woke umuntu ohlanyako ozenza umphorofidi, bamfake amakhamandela nesirholwani sesimbi. 27Alo, kubayini ungazange ukhalime uJoromiya we-Anatothi ozenza umphorofidi kuwe na? 28Angithi usithumele incwadi eBhabheli wathi: Kuzakuthatha isikhathi eside; nje-ke yakhani iinkumba nihlale kizo; tjalani iimvande nigome iinthelo zakhona.’ ”
29Umphristi uZefaniya wafunda incwadi le eendlebeni zomphorofidi uJoromiya. 30Nje-ke ilizwi lakaSomnini lafika kuJoromiya lathi: 31“Thumela ilizwi kibo boke abathunjwa uthi, ‘Nakhu okutjhiwo nguSomnini mayelana noTjhemaya umNerhelamu: Ngebanga lokobana uTjhemaya uphorofide kuwe, nanyana bengingakamthumi, wakuwunga kobana wethembele emaleni, 32ngalokho, nakhu-ke okutjhiwo nguSomnini: Qalani, sele ngizokuhlunguphaza uTjhemaya umNerhelamu kanye neenzukulwana zakhe. Akazukuba nomuntu omphilelako phakathi kwabantu abaseBhabheli begodu akazukubona ubuhle engizabenzela abantu bami ngombana uhlohlozele bona kuhlubukwe uSomnini.’ ” Kutjho uSomnini.
