UJOROMIYA 24

₁Ngemva kokobana uKoniya umsa kaJehoyakhimu ikosi yakwaJuda kanye neenduna zakhe, abososino nabakhandisimbi bakwaJuda basuswe eJerusalema basiwa ekuthunjweni eBhabheli nguNebukadiretsari ikosi yeBhabheli, uSomnini wangikhombisa iinqwebu ezimbili zamakhiwani ezibekwe ngaphambi kwethempeli lakaSomnini. ₂Isiqwebu esinye gade sinamakhiwani amahle khulu, anjengavuthwa ntange; esinye besinamakhiwani amambi khulu, bekamambi angagomeki.

₃Nje-ke uSomnini wangibuza wathi: “Joromiya, ubonani na?”

Ngathi: “Ngibona amakhiwani. Nakungamahle, mahle khulu, kodwana amambi, mambi khulu, iye, mambi angeze agomeka.”

₄Nje-ke ilizwi lakaSomnini leza kimi godu lathi: ₅“Nakhu okutjhiwo nguSomnini uZimu wakwa-Israyeli, ‘Njengobuhle bamakhiwani la, banjalo kimi nabathunjwa bakwaJuda engibaqotjhileko endaweni le kobana baye enarheni yamaKasidi. ₆Amehlwami azabaqala ngesisa begodu ngizababuyisela enarheni le. Ngizabakha ngingabagirizi, ngizabatjala ngingabasiphuli. ₇Ngizabanikela ihliziyo ukuze bangazi bonyana nginguSomnini. Bazakuba babantu bami, nami ngibe nguZimabo ngombana bazakubuyela kimi ngeenhliziyo zabo zoke.

₈“ ‘Kodwana mayelana namakhiwani amambi angeze agomeka, ngizakwenza njalo ngoTsedekhiya ikosi yakwaJuda, iinduna zakhe kanye nayo yoke iJerusalema, abahlala endaweni le nabahlala enarheni yeGibhide.’ Kutjho uSomnini. ₉Ngizabenza babe sisethuso nento embi kiyo yoke imibuso yephasi, iye, into yokurhubutjhwa nesiga, into yesiphoqo nesithuweleliso kizo zoke iindawo lapha ngibaqotjhela khona. ₁₀Ngizakuthumela isabula, indlala kanye namatshwenyeko phezu kwabo bebarhayilwe enarheni engabanikela yona kanye naboyise.”