UJOROMIYA 10

“Ningafundi iindlela zabezizwe

namkha nibe nevalo ngeenkhanyisi ezisemkayini,

njengombana bezizwe banevalo ngazo.

₃Ngambala imikhuba yezizwe ililize lakolize:

Zigawula isigodo ngehlathini,

usosino asibaze ngezenjana.

₄Zisikghabisa ngesiliva negolide,

zisikokodele ngenondo nangeenkhonkhwani

kobana singapewuki.

₅Abosingazimu bafana nesethuso:

Abakhulumi, bayathwalwa

ngombana abakwazi ukukhamba!

Ningabesabi ngombana abanangozi

begodu akunabuhle ababenzako.”

₆Akakho onjengawe, Somnini;

umkhulu begodu nebizo lakho limamandla.

₇Ngubani ongakwesabiko,

wena Kosi yezizwe na?

Lokhu kukufanele.

Hlangana nabo boke

abazenza iinhlakaniphi ezizweni

nakiyo yoke imibuswabo,

akakho noyedwa onjengawe.

₈Kunento eyodwa abadlhayele

ngayo khulu:

Abamukeli iiyeleliso bona

abosingazimu seziingodo nje kwaphela!

₉Isiliva ekhandiweko ithethwe eTaratjhitjhi

kanye negolide elicolisiweko.

Kumsebenzi kasosino nomncibilikisi!

Ngitjho nanyana kwembathiswa

okuhlaza komkayi nokububende,

koke njalo kwenziwe zizandla zeenhlakani.

₁₀Kodwana uSomnini unguZimu wamambala;

unguZimu ophilako, iKosi yanini nanini.

Lokha nathukutheleko, iphasi liyadengezela;

izizwe azikwazi ukubhesela ilaka lakhe.

“Abosingazimu azange badale izulu nephasi,

ngalokho bazokubhubha ephasinapha

nangaphasi komthunzi welanga.”

₁₂UZimu wenze iphasi ngamandlakhe,

wasekela ilizwe ngokuhlakanipha kwakhe,

wendlala amazulu ngelwazi lakhe.

₁₃Lokha nakhupha ilizwi lakhe,

kuhlokoma amanzi emazulwini;

wenza amafu amhlophe aphume epelazwe.

Uthumela imibani ekhambisana nezulu,

aphephethe ummoya eenlulwini zakhe.

₁₄Woke umuntu usidlhayela begodu akanalwazi;

woke umncibilikisi uhlaziswa bosingazimu bakhe.

Iinthombembunjwa zakhe zimamala,

azinamphefumulo ngaphakathi kwazo.

₁₅Zililize lakolize, ziziinkohliso;

isikhathi sokugwetjwa kwazo nasifikako,

zizakubhubha.

₁₆Kodwana osisabelo sakaJakopo akasinjalo,

ngombana ungumbumbi wakho koke,

ngitjho no-Israyeli, oyikoro engeyakhe.

Ibizo lakhe nguSomnini uMninimandlawoke.

₁₇Butha umthwadlanakho enarheni,

ukhambe uyokuhlala ekuvinjezelweni

₁₈ngombana nakhu okutjhiwo nguSomnini:

“Qalani, kilelihlandla sele ngizokukhupha

abahlala enarheni.

Ngabehlisela ukubandezeleka

ukuze babambeke eJerusalema.”

“Maye mina ngebanga lokulimala kwami!

Inceba lami alelapheki!

Mina ngadlumbana ngathi,

‘Lokhu sekugula nje,

yeke ngizakubhesela.’

₂₀Kodwana itende lami litjhabalalisiwe,

zoke iintambo zalo ziqhusukile.

Abantwabami bangitjhiyile, abasekho;

akusenamuntu ozakujamisa itende lami,

namkha alembelelise amatjhila wami.

₂₁Mbala abelusi badlhayele

ngombana abasabuzi nakuSomnini.

Ngalokho abaphumeleli

nezimvu zabo ziphadlhalele zoke.”

₂₂Lalelani! Kunombiko, sele usifikele!

Kuza umdumo omkhulu ngetlhagwini!

Uzakutjhiya amadorobho wakwaJuda alibhudu

abe madzaba weempungutjha.

₂₃Somnini, ngilemuke

bona umuntu akaziphileli;

akusisemuntwini ukuzikhambela

nokunqophisa amagadangwakhe.

₂₄Nje-ke, Somnini, ngikhalime,

kwaphela kube ngokulunga;

ungangibhubhisi ngetukuthelwakho.

₂₅Thululela itukuthelwakho

phezu kwezizwe ezingakwazisiko,

iye, phezu kweenkoro ezingabizi ibizo lakho

ngombana zirhiribidele uJakopo,

iye, zimrhiribidele zamqeda,

zatjhabalalisa indawakhe.