ABAKHOKHELI 5

₂“Abantu batjhaphulukile godu kwa-Israyeli,

iye, bazinikela ngokuthanda kwabo.

Akudunyiswe uSomnini!

₃Yizwani nina makhosi,

lalelani nani bahlonipheki!

Ngizakubhina kuSomnini,

iye, ngibhinele uSomnini uZimu wakwa-Israyeli.

₄“Maye Somnini, nawusuka eSeyiri,

urhwanta esifundeni sakwa-Edomu,

iphasi lahlengezela,

amazulu awulula izulu,

iye, amafu awulula amanzi.

₅Iintaba zazamazama phambi kwakaSomnini weSinayi,

iye, phambi kwakaSomnini uZimu wakwa-Israyeli.

₆“Emihleni kaTjhamgari umsa ka-Anathi,

emihleni kaJayeli imilandelande yabathengisi beyingekho,

iinkhambi zakhamba ngezimazombe.

₇Uburholi basweleka kwa-Israyeli,

basweleka kufikela wena Dibhora uvela,

iye, wavela waba ngumma kwa-Israyeli.

₈Ngambala, uSomnini wakhetha abarholi abatjha.

“Ngesikhatheso imizi emihlanu beyinganamvikelo,

kwangabonakala ngitjho nemikhonto

hlangana nemindeni ematjhumi amane kwa-Israyeli.

₉“Ihliziywami isebarholini bakwa-Israyeli

abazinikela ngokuthanda kwabo hlangana nabantu.

Dumisani uSomnini ngabo!

₁₀Dembani, nina enikhwele abodumbana abanzotho,

enibakhwele ngesala esifotjhozelako,

nina enikhamba ngendlela.

₁₁Iindaba zokuhlula kwakaSomnini

kumele zibhinwe ngelizwi elikhulu;

iye, ukuhlula koburholi bayo kwa-Israyeli

kube ngaphezu kwetjhada lokukha nokuthulula amanzi!

“Abantu bakaSomnini barhwantela emasangweni!

₁₂Yewuvuke! Vuka Dibhora!

Vuka! Vuka ubhine ingoma!

Sikima Bharakhi msa ka-Abinowamu!

Uthumbe abakuthumbileko!

₁₃Imisalela yabahloniphekileko yarhwantela enzasi,

abantu bakaSomnini barhwanta bamlwela,

bajamelana neengorho.

₁₄Bavela kwa-Efrayimu badabuka kwa-Amalekhi,

balandela wena Bhenjamini nabantu bekhenu;

iinduna zarhwanta zisuka eMakiri,

abasuka kwaZebuloni baphuma baphethe intonga yekoporo.

₁₅Iinkhulu zakwa-Isakari zeza noDibhora,

Iye, bakwa-Isakari basekela uBharakhi,

ngemrhobeni bamlandela eenthendeni.

Hlangana nemindeni yakwaRubeni,

kwaba nokuzibuza okukhulu.

₁₆Kubayini uriyade hlangana neenquthulu

ukuzwa umlozi wokubiza imihlambi na?

Hlangana nemindeni yakwaRubeni,

kwaba nokuzibuza okukhulu kwaphela.

₁₇UGiliyadi wahlala ngaphetjheya kweJordani.

UDani kubayini ahlale nemikhumbi?

U-Atjheri anzinze eligwini lelwandle,

wahlala wazibumba emsebenalo.

₁₈BakwaZebuloni sisizwe esimadelakufa,

bakwaNafitali bangisweso emibundwini yenarha.

₁₉“Amakhosi afika alwa,

iye, amakhosi weKanana alwa eTanaki

emanzini weMegido,

kodwana azange afumane ipango yesiliva.

₂₀Kwalwa iinkwekwezi esibhakabhakeni,

ngemizilazo zalwa noSisera.

₂₁Umlanjana iKhitjhoni wabakhukhula,

iye, umlanjana wekadeni.

Wena mlanjana iKhitjhoni,

gadanga phezu kweentamo zabanamandla!

₂₂Kwaduma izigi zeenqatha zeenjomani ngokugadula,

iye, ukugadula kweenjomani ezinamandla.

₂₃‘Ayinikelelwe iMerozi’, kwatjho isithunywa sakaSomnini,

‘kunikelelwe ngesihluku abahlali bakhona

ngombana azange balwele uSomnini,

lokha nakulwiwa neengorho.’

₂₄“UJayeli akabe ngobusisiweko ebafazini boke,

iye, umfazi kaRhebheri umKheni,

abe ngobusisiweko ebafazini boke abahlala ematendeni.

₂₅USisera wabawa amanzi,

uJayeli wamnikela ibisi,

wamlethela amakghamatha ngomjeka ohloniphekileko.

₂₆Walalamela isikhonkhwani setende,

ngesandla sakhe sesigoma wathatha inondo,

wamadlha uSisera wamphihliza ihloko,

iye, wayihlahlatha, wamphihliza ehlafunyweni.

₂₇USisera wakoropana eenyaweni zakaJayeli,

wabhusuka, wanyefa;

iye, wakoropana eenyaweni zakhe,

wafela lapha anyefele khona.

₂₈“Unina kaSisera wahlola ngentunja,

emlukweni wefesidere wabalabala,

‘Kubayini ikaranakhe iriyade kangaka?

Kubayini kungezwakali izigi zamasondo wekaranakhe?’

₂₉Incekukazakhe engehlakaniphileko yamphendula,

iye, yaphendula imizindlo yehliziywakhe,

₃₀‘Mhlamunye bafumene ipango,

basabelana ngayo;

kube lidini namkha mabili endodeni ngayinye.

Ipango kaSisera okumatjhila wemibalabala,

iye, ipango yamatjhila alukiweko wemibalabala;

amatjhila amabili alukiweko wemibalabala

kube yipango yentamo yami!’

₃₁“Azibhubhe bunjalo zoke izitha zakho, Somnini!

Kodwana abangani bakho bafane nelanga,

lona eliphuma ngamandlalo.”