UJAKOPO 4

₁Izipi nokuphambana kuvelaphi hlangana nani na? Akuveli eenkanukweni zenu ezilwa njalo nani na? ₂Niyafisa kodwana anifumani ilitho; ngalokho niyabulala. Nifuna izinto kodwana anizifikeleli, ngalokho niyararana nilwe. Aninalitho ngombana anibawi. ₃Niyabawa ningaphiwa ngombana nibawa kumbi kobana nithokozise iinkanuko zenu. ₄Nina nhlobongi, anazi bona ukuthanda iphasi kububutha kuZimu na? Ngalokho okhanuka bona abe mngani wephasi, uzenza isitha sakaZimu. ₅Kghani nidlumbana bona kulilize lokho okutjhiwo mtlolo nawuthi “uMoya uZimu ambeke bona ahlale kithi, unesikhwele” na? ₆Kodwana upha umusa ngokweqileko, ngalokho umtlolo uthi: “UZimu ujamelana nabazikhukhumezako, kodwana abazithobako ubapha umusa.”

₇Nje-ke zithobeni kuZimu, nijamelane noSathana, uzanibaleka. ₈Tjhidelani kuZimu naye uzakutjhidela kini. Hlambani izandla zenu nina zoni, nihlambulule iinhliziyo zenu nina beenhliziyo ezimbili. ₉Tshwenyekani, nidabuke, nilile; ukuhleka kwenu akuphenduke isililo nokuthaba kwenu kube kudana. ₁₀Zithobeni phambi kweKosi, yona-ke izaniphakamisa.

₁₁Ningahlebani bazalwana. Loyo ohleba umzalwana namkha amgwebe umzalwana, uhleba umthetho, agwebe umthetho. Nangabe ugweba umthetho, awusuye umenzi womthetho, kodwana umugwebi wawo. ₁₂Munye obetha umthetho, benguye omugwebi onamandla wokusindisa nokurhayila. Kodwana wena ungubani bona ungagweba umfowenu na?

₁₃Lalelani-ke nina enithi: “Namhlanjesi namkha kusasa sizakuya edorobheni leli namkha kileliya, sihlale umnyaka sirhwebe, sifumane inzuzo.” ₁₄Anilazi ikusasa. Alo, kuyini ukuphila kwenu na? Niyikungu evela ibonakale isikhatjhana bese iyanyamalala. ₁₅Yeke, kufuze nithi: “USomnini nakathandako, sizakuphila bese senza lokhu nalokhuya.” ₁₆Kunalokho niyazikhukhumeza ekuzigabaziseni kwenu; koke ukuzigabazisa okunjalo kumbi.

₁₇Okwaziko ukwenza okuhle ahluleke ukukwenza, uyona.