U-ISAYA 66

“Izulu sihlalo sami sobukhosi,

iphasi lisinabelo seenyawo zami.

Alo, yikumba bani-ke enizangakhela yona,

indawami yokuphumula ibe yini?

₂Koke lokhu kwenziwe sisandla sami,

nje-ke zoke izintwezi zenzeka.”

Watjho njalo-ke uSomnini.

“Nokho ngiyelela onje:

umuntu ogandelelweko,

onommoya ozothileko

nowesaba ilizwi lami.

₃Kodwana ongihlabela ikomo

ubulala nomuntu,

owenza umhlabelo ngemvana

wephula nenja intamo,

oletha umnikelo weenthoro

unikela ngeengazi zewotji,

otjhisa isabelo sesikhumbuzo setjhwalo

udumisa nosingazimu!

Kunjalo-nje bazikhethele iindlela zabo

nomphefumulwabo uthokozela iinyenyiso;

₄ngokunjalo nami ngizakukhetha

ukubaphatha kumbi,

ngehlisele ihlekelele phezu kwabo,

ngebanga lokobana nangibizako,

azange kube nophendulako,

nangikhulumako, azange balalele,

kodwana benza ubumbi emehlwenami,

bakhetha lokho engingathokoziko ngakho.”

₅Nina enesaba ilizwi lakaSomnini,

lalelani ilizwi lakhe elithi:

“Abafowenu abanizondako,

baninine ngebanga lebizo lami,

banitshima bathi,

‘USomnini akavele ngephazimulwakhe

ukuze sibone ithabo lenu’,

kodwana ngibo abazakurhubutjhwa.”

₆Yizwani umkhosi wokuhlokoma

ovela ngedorobheni!

Ilizwi elivela ethempelini!

Ilizwi lakaSomnini,

libuyiselela izitha zakhe!

₇“Ngaphambi kobana ibe nemirhele,

iZiyoni yabeletha,

ngaphambi kobana yehlelwe ziinhlungu,

yazala indodana.

₈Ngubani owakhe wezwa into enjalo?

Ngubani owakhe wabona into enjalo?

Inarha ingazalwa ngalanga linye na?

Isizwe singabelethwa ngasikhathi sinye na?

Kuthe bona iZiyoni ibe nemirhele,

yazala amadodanayo.

₉Ngizakutjhideza bonyana kuzalwe,

kodwana ngingakuzalisi na?”

Watjho njalo uSomnini.

“Mina engenza bonyana kuzale,

ngingavala isibeletho na?”

Watjho njalo uZimakho, Ziyoni.

₁₀Jekezelani neJerusalema, nilithabele

noke nina enilithandako,

lithokoziseni khulu

noke nina enilila nalo,

₁₁kobana nimunye nizikholise

emabelenalo adunduzelako,

nokobana nincance nizanelise

emabelenalo agcweleko.

₁₂Ngambala, nakhu okutjhiwo nguSomnini:

“Qalani, sele ngizokuvula ukuthula

kugelezele eJerusalema njengomlambo

nomnono wezizwe njengomlanjana ophuphumako,

nimunye benisingathwe edinini lalo,

nidunduzelwe emathangenalo.

₁₃Njengomntwana odunduzelwa ngunina,

ngokunjalo ngizanidunduzela,

nizakudunduzelwa eJerusalema.

₁₄Nizakubona nehliziywenu ithokoze

amathambenu ahlume njengotjani.”

Kuzakwaziwa bonyana isandla sakaSomnini

sineenceku zakhe

nokobana itukuthelwakhe ijamelene nezitha zakhe.

₁₅Qalani, uSomnini uzakuza ngomlilo

neenkarana zakhe zepi njengesiwuruwuru,

ukuze abuyise itukuthelwakhe ngokuvutha

nokukhalima kwakhe ngamalangabi womlilo.

₁₆Ngambala, uSomnini uzokukhupha isigwebo ngomlilo

nangesabulakhe phezu kwayo yoke inyama;

labo ababulewe nguSomnini bazakuba banengi.

₁₇USomnini uthi:

“Labo abazicwengisa bebazihlambulule

kobana baye eemvandeni,

balandelana nophakathi kwabo,

bagome inyama yewotji,

iinyenyiso kanye nabongozo,

bazakubhubha ndawonye

₁₈ngombana mina ngiyayazi

imisebenzabo nemizindlwabo.”