U-ISAYA 50

“Iphi incwadi kanyoko yesahlukaniso

engamthokoza ngayo na?

Kunomuntu engimkolodako

engikuthengise kuye na?

Awa, qalani, nathengiswa ngebanga lamacalenu

begodu nonyoko waqotjhwa

ngebanga leemphambeko zenu.

₂Kubayini ngingafumani umuntu nangibuyako?

Kubayini kungekho ophendulako nangibizako?

Kghani umkhonwami mfitjhani khulu

bona ungahlenga na?

Kghani anginamandla wokusindisa na?

Qalani, ngokukhalima kwami ngomisa ilwandle,

ngenza imilambo ibe libhudu.

Iinhlambi zakhona zibola ngokutlhoga amanzi,

zife ngokoma.

₃Ngembathisa isibhakabhaka ngobumnyama,

ngenze iinzilo zibe sigubuzeso saso.”

₄USomnini uSomandla unginikele ilimu labafundi

kobana ngikghone ukukhuluma kuhle nodiniweko.

Usungula amezwi wesiphorofido;

imihla ngemihla ekuseni uvula indlebami

kobana ngilalele njengabafundi.

₅Iye, uSomnini uSomandla uvula indlebami,

yeke mina-ke angidazi ikani

begodu angihlehli.

₆Ngibhesela labo abangidulako,

ngibanikela umhlathi abancuthula itjebami,

angisithezi ubuso nabangithuka bebangikhafulele.

₇Kwamambala, uSomnini uSomandla uyangisiza,

ngalokho angihlaziseki.

Nje-ke ngiqinise ubuso bami njengomankwana.

Ngiyazi bonyana angeze ngadaniswa

₈ngombana ongihlambululako useduze.

Alo-ke, ngubani ongangimangalela na?

Asivele sobabili ebandla!

Ngubani ophikisana nami na?

Akavele etjhatjhalazini!

₉Qalani, uSomnini uSomandla uyangisiza.

Ngubani ongangilahla ngomlandu na?

Mbala, boke bazakubhabhuka njengesambatho

umvunya ubathuthudlhe.

₁₀Ngubani phakathi kwenu owesaba uSomnini

alalele ilizwi lencekwakhe,

ozilungiselele ukukhamba ebumnyameni,

kunganamkhanyo;

nokho athembele ebizweni lakaSomnini

abe adzimelele kuZimakhe na?

₁₁Qalani, nina noke eniphemba imililo,

nizihlomise ngemisubela evuthako,

uSomnini uthi:

“Khambani emkhanyweni womlilwenu,

phakathi kwemisubela eniyilumathisileko.

Nakhu enizakufumana esandleni sami:

Nizakurabhalala phasi nisebuhlungwini.”