U-ISAYA 5

₁Angivume ingoma esikhundleni somnganami,

iye, ingoma yomnganami ngesidiribe sakhe.

Umnganami gade anesidiribe

embundwini onothileko.

₂Wawemba, wasusa woke amatje kiwo,

wawutjala isidiribe esikhethekileko.

Wakha isithala somlindi phakathi kwawo

bewagobhodlha ubutlhodlhelo edwaleni.

Walindela bona sihlome amadiribe

kodwana sahloma amunyu wommango.

₃Nje-ke uSomnini uthi:

“Nina zakhamuzi zeJerusalema

nani bantu bakwaJuda,

gwebani hlangana nami nesidiribe sami.

₄Yini-ke, okhunye ebengingakwenza

ngesidiribe sami

ukudlula lokho esele ngikwenzileko na?

Kubayini ngithi

lokha nangilindele bona sihlome amadiribe,

sona sihlome amunyu na?

₅Nje-ke, ngizonitjela

bona ngizokwenzani ngesidiribe samesi:

Ngizokususa isibiyelo saso bona sidliwe;

ngigirize nomthangalaso bona sirathwe.

₆Ngizosenza bona sibe libhudu,

singasahlungwa namkha sihlawulelwe,

kukhule iminga nameva;

ngizokuyala namafu

bona angasanisi izulu phezu kwaso.”

₇Isidiribe sakaSomnini uMninimandlawoke

siyindlu ka-Israyeli,

nabantu bakwaJuda basitjalo sakhe esikhethekileko.

Walindela ubulungiswa,

kodwana qala, kwaba kukwephulwa komthetho

walindela ukulunga,

kodwana qala, kwaba sililo sesizi.

₈Nizazizwa nina enithumba izindlu ngezindlu,

niphange isimu phezu kwamasimu

bekungasabi nendawo eseleko,

kusale nina nodwa phakathi nenarha.

₉Ngimzwile uSomnini uMninimandlawoke afunga athi:

“Ngiqinisile izindlu ezinengi zizokuphenduka amarubhi,

kuthi ezikulu nezihle zisale zinganabantu.

₁₀Mbala, emasimini alitjhumi wesidiribe

kuzakuphuma imigqomu emibili yewayini kwaphela

nembewini engangentundu eyodwa kadumbana

kuphume upumpana wamabele kwaphela.”

₁₁Bazazizwa labo abavuka ngamasa,

bagelagele ngemva kotjwala;

bahlale bekube sebusuku,

bafuthunyezwe liwayini.

₁₂Eminyanyenabo kukhona imihlobohlobo yamaharibha,

abosotjherere, iinghwani kanye newayini;

kodwana izenzo zakaSomnini abaziyeleli

nemisebenzi yezandla zakhe abayitjheji.

₁₃Ngalokho abantu bami bazakuthunjwa

ngebanga lokutlhoga ilwazi lakaSomnini.

Abahloniphekako babo bazokufa yindlala

neenqubuthu zabo zizakuphaphatheka kukoma.

₁₄Iye, indawo yabafileko

seyikhamise umlomayo

beyawukhebelelisa ngokunganeliko.

Abahloniphekako neenqubuthu zeJerusalema,

labo abenza itjhada lokuzikhakhazisa,

bazakwehlela kiyo.

₁₅Ngaleyondlela abantu bazakuthotjiswa,

omunye nomunye wabo arhubutjhwe,

iye, amehlo wabazikhakhazisako athotjiswe.

₁₆Kodwana uSomnini uMninimandlawoke

uzakuphakanyiswa ngomthethwakhe,

uZimu ocwengileko azibonakalise

ngokulunga kwakhe.

₁₇Iimvana zizakudla emadlelwenazo,

izimvu ezinonisiweko zizidlele umathanda

hlangana namarubhi.

₁₈Bazazizwa labo abazidosela isibetho

ngemitja yekohliso

nesono njengomuntu odosa ikoloyana ngentambo;

₁₉iye, labo abathi: “UZimu akarhabe,

enze umsebenzakhe masinyana

bona siwubone;

ilisu loCwengileko wakwa-Israyeli alivele,

ukuze nathi silazi.”

₂₀Bazazizwa labo abathi ukonakala kulunga,

ukulunga kukonakala,

abenza ukukhanya inga bumnyama,

ubumnyama inga kukhanya,

ukubaba inga bumnandi,

ubumnandi inga kubaba.

₂₁Bazazizwa labo abahlakaniphileko emehlwenabo

nabazibona banokwazi ekuboneni kwabo.

₂₂Bazazizwa labo abaziingwenya

zokusela iwayini

neenkutani zokudidiyela utjwala,

₂₃labo abatjhaphulula onomlandu ngokufunjathiswa

bagodle ilungelo labalungileko.

₂₄Ngebangelo-ke,

njengamalangabi womlilo naqothula amawunguwungu

nanjengotjani obomileko nabubabulwa malangabi,

ngokunjalo imirabhabo izakukhuna

namakhwa wabo aphephuke njengethuli;

ngombana badele umthetho kaSomnini uMinimandlawoke

banyaza amezwi woCwengileko wakwa-Israyeli.

₂₅Nje-ke, ubukhali bakaSomnini buyavutha

ebantwini bakhe;

uzakuphakamisa isandla sakhe abarhadle phasi,

bekuhlengezele iintaba.

Iindumbu zabo zizakufana neenzibi eendledlaneni.

Nangaphezu kwakho koke lokhu

ubukhali bakhe abuzukusuka,

isandla sakhe sizakuhlala siphakamile:

₂₆Uzakuphakamisela izizwe ezikude iphawu,

abethe ipembe, abize isizwe esisepelazwe,

size masinyana nangokurhaba.

₂₇Akakho namunye kiso

odinwako namkha okhutjwako,

akakho oyendako namkha alale;

akunabhande elitjhaphulukako edinini

nepatlagwana elinomtjana odabukako.

₂₈Imisubela yaso ibukhali nemisebaso yoke iqutjhiwe,

iinqatha zeenjomani zaso zikghwara njengelitje lomlilo,

amavili weenkaranyana zaso afana nesivunguvungu.

₂₉Umdumaso unjengokubhodla kwebhubezi,

sirora njengamabhubezana,

sirhonga bese sibamba inyamazana,

siyithwale kusweleke nomenyeli.

₃₀Mhlokho sizakurora ngaphezu kwayo

njengokubhodla kwelwandle.

Lokha umuntu naqala enarheni

abone ubumnyama namatlhuwo;

ukukhanya kuzakuphiphazwa mamafu.