U-ISAYA 48

₁Indlu kaJakopo ayilalele lokhu,

iye, labo ababizwa ngebizo laka-Israyeli,

labo abadabuka emthonjeni kaJuda,

abafunga ngebizo lakaSomnini,

abazikhakhazisa ngoZimu ka-Israyeli,

kodwana ingasi ngeqiniso nangokulunga;

₂iye, labo abazibiza ngedorobho elicwengileko

abazesame kuZimu ka-Israyeli,

ibizo lakhe elinguSomnini uMninimandlawoke.

₃USomnini wathi:

“Ngamemezela ekadeni izinto zaphambilini,

zaphuma emlonyenami, ngazenza zaziwa.

Msinyana ngazenza, zenzeka

₄ngombana bengazi bonyana ukhunyalele khulu,

wena Jakopo;

imisipha yentamakho iyisimbi

nepandlakho iyikoporo.

₅Nje-ke izintwezi ngazimemezela ekadeni,

ngazenza zaziwa kuwe zingakaveli

ukuze ungeze wathi,

‘Awa, izintwezi zenziwe bosingazimu bami,

iye, zenzeke ngomyalo wesithombesibazwa sami.’

₆Wezwa ngazo,

nje-ke qala, zoke nanzi!

Alo, awuzimemezeli na?”

“Kusukela gadesi, ngizakwazisa izinto ezitja,

ezifihlakeleko nongazaziko.

₇Zizinto ezidalwe gadesi,

ingasi phambilini.

Ngaphambi kwanamhlanje

azange uzwe ngazo

ukuze ungeze watjho uthi,

‘Emanyeni, ngizazi kwakade.’

₈Azange bewuzwe nanyana wazi;

iye, kwekadeni iindlebe zakho bezivaliwe

ngombana bengazi

bona awethembeki nakancani

begodu bewubizwa bona umumoni

kusukela ekubelethweni kwakho.

₉Ngebanga lebizo lami

ngiriyadisa ilaka lami;

ngebanga ledumo lami

ngiyazibamba ngenca yakho

ukuze ngingakutjhabalalisi.

₁₀Qala, ngikuhlungile,

kodwana ingasi njengesiliva;

ngakuzizinya eziko lamatshwenyeko.

₁₁Ngebanga lami,

iye, ngebanga lami ngiyakwenza lokhu

ngombana ibizo lami lisilaphaziwe.

Angizukunikela nanyana ngubani idumo lami.”

₁₂“Ngilalela wena Jakopo,

wena Israyeli engakubizako:

Nginguye enginguye;

ngingowokuthoma newokugcina.

₁₃Sisandla samesi esabeka iinsekelo zephasi,

isidla sami saqhisa amazulu;

nje-ke lokha nangibizako,

koke kuyarurhuluka.

₁₄Nina ma-Israyeli,

buthanani ndawonye noke, nilalele:

Ngongumuphi phakathi kwabosingazimu

owamemezela amezwi alandelako na?

‘USomnini ukhethe umuntu lo

bona azokwenza okufunwa nguZimu

phezu kweBhabheli

nengalwakhe izakujamelana namaKasidi.’

₁₅Ngimi mina lo okhulumileko nombizileko;

ngimlethile begodu uzakuphumelela endlelenakhe.

₁₆Tjhidelani kimi, nilalele lokhu:

Kusukela ekuthomeni

azange ngikhulumele ngemsitheleni;

kikho koke okwenzekako bengikhona.”

Nje-ke, uSomnini onguSomandla ungithumile

kanye noMoyakhe.

₁₇Nakhu okutjhiwo nguSomnini,

umhlengi, oCwengileko ka-Israyeli uthi:

“Mina Somnini nginguZimakho okufundisako

ukuze kukukhambele kuhle

lokha nangikuhlahlako endleleni

ekufanele uyikhambe.

₁₈Maye! Nabe ungayelela imiyalwami,

ukuphumelela kwakho bekuzakuba njengomlambo

nokulunga kwakho njengamagagasi welwandle.

₁₉Iinzukulwana zakho bezizakuba njengetjhwabatjhwaba,

iye, imbewu yedini lakho ibe njengeenthoro zamabele.

Amabizwazo angesulwa

begodu angatjhabalaliswa phambi kwami.

₂₀Phumani eBhabheli,

nibaleke amaKasidi!

Memezelani indaba nasi ngethabo, niyizwakalise,

iye, ayisabalale nepelazwe nithi,

‘USomnini uhlenge incekwakhe uJakopo.

₂₁Azange bome eendaweni ezomileko

lapha uSomnini abahlahla khona;

wabapha amanzi agelezako avela edwaleni;

iye, waphadlhula idwala amanzi agobhoza.’ ”

“Akuzukuba nokuthula eenkhohlakalini.”