U-ISAYA 34

₁Tjhidelani nina zizwe, nizwe,

lalelani nina bantu!

Iphasi loke alizwe, nakho koke okukilo,

inarha, nakho koke okumila kiyo.

₂USomnini uthukuthelele izizwe zoke,

ufuthekele loke ibutho lazo

uzithuwelelisile, wazinikela ekuhlatjweni.

₃Ababuleweko bazo bazakulahlwa,

nesivunda seendumbu zabo sizakusabalala,

iintaba zithonte iingazi zabo.

₄Woke umkhambathi womkayi uzakuncithika

nesibhakabhaka sisongwe njengomsongo.

Iye, woke umkhambathi wakhona uzakukokorana,

njengekari elitjhwaba esidiribeni,

namkha isithelo esikhuna emkhiwaneni.

₅USomnini wathi:

“Isabulami nayibonakala esibhakabhakeni,

qala, izakwehlela phezu kwaka-Edomu,

iye, phezu kwabantu

engibabekele isigwebo sokubhujiswa.”

₆USomnini unesabula ekghamathele umhlwehlwe;

iye, iphopha iingazi zeemvana,

zeembuzi nezamaqama

ngombana uSomnini wenze umhlabelo eBotsira,

kwaba kuhlaba okukhulu enarheni yakwa-Edomu.

₇Iinyathi zizakuwa nazo

neenkunzi zizakuwa kanye nezinamandla.

Inarha yama-Edomu izakugeleza iingazi

nequlwanayo ivundiswe ngomhlwehlwe.

₈USomnini unelanga lokusibona umlandu,

iye, umnyaka wokubuyiselela endabeni yeZiyoni.

₉Imilanjana yakwa-Edomu izakuba sikontiri,

iqulwani yakhona ibe sibabuli;

iye, nenarha ibe sikontiri esivuthako.

₁₀Asizukucima ubusuku nemini,

intuthwaso izakhuphuka mndundu.

Iinzukulwana ngeenzukulwana

inarha leyo izakuba libhudu;

akunamuntu ozakudabula kiyo nini nanini.

₁₁Izakuba lilifa lemihlobohlobo yeenrhulurhulu

namagubulu ahlale kiyo.

USomnini uzakwelula phezu kwe-Edomu,

intambo yesilinganiso sehlangahlangano,

namatje wesibekiso sokubhujiswa.

₁₂Nakubabusi be-Edomu,

akunalitho labo elizakusala lapho

abangalibiza bona mbuso;

iinkhulu zakhona zizakupheliswa.

₁₃Ameva azakumila eensikeni zayo,

ikhula nemitjhatjhana kuzakumumela iimphephelo.

Izakuba lidzaba labophagana

nobudlelo beenciliba.

₁₄Iimpaka zizakuhlangana neempisi

neembandana ezisambuzi zizakubetha umkhulungwana.

Imimoya emimbi yobusuku izigedle lapho,

ifunyane indawo yokuzipholela.

₁₅Lapho umhlobo wenyoka

uzakuba nesikhundla, uzalele;

amadzinyanawo aqoqosele emthunzinawo.

Ngambala lapho kuzakubuthana abokholo,

kube ngiloyo naloyo anomnganyanakhe.

₁₇USomnini nguye oziphosele ifumbe,

isandla sakhe sazabela ngentambo yesilinganiso,

nje-ke zizakuhlala ziyizuzile nini nanini,

iinzukulwana ngeenzukulwana zizakuhlala kiyo.)