U-ISAYA 32

₁Qala, kuzakubusa ikosi ngokulunga

namakhosana aphathe ngefanelo.

₂Omunye nomunye wabo

uzakuba njengobuphephelo emmoyeni

nesiviko esiwuruwurwini;

iye, njengomlambo endaweni eyomileko

nomthunzi wedwala elikhulu

enarheni edambileko.

₃Yeke amehlo wababonako angeze avalwe

neendlebe zabezwako zizakulalela.

₄Imikhumbulo yabanganangqondo

izakuba nokugweba okulungileko

namalimu wabangunguzako

azakukhuluma butjhelelezi.

₅Isidlhadlha angeze sabizwa ngokuthi sihloniphekile,

nomgulukudu angeze wathathwa njengonesithunzi

₆ngombana isidlhadlha sikhuluma ubudlhadlha

nomkhumbulwaso usopha okumbi:

Sizijayeze ukungasabi uZimu,

sikhuluma ngokuhlambalaza uSomnini,

sidime olambileko ukudla,

sibulalise owomileko ngomrhawu.

₇Indlela yomgulukudu ikukhohlakala:

Uhlela amaqhinga wokonakala

ukuze ubhubhise abachakileko ngamanga

ngitjho nanyana isibawo sodududu sifanelekile.

₈Kodwana ohloniphekileko

uhlela okuhloniphekileko,

adzimelele ezenzweni zokuhlonipheka.

₉Nina bafazi abazigedlileko,

sikimani nilalele ilizwi lami;

madodakazi azethembako,

lalelani ikulumami!

₁₀Ngaphezudlwana komnyaka,

nina enizethembako nizakuthuthumela

ngombana isivuno samadiribe sizakutshwila,

isivuno seenthelo asizukuba khona.

₁₁Hlengezelani nina bafazi abazigedlileko,

yesabani nina enizethembako;

hlubulani izambatho zangaphandle

nembathe iinzilo emadininenu!

₁₂Thwalani imikhono ehloko

ngebanga lamasimu akarisako

neendiribe ezithelako,

₁₃iye, ngebanga lamasimu wabantu bami,

embeswe mameva nomonyani,

nangazo zoke iinkumba zokujabula

ngedorobheni eliphithizelako.

₁₄Isigodlo sizakulahlwa,

idorobho eliyaluzelako litjhiywe,

i-Ofeli nesithala sabalindi,

zizakuba mrhula kuya kuyile,

ithabo labodumbana bommango

namadlelo wemihlambi.

₁₅Kuzakuba njalo

kufikela lapha ummoya ovela phezulu

uthelwa khona kithi

bese ibhudu liba yisimu enothileko,

iye, isimu yeenthelo ibonakale seyinjengehlathi.

₁₆Ubulungiswa buzakuhlala ebhudwini,

ukulunga kunamathele esimini enothileko.

₁₇Iinthelo zokulunga zizakuletha ukuthula,

iye, umphumela wokulunga

ube kuzotha nokuvikeleka nini nanini.

₁₈Abantu bami bazakuhlala endaweni ethulileko,

ngeenkumbeni ezivikelekileko

neendaweni zokuphumula ezizothileko.

₁₉Kodwana ihlathi lezitha lizakurhadlwa sinanja,

bese idorobho lazo liyadanjiswa.

₂₀Nibusisiwe nina enitjale

magegana nayo yoke imilanjana,

iye, nina enitjhaphulula ikomo nodumbana.