U-ISAYA 3

₁Qalani, uSomandla onguSomnini uMninimandlawoke

sewuzokususa eJerusalema nakwaJuda

okwabiwako nokudzinyelelwe kikho;

iye, koke okwabiwako kokudla

nakho koke kwamanzi:

₂itsitsirimba nejoni,

umgwebi nomphorofidi,

isangoma nomphathi,

₃induna yamatjhumi amahlanu kanye nesikhulu,

umeluleki nosoziga ongumakadebona

kanye nosomlingo onobuhlakani.

“Ngizakwenza abesana babe makhosanabo

neenhlanganahloko zizakubusa phezu kwabo.

₅Abantu bazakugandelelana:

umuntu ajamelane nomuntu,

iye, umuntu ajamelane nomnganakhe.

Ilutjha lizakuvukela abadala,

abangazisiko bavukele abahlonitjhwa.

₆Umuntu uzakugugudlhela umfowabo

endlini kayise athi,

‘Wena unephuraphura, yiba mbusethu,

lawula nanti iqubi lamawiliwili!’

₇Kodwana mhlokho yena uzakurhuwelela athi,

‘Anginapengu!

Ngiswele ngitjho ukudla nezambatho endlinami;

yeke, musani ukungenza umbusi wabantu.’

₈“Mbala, iJerusalema ikhutjiwe,

uJuda uwile.

Ngamezwi nangezenzo bahlanuke uSomnini,

badelela nobukhona bephazimulwakhe.

₉Ukukhetha kwabo ubuso ebandla

kufakaza ngabo;

njengeSodoma banegugu ngesono sabo

abe abafihli.

Bazazizwa ngombana bazehlisele ihlekelele!

₁₀“Babusisiwe abalungileko

ngombana kuzabakhambela kuhle.

Mbala, bazakudla iinthelo zezenzo zabo.

₁₁Bazazizwa abakhohlakeleko

ngombana kuzabakhambela kumbi.

Mbala, bazakubethwa ngeentonga zabo!

₁₂Abantu bami bagandelelwa bahlanguli

abomatjhonisa babusa phezu kwabo.

Bantu bami, abarholi benu babadukisi:

Baphambanisa imizilenu.”

₁₃USomnini selazilungiselele umlandu,

selebe asikimile bona agwebe isizwe.

₁₄USomnini ugweba abaphathi

nabarholi babantu bakhe,

uthi: “Ngini enidle isidiribe sami;

okwetjiwe kwabachakileko kuseendlini zenu.

₁₅Nenzelelani bona nitshidlhe abantu bami

nokobana nifihlize ubuso babachakileko na?”

Watjho njalo uSomandla onguSomnini uMninimandlawoke.

₁₆USomnini uthi:

“Ngebanga lokuzitjhaya kwamadodakazi weZiyoni

akhamba elule iintamezi,

aphayiza amehlo,

akhambela phezulu,

kuzwakala nobutjharhatjharha eenyaweni,

₁₇uSomandla uzokuhluthula iiyaya eenhloko zawo;

iye, uSomnini uzokwenza iimpandla zawo

zibe semtarini.

₁₈Mhlokho uSomandla uzowemuka imikghabiso:

amatshega, amatikana, abonongoro,

₁₉amancina, abosotjherere, iiyaya,

₂₀iindugu, abonomathalazana,

amacutjana, imithambothi, amagolida,

₂₁iindzilamnwana ezinetshwayo,

amasali wepumulo,

₂₂iindanda, iimphika,

iimvunulo, iinkhwama zokuphathwa,

₂₃izambatho ezikhanyelako,

izambatho zangaphakathi,

iindugu nemitshurhwana.

₂₄Esikhundleni seenthako kuzakuba nesivunda;

esikhundleni sekhiba kube mtletlana;

esikhundleni somphotho kube liphandla;

esikhundleni seengungu zethabo kube ziinzilo

nesikhundleni sobuhle kube litshwayo lobukhoboka.

₂₅“Wena Ziyoni,

amadoda akuwe azakubulawa ngesabula,

iintsitsirimba zakho zifele epini.

₂₆Amasango weZiyoni azakulila abibitheke;

libe dududu, lihlale phasi ehlabathini.”