U-ISAYA 28

₁Maye ngesihlohlo sokuziphakamisa

kweendakwa zakwa-Efrayimu!

Umkghabiso wedumo laka-Efrayimu lowo

osesiqongweni sombundu womrhoba onothileko,

ufana nethuthumbo elibunako

eliseenhloko zababhedlhwa liwayini!

₂Qalani, uSomandla unaloyo onamandla noqinileko.

Loyo-ke ufana nokuwuluka kwelifu elinesinanja,

ihlekelele yesiwuruwuru.

Iye, unjengokuwuluka kwelifu lamanzi

akhukhula koke,

ulalisa koke phasi.

₃Isihlohlo sokuziphakamisa kweendakwa zakwa-Efrayimu

sizakugadangwa ngeenyawo.

₄Umkghabiso wedumo laka-Efrayimu,

osesiqongolweni sombundu womrhoba onothileko,

ofana nethuthumbo elibunako,

uzakuba njengekhiwani lokuthoma elivuthwe ihlobo lingakangeni,

nanyana ngubani olibonako,

uyalikha alidlele khonapho.

₅Mhlokho uSomnini uMninimandlawoke

uzakuba sihlohlo sedumo,

umbhode wokuhloba kumisalela yabantu bakhe

₆nommoya wokulunga kiloyo osebandla

kanye namandla kabaqotjha ipi esangweni.

₇Laba nabo bayerayeriswa liwayini,

batherezeliswa marhugu,

iye, umphristi nomphorofidi bayerayeriswa marhugu

ngebanga lewayini bayahlangahlangana,

ngebanga lamarhugu bayatherezela;

nabayerayera njalo baba nemibono,

bayathazele nabakhupha iingwebo.

₈Woke amatafula agcwele ngamahlanzo anyenyisako,

akunandawo ehlanzekileko.

₉Bathi:

“Ulinga ukufundisa ubani ilwazi,

njekhona uhlathululela ubani umlayezo?

Kghani labo abalunyulwe ekumunyeni,

abakhunyulwe ebeleni na?

₁₀Ngombana umrhali lo uthi,

‘Tsavu latsavu, tsavu latsavu,

khavu lakhavu, khavu lakhavu!

Libinzana lapha nebinzana laphaya!’ ”

₁₁Ngambala ngeembhena ezingunguzako,

nangelimu elitjhili,

uZimu uzakhuluma nabantwabo,

₁₂yena owathi kibo:

“Lokhu kuphumula.

Phumuzani abadiniweko

ngombana lobu buledlhelo.”

Kodwana bala ukulalela!

₁₃Ngalokho ilizwi lakaSomnini kibo lizakuba ngilokhu:

“Tsavu latsavu, tsavu latsavu,

khavu lakhavu, khavu lakhavu!

Libinzana lapha nebinzana laphaya!”

Umphumela walokho kuzakuba

kukobana bakhambe, badede sinyava, bephuke;

iye, ngokubambeka esifwini bazakutjhotjholozwa.

₁₄Yeke, lalelani ilizwi lakaSomnini nina nyefuli,

iye, nina enibusa abantwaba eJerusalema!

₁₅Ngambala nithe:

“Senze isivumelwano nokufa,

iye, isibopho nendawo yabafileko:

Lokha isiwuruwuru esinamandla nasidlulako

asizukuza kithi,

ngombana senze amanga ubuphephelo bethu,

sabhaca ngekohliso.”

₁₆Ngalokho nakhu okutjhiwo nguSomnini uSomandla:

“Qala, nginguloyo obeke ilitje lesisekelo eZiyoni,

iye, ilitje elizizinyiweko,

ilitje eliqakathekileko lejika elinzinzileko.

Onethemba akasoze atatazela.”

₁₇Ngizakwenza ubulungiswa bube silinganiso,

nokulunga kube sinqophisamakho.

Isinanja sizakumadlha isiphephelo samala

namanzi awulukele phezu kobusithelo.

₁₈Yeke isivumelwano sakho nokufa zakupheliswa,

isibopho sakho nendawo yabafileko asizukujama;

lokha isiwuruwuru esinamandla nasidlulako,

nizakuba yinto yaso yokugadangwa.

₁₉Njalo ekuseni nasidlulako, sizaniphephula,

sizakuvunguza ubusuku nemini ngamalanga.

Kwesabeka khulu nakuzwakala umlayezo othi:

₂₀Umbhede mfitjhani khulu,

kobana ningathabalala kiwo,

nengubo yincani khulu,

kobana ningazembesa ngayo.

₂₁USomnini uzakuvela njengentabeni yePeratsimu,

avuthe ngetukuthelo njengemrhobeni weGibeyoni,

kobana enze izenzo zakhe.

Kodwana izenzo zakhe zizakumangalisa!

Iye, uzakuvela kobana enze umsebenzakhe,

kodwana umsebenzakhe awukajayeleki!

₂₂Yeke, masani ukunyefula;

nakungasinjalo amakhamandelenu azakuqiniswa.

Mbala, ngizwe umyalo

ovela kuSomandla onguSomnini uMninimandlawoke

begodu unzinzile:

Inarha izakubhujiswa ngokupheleleko!

₂₃Lalelani, nizwe ilizwi lami,

yelelani, nizwe ikulumami.

₂₄Ingabe umlimi uhlala alimela ukutjala na?

Ingabe uhlala abhedula

abe aphadlhe amagade wesimakhe na?

₂₅Lokha nasele aleleze isimu,

urhatjha imihlobohlobo yekumini

atjale ikoroyi, inyaluthi nebhali endaweni efaneleko

kanye nomunye umhlobo wamabele ngemaqadi.

₂₆UZimakhe uyamyala

amfundise okufaneleko.

₂₇Ikumini ayibhulwa ngesileyi sokubhula

nanyana kugedwe ikarana yamavili phezu kwayo.

Awa, imihlobohlobo yekumini

ibhulwa ngesibhulo namkha ngesigodo.

₂₈Iinthoro zokwenza isikwa ziyasilwa,

kodwana akahlali azibhula.

Ukhambisa iinjomani nekarana phezu kwazo

kodwana azisilisiswa.

₂₉Lokhu nakho kuvela kuSomnini uMninimandlawoke,

unezeluleko ezimangalisako

begodu unikela ipumelelo ekulu.