U-ISAYA 26

“Sinedorobho eliqinileko;

UZimu ujamisa isindiso,

ibe mithangala neendunduma zakhona.

₂Vulani amasango

ukuze kungene isizwe esilungileko,

iye, isizwe esilonda ukukholwa

₃nesinehliziyo ebambeleleko.

Wena Zimu, uzakulonda ukuthula,

iye, kunokuthula nawethenjwako.

₄Thembela kuSomnini ngeenkhathi zoke

ngombana uSomnini,

iye, uSomnini ulidwala lanini nanini.

₅Mbala, umadlha phasi abahlala ekuphakameni,

ugiriza idorobho elingangenekiko,

iye, aliwisele ehlabathini,

aligirizele ethulini.

₆Iinyawo ziyaligidizela,

iinyawo zabachakileko,

amagadango wabadududu.”

₇Indlela yabalungileko ilelezekile,

Somnini wenza umzilabo unqophe.

₈Ngitjho nekugwebeni kwakho, Somnini,

sisaqalelela kuwe;

ukululukela komphefumulwethu,

kukuzwa ibizo lakho nokulongwa kwakho.

₉Ebusuku umphefumulwami uyakulangazelela,

ngitjho nommoyami ngaphakathi uyakufunisisa.

Lokha iingwebo zakho nazisephasini,

abahlali belizwe bafunda okulungileko;

₁₀kodwana iinkhohlakali naziphiwa umusa

azifundi nakancani okulungileko.

Nanyana zisenarheni yobuqotho,

ziragela phambili ngobukhohlakali;

azinandaba nobukhosi bakaSomnini.

₁₁Somnini, isandla sakho siphakanyisiwe

nanyana kunjalo zona azisiboni.

Kodwana zizakubona itjisakalwakho ngabantu bakho,

bese ziba neenhloni,

iye, umlilo obekelwe izitha zakho uzaziqothula.

₁₂Somnini, yewusenzele ukuthula

ngombana koke esikuzuzileko,

sikwenzelwe nguwe.

₁₃Somnini, Zimethu,

sakhe sabuswa ngamanye amakhosi ngaphandle kwakho,

kodwana libizo lakho kwaphela esilidumisako.

₁₄Sele afile kwanjesi akasoze asaphila,

imimoyawo angeze yabuya iphile godu.

Mbala, uwahlunguphazile, wawatjhabalalisa;

wenza bona angasakhunjulwa.

₁₅Wena Somnini wandise isizwe sakho,

iye, wandise abantu bakho.

Uzizuzele idumo,

wanabisa yoke imikhawulo yenarha.

₁₆Somnini, eensizini zabo bafune ubuso bakho,

bazethula kuwe ngemithandazwabo,

lokha ubukhali bakho nabuphezu kwabo.

₁₇Njengomfazi osidisi osele azokubeletha

azibinyabinya, aliliswa ziinhlabi

besinjalo-ke nathi ngenca yakho, Somnini.

₁₈Besisidisi, sizibinyabinya

kodwana sibelethe ummoya.

Sibhalelwe kuletha isindiso enarheni,

abahlali belizwe basithelekela.

₁₉Abafileko bakho bazakuphila,

iye, abafileko bekhethu bazakuvuka.

Phaphamani nihlokome nina enihlala ethulini!

Mbala, umbethe wakho ungowezulwini;

Zimu, uzakubhubhisa indawo yabafileko.

₂₀Yenize bantu bami, ningene ngemalawinenu,

nivale iminyango nasele ningenile,

zifihleni kwesikhatjhana,

bekudlule ilaka lakaZimu.

₂₁Qalani, uSomnini sele azokuphuma endawenakhe,

kobana ahlunguphaze abahlali bephasi

ngebanga lezono zabo.

Iphasi lizakwembula iingazi ezithululwe kilo,

angeze lisabafihla ababuleweko balo.