U-ISAYA 15

Ngambala ngobusuku bokurhayilwa

i-Ari-Mowabi beyibhujisiwe!

Ngambala ngobusuku bokurhayilwa

neKhiri-Mowabi beyibhujisiwe!

₂Ngalokho iDibhoni ikhuphukele ethempelini,

iye, eendundumeni yayokurhahlawula;

uMowabi ulilela iNebo neMedeba.

Zoke iinhloko zigudiwe,

kwasuswa zoke iindevu.

₃Eendledlaneni abantu bembatha iinzilo;

bakhuphukela emaphahleni weenkumba nematatawini,

godu woke umuntu wehla alila.

₄IRhetjhibhoni ne-Eliyale ziyarhuwelela,

amezwazo azwakala ukufikela eJahatsi.

Ngalokho amadoda ahlomileko wakwaMowabi

ahlaba umkhosi imiphimbawo beyarhotjhoza.

₅Ihliziywami irhuwelela ngoMowabi,

abaphalali bakhe babalekela eTsowari

ne-Egilathi-Tjhelitjhiya.

Mbala, emkhuphukeni weLurhithi

benyuka barhahlawula;

iye, nendleleni eya eRhoronayimu,

bazwakalisa isililo sokurhayilwa

₆ngombana amanzi weNimrimu omile,

utjani butjhwabile, ihlaza liyatjhabalala,

iye, akusenalitho elihlaza elisaseleko.

₇Ngalokho umnono abawuzuzileko,

nalokho abakubutheleleko,

bakuthethe bakhamba nakho

ngaphetjheya komlanjana wemidubi.

₈Mbala, kuhlatjwe umkhosi

enarheni yakwaMowabi;

ukurhahlawulokho kufikelele e-Egilayimu

bekwafikelela neBheri-Elimu.

“Nanyana amanzi weDibhoni azele ngeengazi nje,

ngiyatjho ngizakwehlisela phezu kweDibhoni ngokudluleleko:

amabhubezi kilabo abaphunyurhileko beMowabi,

iye, kilabo abamisalela yenarha.”