U-ISAYA 13

₂Phakamiselani iphawu phezu

kwentatjana esipuna,

nibarhuwelele ngelizwi elikhulu,

nibakhwebe bona bangene

emasangweni weenkhulu.

₃Mina ngokwami ngiyale ibutho lami elicwengileko,

ngabiza iingorho zami

kobana zifeze ilaka lami,

iye, lezo ezijabula ngobukhosi bami.

₄Kunetjhada eentabeni,

kwanga ngelesiqubuthu sabantu!

Imibuso yephasi ihlokoma ngomkhosi,

iye, izizwe zibuthene ndawonye!

USomnini uSomandla uhlele ibutho

kobana lilwe!

₅Livela enarheni ekude,

emaphethelweni wesibhakabhaka.

USomnini uza neenkhali zetukuthelwakhe,

kobana abhubhise ilizwe loke.

₆Rhahlawulani ngombana ilanga lakaSomnini litjhidele;

likubhubhisa okuvela koSabekako.

₇Yeke zoke izandla zizakunyefa

nehliziyo enye nenye yobhubhako

iphele amandla.

₈Abantu bazakukhungatheka,

bembathwe ziinhlungu neenhlabi

njengomfazi onemirhelo;

baqalane ngokukakamala,

ubuso babo buphaphatheke.

₉Qalani, ilanga lakaSomnini litjhidele ngelunya,

ngobukhali nangelaka elivuthako

kobana lenze inarha ibe ligagadu;

iye, libhubhise izoni zayo kiyo.

₁₀Iinkwekwezi zesibhakabhaka,

ngitjho nezesiRuthwana nemithala yazo

azizukukhupha umkhanywazo;

ilanga lizakufiphala lisaphuma

nenyezi ingavezi umkhanywayo.

₁₁Ngizakuhlunguphaza iphasi ngobumbi balo

nabakhohlakeleko ngamacalabo.

Ngizakuphelisa ukuzitjhaya kweendeleli,

ngithobise ukuzigqaja kweenrhonga.

₁₂Ngizakwenza bonyana obhubhako

abe yivelakancani kunegolidembala,

iye, kunegolide le-Ofiri.

₁₃Ngizakusikinya amazulu

ukuze iphasi lihlengezele

litjhide ebunzinzweni balo.

Lokhu kuzakwenzeka

ngetukuthelo kaSomnini uMninimandlawoke

elangeni lelaka lakhe elivuthako.

₁₄Njengetsephe ethusiweko

nanjengezimvu ezinganambuthi,

ngiloyo naloyo uzakuphendukela ebantwini bekhabo,

omunye nomunye abalekele enarheni yekhabo.

₁₅Boke abafunyanwako bazakuhlatjwa ngesabula,

iye, boke abathunjiweko babulawe ngesikhali.

₁₆Amasana wabo azakuphihlizelwa ehlabathini

phambi kwamehlwabo baqalile;

iinkumba zabo ziphangwe,

abafazi babo bagagadlhelwe.

₁₇Qalani, ngibavusele amaMede,

anganamsebenzi nesiliva,

nangathatjiswa ligolide.

₁₈Imisebawo izokubulala amasokana,

akazukuba nezwelo phezu kwesithelo sesibeletho;

amehlwawo akazukurhawukela abantwana.

₁₉NakuyiBhabheli, igugu lemibuso,

ubuphaziphazi bedumo lamaKasidi,

izakuba njengamadorobho weSodoma neGomora

ngelanga uZimu awaketula ngalo.

₂₀Ayisoze beyisaba nezakhamuzi,

iye, ingasahlalwa, iinzukulwana ngeenzukulwana.

Ama-Arabhu akasoze ahloma amatendawo

nabelusi angeze balalisa imihlambabo lapho.

₂₁Abothurhu berhalawumba bazakulala lapho

neenkumba zayo zizale iindalwa ezitlewulako;

lapho, kuzakuhlala iinciliba,

kweqayeqe iimbandana ezisambuzi.

₂₂Iimpisi zizakubetha umule

emibhotjhongweni yeBhabheli

nabophagana eengodlweni zemikhuba.

Isikhathi seBhabheli sitjhidele,

amalangayo angekhe elulwe.