UHOSIYA 5

₁“Lalelani lapha nina baphristi!

Yelelani nina baphathi bakwa-Israyeli!

Ulalele wena Sigodlo!

Isigwebo ngesenu:

Nibe sisifu eMitsipha,

Naba sigolanede eThabhori:

₂nibe mlindi ozikileko eSitimu.

Kodwana ngizonikhalimela noke.

₃Ngazi koke ngo-Efrayimu;

u-Israyeli akakafihleki phambi kwami.

Ngebanga lokobana wena Efrayimu,

sewuphendukele ebungwadleni,

u-Israyeli wonakele.”

Kutjho uSomnini.

₄Izenzo zabo azibavumeli ukubuyela kuZimabo.

Abamazi uSomnini

ngebanga lommoya wobungwadla ophakathi kwabo.

₅Ukuzikhukhumeza kuka-Israyeli kujamelene naye.

Ama-Israyeli ngitjho no-Efrayimu bararejwa zizono zabo;

uJuda unyandanye nabo:

₆Lokha nabatlhetlha nezimvu nomhlambi wabo

bathi bafuna uSomnini, abazomfunyana

ngombana uSomnini uzihlukanisile nabo.

₇Abathembeki phambi kwakaSomnini,

babeletha amavezandlebe.

Nje-ke, uSomnini uzobatjhabalalisa ngenyanga eyodwa nje;

kuzabe kungasenalitho emasiminabo.

₈Vuthelani ipalapala eGibiya!

Nivuthele iporompita eRama!

Hlabani umkhosi eBhethe-Aveni!

UBhenjamini useenthendeni zakho Efrayimu.

₉Nje-ke uzokutjhabalaliswa ngelanga lokubuyiswa.

Ngikhuluma into ekhona

hlangana neenkoro zakwa-Israyeli.

“Ababusi bakwaJuda batjhidisa iinkhonkhwani.

Ngizabadlhuwelela ngobukhali bami

njengeenrhurhula zamanzi.

₁₁U-Efrayimu utjhaphile ngokweqa umyalo

ngombana uhlalele ukulandela amanyela.

₁₂Mina nginjengepehli ku-Efrayimu,

njengesidliso endlini kaJuda.

₁₃Lokha u-Efrayimu nakezwa ukugula kwakhe,

noJuda nakabona inceba lakhe,

yeke u-Efrayimu waphendukela e-Asiriya,

wabawa isizo ekosini ekulu.

Kodwana abe ayinamandla wokunelapha,

nokunipholisa emancebenenu.

₁₄Ngambala mina nginjengengwenyama ku-Efrayimu,

nginjengengwenyama enamandla endlini kaJuda.

Mina ngiyarathurathula bengikhambe;

ngidudula kutlhogeke nomenyeli.

₁₅Yeke ngizakubuyela endawenami

ngilinde bebavume umlandwabo.

Bazakufuna ubuso bami;

esizini labo bazangifuna bebangifunisise.”