UHOSIYA 2

₁Yithini kubafowenu “Bantu bami”, kibodadwenu nithi “Thandiwe”.

₂“Mangalelani unyoko, nimmangalele

ngombana akasese mkami, nami angisese myenakhe!

Ubangakameli ukuba namehlo amanengi nokuqoqoma.

₃Nakungasinjalo bekumele ngimhlubulise

abe bhunubhunu njengamhlana abelethwako.

Bengizamenza abe njengerhalawumba,

athunye njengebhudu,

ngimbulalise ngokoma.

₄Bengingazukuba nesirhawu ebantwaneni bakhe

ngombana babantwana bokonakala.

₅Unina wathuwelela ngobungwadla,

wabamitha ngehlazo.

Nje-ke umfazi lo wathi:

‘Ngizakulandela iinthandwa zami

ezingipha ukudla kwami namanzami,

zingembathise ngezoboya nelineni,

zingiphe namagugwami’.

₆Yeke ngaqeda ngokuthi:

Ngizakubiyela isivande samesi ngomunga

nangomthangala wamatje.

Nangenza njalo amaqhingakhe azakufelela:

₇Iinthandwa zakhe azilandelelako zingameyami,

azifune angazifunyani.

Khona-ke uzakuqaquluka athi:

‘Awa-yeke, angibuyele kusobentwana

ngombana bekangiphethe kuhle.’

₈Khonapho umfazi lo akhange avume

bonyana ngimi omondla ngamabele,

ngewayini nangamafutha we-oliva.

Bengamtotosa ngemali enengi nangegolide

(abalisebenzisa ukubumba isithombe sakaBhali).

₉Nje-ke, ngiseqhingeni lokobana ikoroyi newayini

abaseze ayifunyana kimi nakuvunwako le,

ngimdime kwanjesi.

Nezambatho zoboya nezelineni ebengimupha zonezi,

ngizamemuka akhambe bhunubhunu.”

₁₀“Nje-ke ngizomhlubulisa phambi kweenthandwa zakhezo,

abe atlhoge nomenyeli.

₁₁Ngizakuphelisa koke ukuzithabisa kwakhe:

kweminyaka, kweenyanga nekwamalanga.

Iye, ngiphelise yoke iminyanyakhe.

₁₂Ngizakutjhabalalisa isidiribe namakhiwanakhe

athe ngawo:

‘Yikokhelo iinthandwa zami ezingikhokhela ngayo.’

Ngenze isimakhe ifukufuku

bese idliwa ziimbandana zommango.

₁₃Ngizamhlawulisela amalanga

agade atjhisela ngawo aboBhali itjhwalo:

Amalanga azimomonda ngawo ngobuphaziphazi,

walandelana neenthandwa zakhe.

Kodwana mina wangikhohlwa.”

Kutjho uSomnini.

₁₄“Nakanjani ngizamsomasoma,

ngimdosele erhalawumbeni,

ngikhulume naye kuhle.

₁₅Ukusuka lapho ngizambuyisela isidiribe sakhe,

ngenze nomrhoba we-Akori isango lethemba.

Lapho-ke uzangilalela njengalokha nasesemutjha,

njengamhlana aphuma eGibhide.”

“Mhlokho uzangibiza uthi ‘babakwami’;

ungasathi ‘Bhalami’.

₁₇Ngizamkhafulisa amabizo waboBhali emlonyenakhe,

angabe asawabiza.

₁₈“Mhlokho ngizakwenzela u-Israyeli isivumelwano

neembandana zommango, neenyoni zezulu,

neenrhurhubi zephasi.

Ngizakwephula imisubela neensabula,

neenhlabano zoke zepi enarheni,

ukuze nibe nokuphumula nokuthula.

₁₉“Ngizakuthatha ube mkami isikhathi soke.

Ngikuthathe ube mkami ngikusize, ngikuvikele;

ngithembeke bengikurhawukele

kube sisipho sami kuwe.

₂₀Ngikuthathe ube mkami weenkomo,

ube netjhebiswano noSomnini.”

“Mhlokho ngizakuphendula;

Ngiphendule izulu,

izulu liphendule iphasi.

₂₂Iphasi liphendule ikoroyi,

isidiribe namafutha we-oliva;

zona-ke zizakuphendula uJizriyela.

₂₃Ngizazitjalela yena enarheni.

Ngirhawukele uLo-Rurhama,

ngithi kuLo-Ami ‘Bantu bami’,

bese bona bathi ‘Zimethu’.”