UHOSIYA 13

₁Bekuthi lokha u-Efrayimu nakhulumako

amadoda atatazele;

gade ahlonitjhwa tle kwa-Israyeli.

Wazenzela umlandu ngokulotjha uBhali, wafa.

₂Khonapho abantu bathuwelela ngokona:

Bazenzela iinthombe,

abosingazimu ababazwe ngesiliva labo

okumsebenzi nje owenziwe sithakgha!

Ngeenthombezi bathi:

“Abantu abenza umhlabelo

bamele bancwange amathole la.”

₃Yeke bazakufana nekungu yamasa,

bafane nombethe wekuseni othintithekako;

babe njengomkhwani ophephuka eselelweni,

nanjengentuthu ephutjheza entunjeni.

“NginguSomnini uZimakho kusukela

emihleni yeGibhide.

Akhange wazane nomunye uzimu ngaphandle kwami

begodu azange kube nomunye umsindisi

ngaphandle kwami.

₅Ngakwelusa nawuserhalawumbeni,

enarheni yesomiso.

₆Kwathi lokha nabafika emadlelweni,

badla bebatatamala iziswanezi.

Kuthe nasele zitatamele njalo, bazikhukhumeza;

kungebangelo bangikhohlwa.

₇Nje-ke ngaba njengengwenyama kibo,

ngabalalela endleleni njengengwe.

₈Ngizabathelekela njengonomrhaso owemukwe abantwabakhe:

Ngibatlhatlhamulule iimfutjanezi.

Ngizabarhiribidela njengengwenyama;

iimpisi zizabarathurathula.

₉Ukubhubha kwakho, wena Israyeli,

kungebanga lami;

mina msizakho.

₁₀Iphi ikosakho-ke nje,

izakukusindisa kiwo woke amadorobhakho na?

₁₁Ngininikela ikosi ngisilingekile,

ngibuye ngiyisuse ngobukhali bami.”

“Umlandu waka-Efrayimu ubulungiwe,

izono zakhe zitloliwe.

₁₃Nakufika iinhlabi zokubeletha,

u-Efrayimu uba mntwana odlhayeleko:

Nakufika isikhathi uyarhodobala,

angaphumi esibelethweni!

₁₄Ngimsindise emandleni wethuna na?

Ngimhlenge ekufeni?

Kufa ndina, aphi amanikelelakho?

Thuna ndina, kuphi ukubhubhisa kwakho?

Angeze ngamrhawukela.

₁₅Nje-ke akazukuwadla amabele nabafowabo.”

Ummoya wepumalanga ovela kuSomnini, uzakufika,

uvuke erhalawumbeni;

isiyalu saka-Efrayimu sizakuvaleka

nomthombakhe wome kere.

Ummoya lowo uzakuhlakaza woke amagugwakhe.

₁₆ISamariya izazithwalela umlandwayo

ngombana ihlubuke uZimayo.

Abantu bazakubulawa ngesabula;

abantwababo bazakuphihlizelwa ehlabathini,

besifazana babo abasebantwini batlhatlhamululwe!