UHOSIYA 12

₁“U-Efrayimu uzondla ngommoya,

udlhemadlhema ngemva kommoya wepumalanga

imini yoke.

Ngamangakazakhe amanengi uzibangela ukubhujiswa:

Wenza isikhozi ne-Asiriya,

khibe ngapha ukhungana neGibhide

ngamafutha we-oliva.”

₂USomnini umangalela uJuda;

uzokuhlunguphaza uJakopo ukuya ngeendlela zakhe,

ambethe ngeentonga zakhe.

₃Nasesemanzi uJakopo wabamba isithende

sakamfowabo;

nasele aqinile wabindana noZimu.

₄Wabinda ingilozi bewayihlula.

Walila, warabhela uSomnini.

Nje-ke iinzukulwana zakhe zithi:

“EBhethele uSomnini uzosihlangabeza,

abuyelele iinthembiso zakhe nakithi

₅ngombana uSomnini unguZimu uMninimandlawoke,

okulibizo lakhe uSomnini adume ngalo.”

₆Awa Israyeli,

kuzakufanela bonyana ubuyele kuZimakho:

Thembeka ubulunge imiyalwakhe;

uthembele kuZimakho ngeenkhathi zoke.

₇U-Efrayimu unjengomthengisi osebenzisa

isilinganiso samanga,

uthanda tle ukudlelezela.

₈Kodwana u-Efrayimu uzibetha isifuba uthi:

“Nginjinge tle;

umnotho lo, ngizifunyanele wona mina.

Ngomnothwami ongaka lo,

abe akunamuntu ongafunyana isiphosiso

esingako inga sisono.”

“NginguSomnini uZimakho kusukela emihleni

yeGibhide;

kodwana ngizakukwenza ubuyele ematendeni godu

njengerhalawumbeni.

₁₀“Ngakhuluma nabaphorofidi,

ngabanikela imibono eminengi

bengakhuluma imifanekiso ngabo.”

₁₁BakwaGiliyadi nabo gade banjingile,

kodwana babhujiswa!

Abantu benza imihlabelo yeenkunzi eGiligali,

nokho akhange kusize litho:

ama-aldarabo aba njengesiqotjana samatje

magegana nesimu.

₁₂UJakopo wabalekela enarheni ye-Aramu,

u-Israyeli wasebenza nzima nazakuthatha umfazi;

wamlobola ngokwelusa izimvu.

₁₃USomnini wasebenzisa umphorofidi

ukukhupha u-Israyeli eGibhide,

iye, wabahlenga ngomphorofidi.

₁₄U-Efrayimu uqhukuluze uSomnini okusilingako;

iKosakhe-ke izamthwesa umlandu

beyimhlawulise ngokuyirhubutjha kwakhe.