AMAHEBHERU 9

₁Nje-ke nesivumelwano sokuthoma besinemithetjhwana obekulotjhwa ngayo ngendaweni ecwengileko. ₂Kwakhiwa itende lokuhlanganela; ngaphakathi kwendawo yalo yokuthoma bekunelithi leembani, itafula nezikwa ezibekwa phambi kwakaZimu, leyo bekuyindawo ecwenge khulu. ₃Ngemva kwerharideni lesibili bekukhona indawo okuthiwa yindawo ecwenge khulu. ₄Ngaphakathi kwayo bekukhona i-aldari legolide lokutjhisela itjhwalo nomfaji wesivumelwano otshidzwe woke ngegolide. Ngaphakathi kwawo bekubulungwe umjeka ophethe imana, intonga ka-Aroni eyakhe yahluma amakari nomqebethu wesivumelwano. ₅Ngaphezu komfaji bekunamakerubhi wephazimulo engamele isihlalo somusa. Okwanje asikwazi ukukhuluma ngokugcweleko ngezintwezi.

₆Ngokunjalo, lokha koke sele kuhlelekile ngendlela le, abaphristi bangena njalonjalo ngengcenyeni yokuthoma yetende lokuhlanganela bona benze umsebenzabo wokulotjha. ₇Kodwana engcenyeni yesibili kungena kwaphela umphristi omkhulu kanye ngomnyaka; akangeni ngaphandle kokuthatha iingazi anikela ngazo mayelana naye nangenca yezono ezenziwe babantu ngephoso. ₈Ngalokhu uMoya oCwengileko utjengisa bona indlela yokungena endaweni ecwenge khulu ayikavuleki, mlunga ingcenye yokuthoma yetende isajamile. ₉Lokho kumfanekiso wesikhathesi, ekutjengiswa ngakho bona iminikelo nemihlabelo enikelweko azange iphelelise isazelo somlotjhi. ₁₀Kodwana beyiphathelene nokudla nokusela kanye nemihlobohlobo yokuhlambuluka ekuziimiso ezimalungana nomzimba bekube sikhathi sehlelo elitjha.

₁₁UKrestu selafikile njengomphristi omkhulu wezinto ezihle esele zikhona, wangena ngetendeni elikhulu neliphelele ukudlula, elingakenziwa ngezandla okutjho elingasilo lalokhu okudaliweko. ₁₂Wangena kwaba kanye kwaphela endaweni ecwenge khulu, kungasi ngeengazi zeembuzi namathole, kodwana ngeengazi zakhe ngokwazo wasizuzela ukuhlengwa okungapheliko. ₁₃Iingazi zeembuzi nezeenkomo kanye nokufafazwa ngomlotha wethokazi elitjhisiweko kuhlambulula labo abasilaphazweko ukuze babe ngabahlwengileko ngokomzimba. ₁₄Khulu kangangani-ke iingazi zakaKrestu owazinikela ngokwakhe kuZimu ngoMoya oCwengileko wesiphelani anganamphambo, zizakuhlanza isazelo sethu emisebenzini efileko ukuze silotjhe uZimu ophilako.

₁₅Ngalokho uKrestu umlamuleli wesivumelwano esitjha ukuze kuthi labo ababiziweko bamukele isithembiso selifa elingapheliko. Nje-ke ukufa kwakhe kwenzeke ukuze abahlenge eemphambekweni zesivumelwano sokuthoma.

₁₆Lapha kunencwadi yelifa, kufanele kube khona ubufakazi bokufa kwaloyo owayitlolako ₁₇ngombana incwadi yelifa isebenza kwaphela nasele kubhujiwe ngebanga lokobana ayisebenzi nakube loyo owayitlolako usaphila. ₁₈Kungalokho nesivumelwano sokuthoma singazange sajanyiswa kungakaphalazwa iingazi. ₁₉UMosi sele amemezele woke umyalo womthetho ebantwini boke, wathatha iingazi zamathole neembuzi, amanzi, uboya obububende nehisopi wafafaza umsongo wencwadi ngokwawo nabantu boke, ₂₀asithi: “Qalani, lezi ziingazi zesivumelwano uZimu anijamisele sona.” ₂₁Ngokunjalo uMosi wafafaza iingazi etendeni lokuhlanganela nakizo zoke izinto ezisetjenziswa kilo. ₂₂Ukuya ngokomthetho pheze zoke izinto zihlanjululwa ngeengazi, ngaphandle kokuphalaka kweengazi akukho ukulitjalelwa kwezono.

₂₃Ngokunjalo bekufanele bona imifanekiso yezinto zezulwini ihlanjululwe ngalokho. Kodwana izinto zezulwini zifuna imihlabelo engcono kunaleya ₂₄ngombana uKrestu azange angene endaweni ecwengileko eyakhiwe ngezandla zabantu emfanekiso nje waleyo ekungiyo, kodwana wangena ezulwini ngokwalo, khona azasijamela phambi kwakaZimu. ₂₅Yena azange azinikele kanenginengi njengomphristi omkhulu lokha nakangena endaweni ecwengileko iminyaka ngeminyaka neengazi ezingasizo zakhe. ₂₆Ngathana bekunjalo bekufanele ahlupheke kanenginengi kusukela ekusekelweni kwephasi. Kodwana ubonakaliswe kanye kwaphela ekupheleni kwesikhathi bona asuse izono ngokuzinikela kwakhe. ₂₇Njengombana kujanyisiwe bona abantu bafe kanye, emva kwalokho kube kugwetjwa, ₂₈nje-ke noKrestu sele anikelwe kanye kobana athwale izono zabanengi, uzakubuye abonakale kwesibili, angakezi bonyana uzokuthwala isono kodwana ukusindisa labo abamlindeleko.