URHABAKHUKHU 3

₂Somnini, ngizwile ngedumo lakho.

Somnini, izenzo zakho zibonakele.

Yewuzivuselele neminyakeni le,

zenze zaziwe eenkhathini zethwezi.

Kodwana ube nomusa nakuvuka irawurawu.

₃UZimu uvele ngeTemana;

Ocwengileko uvele ngentabeni iParana.

Iphazimulwakhe igubuzesa amazulu;

ubuphaziphazi bakhe buzele iphasi.

₄Ukumanyazela kwakhe kunjengokuphuma kwelanga;

imisubela iphazima esandleni sakhe.

Lapha kufihlakele khona amandlakhe.

₅Izifo zikhamba phambi kwakhe,

ukufa kumlandele.

₆Wajama phezu kwephasi ladengezela,

warhedlula, izizwe zarurhuluka.

Ngendlelakhe wakhamba phezu kwephasi,

iintaba zanini nanini zagirika

neentatjana zeminyaka zarhunyela.

₇Eenyaweni zakhe ngabona amandla:

EKhutjhana kwavunguza amatende,

kwaMidiyani kwaphembetha imitjhabo.

₈Awu Somnini, begade usilingekele imilambo na?

Ilaka lakho belijamelene nemilambo?

Gade usilingwe lilwandle na?

Ngambala, ukhwele iinjomani zakho

neenkarana zakho zokuhlula.

₉Ulungisa umsebe wakho,

ubiza imisubela eminengi.

Uphadlhula umhlaba, kuvele imilambo.

₁₀Iintaba nazikubonako ziyathuthumela;

kuvela iinrhurhula zamanzi;

kubhodla amanzi ekuzikeni,

athwele amagobhoza.

₁₁Ilanga nenyanga zabuyela endawenazo,

ngokuphazima kwemisubela yakho egijimako

nangokumanyazela komkhontwakho ophazimako.

₁₂Wasilingeka wapitliza iphasi,

wabibhelana wabhula izizwe.

₁₃Weza wazokusindisa abantu bakho,

wazokusindisa umzeswakho.

Warhayila iphahla lesigodlo sobukhohlakali,

waphihliza isigodlo bekwaba sesisekelweni.

₁₄Wahlaba umrholi ngomkhontwakhe,

lokha iinkhulu zakhe nazisithelekelako

bona zisiphadlhalaje.

Inyazo lazo laba lilize:

Zoke zaphepha zazifihla.

₁₅Wagadangela iinjomani zakhe ngelwandle,

emanzini amanengi abhodlako.

₁₆Nangizwa lokho, amathumbami adlhabhaza,

iimbhena zomlomami zahlengezela ngetjhadelo,

umzimbami wakoropana,

amadolwami ageba.

Ngarhawuka ngebanga lelanga lamatlhuwo,

ngebanga lezehlo ezizokwehlela abasahleli.

₁₇Nanyana umuthi wamakhiwani ungatlhurhi,

kutlhogeka namadiribe esidiribeni;

nanyana isivuno se-oliva singahlomi

kutlhogeka nokudla emasimini;

nanyana kunganazimvu ngesibayeni

kutlhogeka neenkomo ngesibayeni;

₁₈nokho mina ngizakuthaba kuSomnini,

ngizakuthokoza kuZimu uMsindisami.

₁₉USomnini uSomandla umamandlami;

wenza iinyawo zami zibe njengezehlangu,

ungenza ngikghone ukweqela imibundu.