UGENESISI 49

₂“Buthanani nilalele madodana kaJakopo;

lalelani uyihlo u-Israyeli.

₃“Rubeni, ulizibulo lami, umamandlami,

umphumela wokuthoma wobudoda bami.

Ngawe ngasasa, ngaqina amandla.

₄Kodwana njengamanzi anyamalalako,

nawe angeze waba neenzukulwana,

ngombana wangena emalalweni kayihlo,

wasilaphaza umbhedami.

₅“USimiyoni noLevi zizelamani

iinsabula zabo ziinhlabano zenturhu.

₆Angingangeni ebandleni labo,

ngingabi mdibi munye nabo,

ngombana ngetukuthelwabo babulala abantu,

ngokuhlosa baqunta imisipha yemilenze yeenkomo.

₇Akunikelelwe ukuthukuthela kwabo ngombana kubhamba,

nobukhali babo ngombana buyavutha!

Ngiyabaphadlhalaja kwaJakopo,

ngibahlakaze kwa-Israyeli.

₈“Wena Juda, abafowenu bayakubuka,

isandla sakho siphezu kwentamo yezitha zakho,

amadodana kayihlo ayakukhothamela.

₉UJuda umntwana webhubezi,

indodanami ifana nebhubezi elisuthiko:

Liyakhothama lizigedagede phasi,

akakho ongalinga ukulivusa!

₁₀Intonga yobukhosi angeze yasuka kuJuda,

nentonga yombusi hlangana neenyawo zakhe,

bekulethwe isibiko kuye,

nezizwe zoke zitjengise ukumlalela.

₁₁Ubophela udumbanakhe esidiribeni,

udumbanyanakhe epandeni ekhethekileko,

ahlanze isambatho sakhe ewayinini,

iphuraphurakhe eengazini zamadiribe.

₁₂Amehlwakhe amnyama kunewayini,

amazinywakhe amhlophe kunebisi.

₁₃“UZebuloni uzakuphila ngegwini lelwandle,

abe njengesebe leenthayamanzi;

imikhawulwakhe inabele ngeTsidoni.

₁₄“U-Isakari uyikakha kadumbana,

ubhesa hlangana nemithwalo.

₁₅Lokha nakabona ubuhle bendawo yokuphumula,

nobuhle benarha,

wehlisa ihlombe lakhe bonyana athwale

abe likhoboka lomsebenzi okatelelako.

₁₆“UDani umela amalungelo wabantu bekhabo

angomunye wesizwe sakwa-Israyeli.

₁₇UDani uyinyoka esendleleni,

ulirabi elisemzileni,

eliluma iinthende zenjomani

umkhweli wakhona abe aketuke.

₁₈“Mina ngiqale isindiswakho Somnini.

₁₉“UGadi usahlelwa siqhema semigulukudu,

kodwana yena ugijimisa isiqhemeso.

₂₀“Ku-Atjheri kunokudla okunothileko,

uphakela iinkhanakhana ezilungele ikosi.

₂₁“UNafitali umumuthi onabileko,

oveza iimpande ezihle.

₂₂“UJosefa usidiribe esithelako,

isidiribe esithelako esiseduze nomthombo,

esineempande ezirarela umthangala.

₂₃Abadumuzi ngomsebe bayamtlhorholoja,

bayamsahlela ngombana banevunda naye.

₂₄Kodwana umsebakhe uhlala uqinile,

umkhonwakhe nezandla zakhe zimsinya,

ngombana usizwa ngongonamandla kaJakopo,

usizwa ngumelusi olidwala laka-Israyeli,

₂₅iye, usizwa nguSabekako onguZimu kayihlo.

UZimu uyakwenyela abe akubusise

ngeembusiso zamazulu aphezulu,

iimbusiso zamanzi azikileko

neembusiso zamabele nesibeletho.

₂₆Iimbusiso zakaZimu uyihlo zikulu

kuneembusiso zeentaba zekadeni,

kunezinto ongazifisa emibundwini yekadeni.

Inga zoke iimbusiswezi zingaba phezu kwehloko kaJosefa,

phezu kwepandla yekosana yabafowabo.

₂₇“UBhenjamini uyipisi evithizako,

ekuseni urhiribidela ukudla kwakhe,

entambama wahlukanisa ipango.”