Ihlekelele elindelweko
1Ilizwi lakaSomnini lafika kimi lathi: 2“Wena ndodana yomuntu, nakhu okutjhiwo nguSomnini uSomandla enarheni yakwa-Israyeli,
“ ‘Kusiphetho! Mbala isiphetho sifikile
emajikeni amane wenarha.
3Manje isiphetho siphezu kwakho, wena narha!
Ngizakuthulula ilaka lami phezu kwakho,
ngikugwebe ukuya ngeendlela zakho,
ngibeke zoke iinkghabhudlho zakho phezu kwakho.
4Amehlwami angeze akubabalela
namkha ngibe nezwelo.
Ngizokubetha ngeentonga zakho
iye, iinkghabhudlho zakho
zizakuba phakathi kwakho.
Nje-ke nizakwazi bonyana nginguSomnini.’
5“Nakhu okutjhiwo nguSomnini uSomandla,
“ ‘Qala-ke, ihlekelele phezu kwehlekelele, naso isiza!
6Isiphetho sifikile! Iye, isiphetho sifikile!
Sivukile ngokujamelana nawe narha!
Qala sifikile!
7Ukuwa kufikile kuwe
wena sakhamuzi senarha!
Isikhathi sifikile, ilanga litjhidele,
kulitjhada lepi eentabeni, ingasi lokuhlokoma!
8Nje-ke masinyana,
ngizokuthululela itukuthelwami phezu kwakho narha,
ngivuthele ilaka lami phezu kwakho.
Ngizakugweba ngokufanele iindlela zakho,
ngibeke zoke iinkghabhudlho zakho phezu kwakho.
9Amehlwami angeze ababalela
begodu angeze ngaba nezwelo.
Ngizokubetha ngeentonga zakho,
iye, iinkghabhudlho zakho
zizakuba phakathi kwakho.
Nje-ke nizakwazi bonyana nginguSomnini obethako.’
10Qala, nanto ilanga! Qala lifikile!
Ukuwa kwakho kuyeza.
Intonga seyihlumile,
ukuzikhakhazisa sekukhahlele.
11Inturhu ngeyentonga yobumbi.
Akakho noyedwa ozakusala,
iye, ngitjho umnotho nobunjinga babo;
akunabugugu phakathi kwabo!
12Isikhathi sifikile, ilanga liyatjhidela;
umthengi akangathabi nomthengisi angalili,
ngombana ilaka liphezu komnotho woke wenarha.
13“Mbala, abathengisi angeze babuyele kokuthengisiweko ngitjho nanyana basaphila ngombana umbono ophathelene nomnotho woke wenarha angekhe wabuyiswa. Ngebanga lecala labo, akakho noyedwa ozakulonda ipilwakhe.
14“ ‘Bavuthele ipalapala,
balungisa koke ukuya epini
kodwana akakho oya epinapho
ngombana ilaka lami
liphezu komnotho woke wenarha.
15Isabula ingaphandle
ngaphakathi kunezifo nendlala.
Loyo osemasimini ufa ngesabula;
osedorobheni ubhujiswa zizifo nendlala.
16Nakube abanye babo bayaphunyurha basinde,
bazakuba seentabeni njengamazuba wemirhoba:
Boke njalo bazakulila,
omunye nomunye ngecala lakhe.
17Zoke izandla zizakuba buthakathaka,
amadolo woke angenwe mamanzi.
18Bazakwembatha iinzilo,
ukwesaba kubagubuzese.
Amahloni azakuba phezu kwabo boke ubuso,
nobuphandla phezu kwazo zoke iinhloko zabo.
19Bazakuphosa isiliva labo endledlaneni,
igolide labo lithathwe njengomtjhubelo.
“ ‘Isiliva negolide labo angeze labasindisa ngelanga lelaka lakaSomnini. Angekhe banelisa imiphimbabo namkha bagcwalise izisu zabo ngalo ngombana icala labo lisikhubekiso. 20Bazikhakhazise ngobuphaziphazi begolide nesiliva, benze ngalo iinthombe ezisikghabhudlho, iye izinto ezisinyenyiso; ngalokho ngilenza libe mtjhubelo kibo.
21“ ‘Ngizalinikela ezandleni zabezizwe njengepango,
kwabakhohlakeleko bephasi libe sihlangulo;
bona-ke bazalisilaphaza.
22Ngizokufulathelisa ubuso bami,
ukuze abagongodi basilaphaze indawami eligugu;
iye, abadlelezeli bazayingena bebayisilaphaze.
23Lungisa amakhamandela,
ngombana inarha igcwele icala leengazi,
idorobho lizele inturhu.
24Ngizokungenisa abakhohlakele khulu bezizwe,
badle izindlu zabo.
Ngizokuphelisa ukuzazi kwabanamandla,
neendawo zabo zisilaphazwe.
25Lokha nakufika isikhathi sokubotjhwa
bazakufuna ukuthula
kodwana angekhe kwabakhona.
26Kuzakuba yihlekelele phezu kwehlekelele,
amarhemurhemu alandelwe marhemurhemu;
bazasoloko bafuna umbono emphorofidini;
ifundiso iphele emphristini
neenluleko zabadala.
27Ikosi izakulila,
ikosana yembathwe kukhungatheka,
izandla zabantu elizweni zibe nedumbe ngevalo.
Ngizabaphatha ngokuya ngeendlela zabo;
ngibagwebe ukuya ngokwemikhubabo.
Bazakwazi bonyana nginguSomnini.’ ”
