UHEZEKIYELI 4

₁Wena ndodana yomuntu, thatha isitina esikhulu usibeke phambi kwakho, kuthi phezu kwaso uthale ngokugobhodlha idorobho, okutjho iJerusalema. ₂Yenza umfanekiso wokuvimbezela idorobhelo: Yakha umbhotjhongo wepi ojamelene nalo, wakhe iinqabo eziqhube emthangalenalo. Godu beka mazombe iinkampa zepi nemigqala yokwephula umthangala. ₃Nje-ke wena thatha idendeleko yesimbi uyibeke njengomthangala wesimbi phakathi kwakho nedorobho olithalileko. Beka idorobhelo ilihlo ulenze libe sebujameni bokuvinjezelwa, iye, ulenze liminyezeleke. Lokhu kuzakuba liphawu endlini yakwa-Israyeli.

₄Godu lala ngehlangothi langesinceleni ukuze ihlangothi lakhwelo lizizwele ubudisi becala lendlu yakwa-Israyeli. Ngesibalo samalanga wokulala kwakho ngehlangothi lapho, uzakuthwala isibetho secala layo. ₅Mina ngokwami ngikubekele isibalo samalanga wokuthwala isibetho secala lendlu yakwa-Israyeli. Ngenza lokho ukuya ngesibalo seminyaka yesibetho sayo, okutjho amalanga alikhulu namatjhumi alithoba. Ngendlela enjalo, uzakuthwala isibetho sendlu yakwa-Israyeli. ₆Lokha nasele uqedile lokho, uzakulala kwesibili ngehlangothi langesidleni, uthwale isibetho sendlu yakwaJuda. Ngikujamisele amalanga amatjhumi amane, ilanga linye lijamele umnyaka. ₇Ngengalwakho eyembuliweko uzakubeka ilihlo ekuvimbezelweni kweJerusalema. Ngaleyondlela uzabe uphorofida ngokujamelana nalo. ₈Qala-ke, ngizokubopha ngeentambo kobana ungakghoni ukuphendukela ngakelinye ihlangothi, ukufikela lapha kupheleliswa khona amalanga wokuvimbezela kwakho.

₉Nje-ke thatha ikoroyi nebhali, iimbhontjisi neenhlumaya, inyaluthi kanye nesakoroyi ukuthele ngesitjeni sinye bese uzenzela izikwa. Ngesikhathi senani lamalanga wokulala kwakho ngehlangothi okutjho amalanga alikhulu namatjhumi alithoba, uzakudla izikwezo. ₁₀Ukudla okudlako kuzakuba budisi besiqunjwana sekhilogremu ngelanga. Uzakukudla iinkhathi ezijanyisiweko. ₁₁Uzakusela amanzi alingana nesiquntu selitha nawo uzawasela ngeenkhathi ezijanyisiweko. ₁₂Ukudlokho uzakudla kube inga licebelengwana lebhali kodwana ulibasele phambi kwabantu ngothuvi bomuntu. ₁₃USomnini wathi: “Ngendlela leyo ama-Israyeli azakudla ukudla kwawo okungakahlambuluki hlangana nezizwe engizawahlakazela kizo.”

₁₄Yeke ngathi: “Awu, Somnini Somandla! Qala, mina azange khengizisilaphaze. Kusukela ebutjheni bami bekube nje, azange khengidle ingcuba namkha okudatjulwe zimbandana, ngitjho nenyama esinyenyiso azange ingene emlonyenami.” ₁₅Nje-ke wathi kimi: “Qala, esikhundleni sothuvi bomuntu ngizokunikela ubulongwe ozazilungisela ngabo ukupheka ukudla kwakho.”

₁₆Godu wathi kimi: “Ndodana yomuntu, ngizokwephula umphekgho wesikwa eJerusalema. Bazakudla izikwana ngokunconcosela nangokuminya namanzi bazawasela ngokutopiza nangokuzibamba. ₁₇Ngokuswela isikwa namanzi bazakuqalana ngokurareka, bebonde ngebanga lesibetho sabo.”