Ukuthunjwa kuyamenyezelwa
1Ilizwi lakaSomnini lafika kimi lathi: 2“Ndodana yomuntu, uhlala phakathi kwendlu ehlubukako okubabantu abanamehlo wokubona kodwana akaboni, baneendlebe zokuzwa kodwana azizwa, mbala bayindlu ehlubukako.
3“Ngalokho wena ndodana yomuntu, zilungiselele umthwalo womthunjwa, uphume bakuqalile emini libalele. Ukhambe njengomthunjwa usuke lapha ukhona uye kwenye indawo bakuqalile. Mhlumbe lokho bazakuzwisisa nanyana bayindlu ehlubukako nje. 4Uzakukhupha umthwalwakho njengowomthunjwa emini bakuqalile. Kuthi ntambama bakuqalile wena uphume njengabathunjwa nabaya ekuthunjweni. 5Kuzakuthi basakuqalile, uphundluse umthangala bese uphuma nomthwalwakho ngentunja leyo. 6Khona emehlwenabapho utjathe umthwalwakho, uphume nawo ngamarhwaqela. Sitha ubuso bakho ukuze ungaboni inarha ngombana ngikwenza isibonakaliso endlini yakwa-Israyeli.”
7Nje-ke ngenza njengombana ngiyaliwe. Ngakhupha umthwalami emini libalele, kwaba inga mthwalo wokuthunjwa. Kwathi ntambama ngaphundlusa umthangala ngezandla zami. Ngaphuma ngamarhwaqela ngitjathe umthwalwami bangiqalile.
8Kwathi ekuseni kwafika kimi ilizwi lakaSomnini lathi: 9“Ndodana yomuntu, angithi indlu ehlubukako yakwa-Israyeli yathi kuwe, ‘Wenzani na?’ 10Ngalokho yithi kiyo, ‘Nakhu okutjhiwo nguSomnini uSomandla: Isimemezelwesi simalungana nekosana engeJerusalema nayo yoke indlu yakwa-Israyeli ekanye nayo.’ 11Yewuthi kubathunjwa, ‘Ngisibonakaliso kini: Njengombana ngenzile, kuzakuba njalo ekosaneni leyo nakilabo abakiyo. Bazokuya ekuthunjweni, iye, ekudingisweni.’ 12Nekosana ephakathi kwabo izakutjatha umthwalo ngamarhwaqela irhotjhe. Iye, bazakuphundlusa umthangala kobana bakhokhobise imithwalo ngentunja. Ikosana izakusitha ubuso bayo ngombana yona ngokwayo angeze yabona inarha ngelihlo layo godu. 13Ngizokweneka inedami phezu kwayo, iye, izakubanjwa ngesifwini sami. Ngizayiletha eBhabheli enarheni yamaKasidi, kodwana yona angeze yakubona lokho begodu izakuhlongakalela lapho. 14Boke abayizombelezileko ekubasizi bayo okutjho loke ibutho layo ngizobahlakazela emikhakheni yoke. Ngizobalandela ngirhwatjhe isabula ngemva kwabo. 15Bazakwazi bonyana nginguSomnini lokha nangibasabalalisa hlangana nezizwe, ngibahlakazele emazweni. 16Kodwana idlanzana labo ngizolisindisa esabuleni, endlaleni nezifweni ukuze bavume zoke iinkghabhudlo zabo hlangana nezizwe abaye kizo. Nje-ke bazakwazi bonyana nginguSomnini.”
17Ilizwi lakaSomnini lafika kimi lathi: 18“Ndodana yomuntu, yidla ukudla kwakho ngokuthuthumela, usele amanzi ngokuqhaqhazela nangokuminya 19bese uthi ebantwini benarheni le, ‘Nakhu okutjhiwo nguSomnini uSomandla mayelana nabahlali beJerusalema enarheni yakwa-Israyeli: Bazokudla ukudla kwabo ngokuminya basele amanzabo ngokuzibamba ngombana isifunda seJerusalema sizokwemukwa koke esinakho ngenca yenturhu yalabo abahlala kiso. 20Imizi neendawo zokuhlala kuzakuba marubhi, nenarha izokuba libhudu. Nje-ke nizakwazi bonyana nginguSomnini.’ ”
21Ilizwi lakaSomnini lafika kimi lathi: 22“Ndodana yomuntu, sitjho ukuthini isaga eninasweso enarheni yakwa-Israyel, esithi, ‘amalanga ayadlula nemibono yoke iba lilize’ na? 23Ngalokho batjele bonyana nakhu okutjhiwo nguSomnini uSomandla, ‘Isagesi ngizosiphelisa, yeke, angeze basasisebenzisa njengesaga kwa-Israyeli.’ Kodwana yewuthi kibo, ‘Amalanga afikile nokuphetheka komunye nomunye umbono kuseduze.’ 24Mbala, angeze kusabakhona umbono wamanga namkha ukuphengula okukhohlisako endlini yakwa-Israyeli 25ngombana mina Somnini, ngizokukhuluma. Lokho engizakumemezela kuzakwenzeka. Angeze kusariyadiswa godu; iye emalangenenu, nina ndlu ehlubukako, ngizokumemezela ilizwi bengilenze.” Kutjho uSomnini uSomandla.
26Godu ilizwi lakaSomnini lafika kimi lathi: 27“Ndodana yomuntu, qala, indlu yakwa-Israyeli ithi, ‘Imibono umphorofidi lo ayibonako ingeyeminyaka eminengi ezako; iye, iimphorofidwezo zingezesikhathi esikude.’ 28Ngalokho yithi kiyo, ‘Nakhu okutjhiwo nguSomnini uSomandla: Alikho nalinye lamezwami elizakuriyadiswa godu; ilizwi engilimemezeleko lizokwenzeka.’ ” Kutjho uSomnini uSomandla.
