Ukusuka kwephazimulo ethempelini
1Nje-ke ngaqala, ngabona phezu kwesigubuzeso ebesingehla kweenhloko zamakerubhi into efana nelitje lesafaya; nento enjengomfanekiso wesibumbeko sesihlalo sobukhosi yaba semtarini ngehla kwakho koke lokho. 2USomnini wathi emuntwini owembethe zelineni: “Ngena hlangana namavili ngaphasi kwamakerubhi. Zalisa izandla zakho ngamalahle avuthako owathethe phakathi kwamakerubhi, uwarhatjhe ngaphezu kwedorobho.”
Nje-ke wangena ngimqalile. 3Amakerubhi gade ajame ngesewula yethempeli lokha umuntu loyo nakangenako. Ilifu lazalisa isirhodlo esingaphakathi. 4Iphazimulo kaSomnini yenyuka ngehla kwamakerubhi yaya embunjwaneni wethempeli. Ithempeli beligcwele ilifu, isirhodlo sizele ubuphaziphazi bephazimulo kaSomnini. 5Kwezwakala itjhada leempiko zamakerubhi ukufikela esirhodlweni esingaphandle, kwaba njengephimbo loSabekako lokha nakhulumako.
6Wayala umuntu owembhethe ilineni wathi: “Yokha umlilo hlangana namavili phakathi kwamakerubhi.” Nje-ke wangena, wafese wajama eqadi kwevili. 7Elinye ikerubhi lelulela isandla salo phakathi kwamanye amakerubhi kobana lokhe umlilo liwubeke ezandleni ezikhongozeleko zowembethe zelineni, yena wawuthatha waphuma nawo. 8Amakerubhi abonakala anesimo sesandla somuntu ngaphasi kweempiko zawo.
9Nje-ke ngaqala, ngabona amavili amane ngeqadi kwamakerubhi, elinye nelinye ivili belingeqadi kwekerubhi. Amavili lawo bekaphazima njengelitje lebherili. 10Umfanekiswawo bewunesibumbeko esifanako womane njalo, kubonakala ngathi kulivili ngaphakathi kwelinye. 11Lokha nakhambako gade anqomba nanyana ngakiliphi ihlangothi kilawo amane, ngaphandle kokujika. Iye, lapha ikerubhi elingaphambili linqomba khona, amavili bekalandela ngaphandle kokujika. 12Woke umzimba wamakerubhi, imihlanawo, izandla zawo neempiko zawo kanye namavili bekugcwele amehlo mazombe. Elinye nelinye belinevili lalo. 13Mina ngazizwela ngeendlebe zami kuthiwa amavili abizwa bona “asiyingilizisi”. 14Womane amakerubhi bekanobuso obune: bokuthoma bekububuso bekerubhi, besibili kungebomuntu, besithathu kungebebhubezi, kuthi besine kube ngebekhozi.
15Nje-ke amakerubhi aphakama. Lezi bekuziimphili engazibona ngemlanjeni weKebari. 16Kwathi lokha amakerubhi nakhambako, amavili nawo akhamba emaqadi kwawo. Lokha amakerubhi aphakamisa amaphikwawo kobana aphaphele phezulu ukusuka ephasini, amavili akhange ajike emaqadi kwawo. 17Kuthi lokha amakerubhi najamako, namavili ajame. Kuthi lokha naphakamako, nawo aphakame ngombana ummoya bewulawula amavili.
18Iphazimulo kaSomnini yaphuma embunjwaneni wethempeli yafese yajama phezu kwamakerubhi. 19Nje-ke amakerubhi aphakamisa iimpiko zawo aphaphela phezulu asuka ephasini ngiwaqalile, amavili bekasemaqadi kwawo. Amakerubhi lawo afese ajama ebungenweni besango langepumalanga lethempeli lakaSomnini. Iphazimulo kaZimu wakwa-Israyeli beyiphezu kwawo.
20Lezo bekuziimphili engazibona ngaphasi kwakaZimu wakwa-Israyeli ngemlanjeni iKebari. Nje-ke bengazi bona zimakerubhi. 21Esinye nesinye besinobuso obune neempiko ezine bese kuthi ngaphasi kweempiko kube nomfanekiso osasandla somuntu. 22Mayelana nesibumbeko sobuso bazo: Lobo bekububuso engabubona emlanjeni weKebari, iye, umfanekiswazo lo bekungizo mbala. Esinye nesinye sanqomba ngqo phambili.
