U-EKSODUSI 38

₁UBhetsaleli wenza i-aldari lomhlabelo wokutjhiswa ngomuthi womtholo, laba sikwere ngaphezulu. Ubude nobubanzi belimamitha amabili nesiqunjwana, liphakeme ngemitha nesiqunjwana. ₂Walenzela iimpundu emajikenalo amane. Iimpundwezo gade zinamathelene nalo, walinameka ngekoporo. ₃Wenza zoke izitja ze-aldari ngekoporo. Zona gade kungilezi: iimbiza, iintjhefula, izitja zokunyenyeza, iimforogo nezitja zokutjhisela itjhwalo. ₄Walenzela umsefo wekoporo njengenede ngemaqadi walo. Wabeka umsefo ngaphasi komqoqo we-aldari ukuze ulembelele uphelele phakathi e-aldarini. ₅Walibumbela amasongo amane, wawabophelela emajikeni amane womsefo wekoporo bona abe ziimphatho zeengodo. ₆Wenzela i-aldari iingodo zomtholo, wazinameka ngekoporo. ₇Wafaka iingodwezo emasongweni ngemaqadi we-aldari kobana lithwalwe ngazo. I-aldari gade lenziwe ngamaplanka laba nomkghotho ngaphakathi.

₈Godu wenza isitja sekoporo saba nesinzinziso sekoporo ngeemboniboni zabafazi okwathi muva basebenza emnyango wetende lokuhlanganela.

₉UBhetsaleli wenza isirhodlo sethaberinakeli ngalendlela: Ngeswazini langesewula lethaberinakeli walembelelisa umlembelembe wamatjhila welineni emhlophe anomthungo, waba mamitha amatjhumi amane nahlanu. ₁₀Ihlangothi lesirhodlwelo laba neensika ezimatjhumi amabili namanzinziso wakhona amatjhumi amabili enziwe ngekoporo. Kodwana iinkhonkhwani zeensika kanye nemipherho yakhona gade kwenziwe ngesiliva. ₁₁Ngeswazini langetlhagwini lethaberinakeli nakhona kwaba nomlembelembe omamitha amatjhumi amane nahlanu ubude. Iinsika zakhona zaba matjhumi amabili namanzinziso wakhona enziwe ngekoporo aba matjhumi amabili. Kodwana iinkhonkhwani zeensika kanye nemipherho yakhona gade kwenziwe ngesiliva. ₁₂Ngeswazini langetjingalanga lethaberinakeli khona gade kunomlembelembe wamatjhila omamitha amatjhumi amabili nambili nesiquntu, iinsika zakhona zilitjhumi namanzinziso wakhona alitjhumi. Iinkhonkhwani zeensika kanye nemipherho yakhona gade kwenziwe ngesiliva. ₁₃Ngeswazini langaphambili lethaberinakeli ngepumalanga gade limamitha amatjhumi amabili nambili nesiquntu. _14-15Ihlangothi lesirhodlo langaphambili laba nemilembelembe emibili yamatjhila ephahle isango. Ubude bomlembelembe ngamunye bebumamitha asithandathu nesiquntu nesiqunjwana. Yomibili imilembelembe leyo yaba neensika ezintathu namanzinziso amathathu. ₁₆Woke umlembelembe wamatjhila magegana nesirhodlo gade wenziwe ngelineni emhlophe enomthungo. ₁₇Amanzinziso weensika gade ayikoporo, kodwana iinkhonkhwani zakhona kanye nemipherho yakhona gade kwenziwe ngesiliva. Iimpundu zeensika gade zinamekwe ngesiliva. Zoke iinsika zesirhodlo bezinemipherho yesiliva. ₁₈Isivalo sesango lesirhodlo gade senziwe ngelineni emhlophe ethungwe ngewulu ehlaza komkayi, ebubende netlerebede. Gade simamitha alithoba ububanzi, simamitha amabili nesiqunjwana ukuphakama. Besilingana nokuphakama komlembelembe wesirhodlo. ₁₉Isango belineensika ezine namanzinziso amane wekoporo. Iinkhonkhwani zeensika kanye nemipherho yakhona gade kuyisiliva. Iimpundu zakhona bezinamekwe ngesiliva. ₂₀Zoke iinkhonkhwani zethaberinakeli nezesirhodlo magegana, gade ziyikoporo.

₂₁Ngomyalo kaMosi amaLevi atlola isibalo seentlabagelo ezasetjenziswa mayelana nethaberinakeli okutjho itende lapha bekufakwe khona ubufakazi. AmaLevi lawo gade arholwa ngu-Itamara umsa ka-Aroni umphristi omkhulu. ₂₂Lokho kwenziwa ngemva kobana uBhetsaleli umsa ka-Uri omsa kaRhuri ongowekoro yakwaJuda enze koke uSomnini ayala uMosi ngakho. ₂₃Yena gade asekelwe ngu-Oholiyaba umsa ka-Arhisamaki wekoro yakwaDani ongusosino, umtlami nomthungi ngewulu ehlaza komkayi, ebubende netlerebede phezu kwelineni emhlophe.

₂₄Inani legolide elasetjenziswa kiwo woke umsebenzi wethaberinakeli nakho koke okukilo gade limakhilogremu ayikulungwana ukuya ngesilinganiso esisetjenziswa endaweni ecwengileko. Igolideli lalethwa babantu njengesibiko.

₂₅Isiliva eyalethwa ma-Israyeli atlolisweko gade imakhilogremu aziinkulungwana ezintathu namakhulu amane namatjhumi amathathu ukuya ngesilinganiso esisetjenziswa endaweni ecwengileko. ₂₆Kwaba magremu amahlanu anesiquntu nesiqunjwana emuntwini ngamunye otlolisweko. Lokho bekusilinganiso esisiquntu sesipaparwana ukuya ngesilinganiso esisetjenziswa endaweni ecwengileko. (Bekubalwe ukusuka koneminyaka ematjhumi amabili ukuya phezulu, kwaba madoda aziinkulungwana ezimakhulu asithandathu nantathu namakhulu amahlanu anamatjhumi amahlanu.) ₂₇Amakhilogremu aziinkulungwana ezintathu namakhulu amane netjhumi wesiliva gade asetjenziselwe ukubumba amanzinziso wendawo ecwengileko newesiyaya. Inaneli lasetjenziselwa ukubumba amanzinziso alikhulu okutjho bona amakhilogremu angaphezudlwana kwamatjhumi amathathu nane enza inzinziso linye. ₂₈Ngamakhilogremu amatjhumi amabili wesiliva aseleko uBhetsaleli wenzela iinsika iinkhonkhwani, wanameka iimpundu zeensika bewazenzela nemipherho.

₂₉Ikoporo eyalethwa njengesibiko gade imakhilogremu aziinkulungwana ezimbili namakhulu amane namatjhumi amabili nahlanu. ₃₀UBhetsaleli wenza ngayo amanzinziso womnyango wetende lokuhlanganela, i-aldari lekoporo nomsefo wekoporo ngemaqadi kanye nazo zoke izitja ze-aldari, ₃₁amanzinziso weensika zesirhodlo newesango laso kanye nazo zoke iinkhonkhwani zethaberinakeli nezesirhodlo.