U-EKSODUSI 31

₁uSomnini wakhuluma noMosi wathi: ₂“Qala, ngikhethe uBhetsaleli umsa ka-Uri omsa kaRhuri wekoro yakwaJuda. ₃Ngimzalise ngesiphiwo esikhethekileko bona abe nekghono nokuhlakanipha, ilwazi nobuno, ₄kobana enze imitlamo yobukghwari, asebenze ngegolide, isiliva nekoporo, ₅abaze amatje aligugu wokurubela, abaze iingodo okutjho namkha ngiliphi isino. ₆Qala-ke, ngimbeke kanye no-Oholiyaba umsa ka-Arhisamaki, wekoro yakwaDani. Godu nginikele woke amadoda anekghono ukuhlakanipha kobana enze koke engikuyale ngakho: ₇itende lokuhlanganela, umfaji wokufaka ubufakazi, isisibekelo somfaji esiphezu kwawo nakho koke okukhambisana netende, ₈itafula nezitja zalo, ilithi leembani legolidembala nazo zoke izitja zakhona, i-aldari letjhwalo, ₉i-aldari lomhlabelo wokutjhiswa nazo zoke izitja zakhona, isitja sokuhlambela nesinzinziso saso, ₁₀izambatho ezithungiweko nezikhethekileko zaka-Aroni umphristi omkhulu kanye nezambatho zamadodanakhe kobana babe baphristi, ₁₁amafutha wokuzesa namakha wetjhwalo malungana nendawo ecwengileko. Lokho bakwenze ngendlela engikuyale ngayo.”

₁₂USomnini godu wathi kuMosi: ₁₃“Yithi kuma-Israyeli, ‘Gcinani amaSabatha wami ngombana lokhu kulitshwayo phakathi kwami nani ukudlulela eenzukulwaneni zenu ukuze nazi bonyana mina Somnini ngiyanihlukanisela. ₁₄Nigcine iSabatha ngombana licwengile kini; nanyana ngubani olisilaphazako akabulawe. Iye, nanyana ngubani owenza umsebenzi mhlokho, akajutjwe ebantwini bekhabo. ₁₅Umsebenzi awenziwe emalangeni asithandathu, kodwana ilanga lekhomba liliSabatha elihlukaniselweko nelicwengileko kuSomnini. Nanyana ngubani owenza umsebenzi ngeSabatha akabulawe. ₁₆Ngalokho ama-Israyeli azakugidinga iSabatha, aligcine eenzukulwaneni zawo zoke kube sivumelwano sanini nanini. ₁₇Kulitshwayo lanini nanini phakathi kwami nama-Israyeli kobana emalangeni asithandathu uSomnini wenza izulu nephasi kodwana waphumula ngelanga lekhomba, ngalokho waqabuleka.’ ”

₁₈Kwathi naqeda ukukhuluma noMosi entabeni yeSinayi wamnikela imiqebethu emibili yobufakazi, imiqebethu etlolwe ngomuno kaZimu.